نص تعليق السيسي على وزير الزراعة خلال افتتاح مشروع الفيروز للاستزراع السمكي 23/1/2021

معلش أنا هاقاطعك، هات الصورة اللي قبل كدة لو سمحتوا. من فضلكم توقفوا أمام الصورة اللي في اليمين (صورة مركز تجميع ألبان قبل التطوير) توقفوا أمام الصورة اللي في اليمين. أنا مش هاقدر أقول إن كل مراكز التجميع كانت بالشكل ده، لكن نسبة كبيرة جدا منها كانت محتاجة تطوير. تطوير عشان نقول إيه؟ عشان بس، يعني، ماهو ممكن يكون ده عنوان مكتوب في الجرنال، إن إحنا هانرفع ونطور مراكز تجميع الألبان في مصر، 700 ولا 800؟ يعني خليهم رقم يتحفظ 800، الـ800 دول عشان تخلي الألبان بتاعتهم مطابقة للمواصفات العالمية، هاقول كلمة غريبة شوية، هو إحنا مش من حقنا كمصريين يعني، إن كل حاجتنا تبقى مطابقة للمواصفات ولا إيه؟ مش كدة؟ فده الكلام اللي أنا عايز بس أشاور عليه هنا.

فكان كلامنا للـ800 مركز دول، أو الـ900 مركز دول، وأنا بقول عشان كمان أصحابهم يسمعونا، ممكن يقولك أنا شغال وبكسب وكويس بالطريقة ديت. هاقوله ده صحيح، لكن إن كده إحنا قلنا هاندفع تكلفة، مش كدة؟ تكلفة الشهادة اللي بتتكلف 50 ألف جنيه كدولة لك، عشان مانخليكش إنت تدفعها، يعني عشان تخش في العالمية، عشان تخش في إنك إنت بتدي مواطن مصري، طفل كان أو طفلة، لبن جيد جدا جدا جدا أو منتج جيد جدا جدا، سواء كان هايستخدم بشكل مباشر أو هايستخدم في ادوات أخرى.

فمراكز تجميع الألبان اللي بنتكلم عليها دول، يعني كانت الخطة ممتدة شوية، وقلتله طب ليه يعني إحنا بنعمل كويسة ونديهم الشهادات، ده بترفع، بالمناسبة، الكيلو من المنتج ده بتمن، والكيلو من المنتج دهب يزيد جنيه جنيه ونص، مش كدة يا فندم؟

أنا بقول الكلام ده عشان بتكلم في ملايين ال، مش اللترات حتى، الأطنان، ده تفرق كتير قوي، فلوس كتير. فإنتوا أولى بيها، وكمان من حق المصريين إن هم ياخدوا منتج جيد، سواء كان مباشر كدة، أو إن هو يبقى منتجات أجبان وكلام من هذا القبيل.

الله إحنا كل حاجة بناخدها كدة، أنا بحلف بالله.. إديتوني سكة حديد كدة.. وإدوتوني زراعة كدة.. وإدوتوني طرق كدة.. كل حاجة إديتوهاني كدة.. وأنا عايز أخليها كدة (يرفع إبهامه)، أو نخليها كدة مع بعض... اتفضل.

أنا حبيت أوري الصورة دي، وأرجو إن إنتم حتى وإحنا بنتكلم فيها في الإعلام، طلعوها مافيش حاجة يعني، ما إحنا بنقول، بننقد نفسنا، وبنقول إن ده واقع كان موجود، وإحنا بنحاول نغيره بالتعاون مع اللي هم أصحاب هذه المراكز اللي بنحطهم في مصاف بالطريقة ديت، اللي هو التطوير ده، اللي هو حاجات معتمدة، ودرجة، ومواصفات معينة، ثم دي بتاخد شهادة دولية دهيه، طبقا للمعايير اللي حطاها وزارة اسمه إيه ده الصحة العالمية، مش كدة؟ عشان تقدر تقول إنك إنت سواء لمصر لما تبيع، أو خارج مصر بالشهادة دي، المنتج ده يبقى، مش كدة يا فندم؟

فأنا بس بقول النقطة ديت أنا معلش قاطعتك، لكن كان لابد عشان هي ممكن صورة وتعدي، لكن لأ... بالمناسبة... والله إحنا كل حاجة بناخدها كدة، أنا بحلف بالله.. إديتوني سكة حديد كدة.. وإدوتوني زراعة كدة.. وإدوتوني طرق كدة.. كل حاجة إديتوهاني كدة.. وأنا عايز أخليها كدة (يرفع إبهامه)، أو نخليها كدة مع بعض... اتفضل.

...

وعليكم السلام بس خليني إيه (يضحك الرئيس) أنا بس عايز أقول، أنا بشكرك معالي الوزير على العرض اللي إنت عرضته، وعلى التطور اللي حصل في مجال، في كل مجال الزراعة، في كل مجالات الزراعة يعني، يعني هو لو معالي الوزير تحدث عن موضوع الاستصلاح الزراعي نفسه كمان في اللي هنا، هاتجدوا إننا بنحقق وهانحقق بفضل الله سبحانه وتعالى تقدم كبير قوي فيه.

لكن أنا هاتوقف عند موضوع الاستزراع السمكي بالذات، لأن أنا متصورة إن إحنا محتاجين الموضوع ده نتوقف قدامه ونراجعه كويس، عشان كمان زي ما إحنا بنقول كدة إن إحنا عايزين دايما نخش في المستوى ال، أو المعايير المعمول بيها في جودة وسلامة المنتج اللي طالع، بردو هذا الأمر يتحقق هنا.

على سبيل المثال لا الحصر يعني، هو اتكلم عن المنزلة، بس اتكلم، ماتكلمش عن المنزلة إن في مازال حتى الآن مزارع موجودة هناك محتاجة إن إحنا، إحنا قلنا الـ250 ألف فدان بتوع المنزلة هايبقوا بحيرة، والبحيرة دي لو تم الاهتمام بيها وتنظيم ال، تنظيم الصيد فيها، وبقى في شكل سيطرة حقيقية على أعمال الصيد وأعمال الزريعة اللي ممكن تلقى فيها، يعني هي الأمور الخاصة بهذا الصناعة.. صدقوني هاتكفي كل الناس اللي شغالة في القطاع. لأن إحنا بنتكلم في 250 ألف فدان، وبالمناسبة هي كانت كدة قبل كدة، من 100 سنة وأقل يمكن، من 70 سنة 60 سنة 50 سنة، كانت البحيرة دي هي اللي بيتم الصيد فيها. لما الموضوع بقى تطور وبقت بيترمي فيها صرف صحي وزراعي وكدة، صعب، أدى إلى تدهور البحيرة ديت، هي وغيرها، هي وغيرها.

أنا هاتوقف قدام البحيرة ديت عشان إحنا بنتكلم في مشروع النهاردة هانفتتحه، إنتوا هاتجدوا إن المشروع هنا ممكن تكون تكلفته كتير، طب ليه تكلفته كتير، لأن المعايير المعمول بيها المشروع معايير متكاملة، معايير متكاملة، إجراءات كلها طبقا ل، يعني زي ما بيقولوا كدة أصول الصنعة يعني، من أول المية ماتخش لغاية لما تتوزع لغاية لما تتعالج بعد كدة عشان ترجع حتى لا تؤثر على البيئة، ثم جودة المية اللي موجودة ديت وتأثيرها، والغذا اللي بيقدم ليها، بدون شك، تكلفة الكلام ده كتير، لكن النهاردة أنا لما بعمل حوض في أرض زراعية فدان ولا فدانين، مش هايكلفني حاجة، مش هايكلفني حاجات كتير يعني.

وبالتالي، بس المنتج بتاع يا ترى جودته بنفس الجودة ديت؟ مافتكرش. طيب البحيرة بتاعة المنزلة اللي بنتكلم عليها واللي لغاية دلوقتي إحنا ماخلصناش رغم إن إحنا حاشدين طاقتنا وجهدنا عشان نخلصها السنة دي يا إيهاب؟ مش كدة؟ مش كدة؟ طيب. إحنا كنا بنتكلم، وماعرفش إنتوا جايبين الصورة بتاعتها يا إيهاب ولا؟ طب ممكن نبقى يعني نوريها للناس بردو. أنا بس عايز أقول إيه، إحنا عملنا جهد ضخم جدا جدا بتكلفة مالية هائلة، بنتكلم على مليارات من الجنيهات، ورغم إن اللي بتقوم بالشغل ده شركات بردو مصرية، مش معقول بعد ما هانعمل ده هايبقى في أحواض استزراع سمكي في المنزلة، وأنا بقولها وحد تاني يقولك بلاش تتصدى للموضوعات ديت، ماينفعش يا جماعة، ماينفعش، لازم البحيرة دي، طب وبقية الموضوعات اللي خاصة بالشغلانة عند الناس ديت، ندرسها، إحنا مش بنضيع حد خالص، إحنا مش بنضيع حد خالص. لكن عشان تبقى بحيرة لإنتاج سمك، ممكن تطلع أكتر من الكمية اللي غنتوا بتطلعوها بالاستزراع، صدقوني، وحتى لو عايزين نعمل استزراع، هايبقى استزراع منظم، مترتب كويس.

طب أنا متصور إن اللي إحنا بنعمله هنا، إن الناس اللي بتيجي غرب القنال وشغالة في المجال ده، تتفضل هنا، وإحنا بانيين يا دكتور مصطفى إسكان، مش كدة؟ في إسكان موجود في شرق بورسعيد في مدينة السلام، المسافة بين الاتنين مش كتير. عايزين استثمار؟ أهو. معمول بشكل زي مابقول كدة طبقا للأصول، و عايز فترة سماح نديك. بس تعالى هنا، عيش هنا بقى، عشان إنتوا بتقولوا هانسيب سينا؟ لا إحنا مش هانسيبها. بس تعالوا معانا، تعالوا معانا، والأحواض أهي، وزي ما إنتوا هاتشوفوا في العرض اللي جاي المنظر هايبقى عامل إزاي. بس إحنا محتاجين إن الناس ماتمسكش في الوادي، وغرب ال، يعني، والدلتا، وتسيب التطور اللي إحنا بنعمله في سينا يعني.. شكرا جزيلا، شكرا.

ألقيت الكلمة في مدينة بورسعيد، بحضور الدكتور مصطفى مدبولي رئيس مجلس الوزراء، وعدد من الوزراء.

خدمة الخطابات الكاملة للسيسي تجدونها في هذا الرابط