الصفحة الرسمية للرئيس على فيسبوك
الرئيس عبد الفتاح السيسي

نص كلمة السيسي خلال مشاركته في حفل إفطار الأسرة المصرية 12/6/2018

منشور الاثنين 18 يونيو 2018

الأب بييجي يقول لأولاده وأهله أنا هاقدر على دي ومش هاقدر على دي، وهم بيتفهموا ده إذا كانوا عايزين الأسرة دايما تبقى مستورة، وتبقى يعني محفوظة، وماتضيعش، بيتحملوا معاه، أما لو قالوله لا بقى إحنا مش مستحملين وانت لم تحسم الأمر ومش هانكمل معاك على كدة، بتضيع الأسرة، بتضيع الأسرة. 

بسم الله الرحمن الرحيم.

أنا المرة دي ها.. هاطلب من المهندس شريف و.. والمهندس مصطفى يبقوا جنب مني هنا بعد إذنكوا (تصفيق).

كل سنة وإنتوا طيبين جميعًا، وكل التحية والتقدير ليكم.

والحقيقة، المرة اللي فاتت لما التقينا و.. أنا ما اتكلمتش في الموضوع المهم اللي أنا دايمًا بحب أتكلم فيه.. إحنا، أنا بالنسبالي عندي تحدي، والتحدي دايمًا ببص، يعني دايمًا بشوفه قدامي، ولا أتخلى أبدًا على إن أنا أنظر ليه عشان أتخلص منه، أو نتخلص منه.

لأن الدولة دي، عشان تتجاوز ما هي فيه، وتخرج من الدايرة اللي موجودة فيها بقالها سنيييين طويلة جدًا، وتبقى دولة ذات شأن وذات قيمة، لا يمكن هيكون الكلام ده يتم، وأنا بتكلم مع الأسرة المصرية بكل تنوعاتها، المثقفين والمفكرين والإعلاميين، ورجال الاقتصاد ورجال الأعمال، كل الـ.. كل الشعب المصري موجود مسؤولين، إذا ماكناش كلنا نبقى موجودين على خط واحد في مواجهة التحديات اللي موجودة في الدولة دي، صعب جدًا.

وأنا مش عايز أكرر، يعني، مش عايز أتكلم، مش، مش، يعني مش عايز أتكلم فيها كتير، عشان ماتزهقوش، بس مافيش مفر، مافيييش مفر.. إذا كنا عايزين نكون دولة حقيقية، يجب أن نتألم ونقاسي (يرفع سبابته)، حتى نكون دولة، هو ده الطريق، وأي حد يتصور إن ممكن ده يحصل من غير الكلام ده، هو، يعني يقولي ازاي وييجي يقف مكاني (يرفع سبابته) يقولي ازاي يعملها ويحل المسألة، وييجي يقف مكاننا هنا، لكن غير بأي طريقة تانية إن إحنا نقول لا لا دي بسيطة، هي بسيطة بحاجة واحدة بس، بإن إحنا كمصريين كلنا زي ما دايمًا بقول كدة (يقبض على يده)، وندفع التمن ده مع بعض.

أنا كنت بتفرج النهاردة على المؤتمر اللي عمله الدكتور شاكر فيما يخص أسعار الكهربا في مصر، هانتكلم بـ، بمنتهى منتهى البساطة اللي في الدنيا. إحنا تقريبًا نقدم كل ما يمكن تقديمه بأرخص تكلفة وأتحدى في ذلك العالم كله، بنتكلم على طاقة بأرخص تمن لها، بنتكلم على وقود بأرخص تمن ليه، حاجات أخرى، أسعار سلع وكلام من هذا القبيل أتصور إن إحنا تقريبا أرخص برضه، أو أقل تكلفة، طيب..

ففي حد وهو الدكتور شاكر بيحكي بيشرح، الخطة اللي احنا متكلمين عنها بقالنا 5 سنين، إن إحنا ماشيين فيها عشان نقلل بالتدريج تكلفة آآ تكلفة آآ دعم الطاقة، أو ترشيد هذا الدعم، تقديمه إلى مستحقيه، والكلمة دي إحنا مش نقولها عشان كلمة لطيفة إن إحنا هانديه لمستحقيه، لا إحنا جادين في هذا الأمر، وهاقولكوا إحنا بندي دعم ازاي. 

مصر بتدي دعم 330، 332 مليار؟ 332 مليار جنيه كل سنة.. الدعم ده بالمناسبة مالوش علاقة بالأسعار، آسف، بالمرتبات بتاعت الناس، ده دعم هو فرق التكلفة اللي بتقدمها الحكومة على فرق البيع اللي بيتقدم للمواطن المصري، أي مواطن مصري.

فأحد الاعلاميين سأله قاله، طب واللي ماعهوش يعمل إيه، وكان سؤال جميل، طيب ما إحنا هانعمل كلنا مع بعض للي ماعهوش، يعني هو الدكتور شاكر قاله هاعيد تاني، بيحكيله الحكاية من الأول، لكن أنا بقول طب ما إحنا هانبقى موجودين مع بعض عشان نقف جنب اللي ماعهوش فعلا، فعلا! اللي ماعهوش فعلًا.. لكن مش على الإطلاق، مافيش حد، شركة، بتبيع منتجاتها بأقل من تمنها وهاتنجح، مافيش شركة في العالم هاتقدم منتجات بأقل من تكلفة انتاجها وهاتنجح، منين؟ إزاي؟

فـ، مش معنى إن أنا بتكلم معاكوا جد كدة إن أنا يعني (يبتسم) بس أنا عايزكو تحسوا معايا بالحكاية اللي إحنا فيها، مصر، ولو سمحتم كلكم واللي بيسمعوني وحتى في الإعلام بعد كدة لما بيتكلم مع الشعب المصري لو سمحت ماتدليش ضهرك، مش تديني أنا ضهرك ، إنت بتدي ضهرك لمصر، للدولة ديت، ماتديش ضهرك لمصر، مش ليا، أنا ماتدش ضهري ليها، واللي انا بعمله ده مابديش ضهري ليها، كان ممكن نأجل الكلام ده لفترة تانية ويبقى بقى اللي بعد مننا يعني، ربنا يعينه، لكن إحنا قلنا لا.. إحنا أنا هاتحاسب قدام ربنا على كل كلمة بعملها.

قالولي ماتتكلمش في الموضوع ده وسيب الحكومة القديمة المهندس شريف يشيلها بقى ومع التغيير.. ده كلام مايصحش، كلام مايصحش إن إحنا نعمل كدة، أنا مبعملش كدة، أنا بتصدى لحاجتي، بتصدى لمشكلتي، ده التحدي وأنا أقفله، وانا مسؤول عنه، مش إن أنا أشيلها لزميل ليا عشان، لا لا لا لا، ده كلام لا يليق.

طب والـ.. يبقولك بقى ييجي الـ.. المهندس مصطفى على جديده.. جديده إيه؟ (يبتسم) صحيح.. لا.. لأ.

فنرجع بس تاني، مصر بتقدم 330 مليار جنيه دعم، وده مش داخل فيه حاجات كتير زي اللي أنا بقول عليها كدة، إحنا بنستلف 150 مليار جنيه لمرتبات الناس كل سنة، وأنا بكرر الكلام وبعيده كتير لأن إحنا محتاجين لكل اللي موجودين معانا هنا واللي بيسمعوني هنا جوة مصر وبرة مصر، جوة القاعة وبرة القاعة، يعرف ويعيش المشكلة اللي إحنا بنتكلم عليها، يعيشها عشان نتغلب عليها، وبالمناسبة، والله، التغلب عليها أسهل ما يكون بشرط، إن إحنا كلنا، كلنا، نتحمل. إنما لو قلنا لا أنا مش قادر ومش مستحمل، طب إيه، هانعمل إيه، قولولي أعمل إيه؟

فحد.. كنت قاعد مع مجموعة كدة، قلتلهم تفتكروا الدولة بتدي لأي مواطن وأسرة كام في الشهر؟ وأنا بقول عشان كل الإعلاميين بقالهم فترة بيحطوا في الجرايد وبيحطوا في التلفزيون وحتى في الراديو بيقولو بيانات، لكن أنا لما سألني السؤال ده أو سألت السؤال ده، مالقتوش عنده إجابة، قالي الرقم، يعني رقم كبير في الدعم وخلاص، قلتله لا قول للمواطن اللي هو سأل عليه الزميل وقاله قولي اللي معهوش يعمل إيه؟ تفتكروا كام، مصر، مش أي حد، لا حكومة ولا رئيس بيقدمه، مصر بتقدم إيه رغم ظروفها الصعبة دي، لكل مواطن لكل أسرة، من 6.. يعني.. زوج وزوجة و4 أو زوج وزوج و2.. هاقولكوا أنا، ولو سمحتم.. ماتنسوش..

كل مواطن من اللي ليه بطاقة تموين، بياخد آآ ب 3 جنيه خبز دعم، في اليوم (يرفع سبابته) كل يوم، المواطن الواحد ده، بياخد ب3 جنيه خبز دعم.. يعني لو أسرة فيها 4 بياخدوا 12 جنيه، ولو أسرة 6 بياخدوا 18 جنيه، ولو أكتر من كدة، انتوا بقى احسبوا الباقي.. طب في الشهر يعني كام، يعني تقريبا من 400 ل 500 جنيه، ده أي مواطن يعني مش ده الموظف، ومش ده، ده أي مواطن بينزل يشتري الخبز اللي بتكلم عليه ده بياخد الرقم ده، ولو وزير التموين ليه اعتراض على اللي أنا بقول عليه ده يقولي، يقولي آه لأ في في اعتراض.. يقولي.. يقووولي!

أنا بس بقولكوا بجد، ده كل مواطن، ده في ناس يقولك إحنا مابنشتروش، بس أنا مابحسبوش إنك إنت مابتشترهوش، مش محسوب، محسوب إنه بيقدم لغاية لما نعمل منظومة متكاملة لقواعد بيانات حقيقية قادرة على إن هي توصل لكل مواطن في مصر هاقدر أقول اللي مابياخدش واللي بياخد.. ده في الـ.. ده في الخبز.

في أنبوبة البوتاجاز، الأسرة لو خدت أنبوبة في الشهر، مصر بتديها 260 جنيه في الشهر.. مصر بتديها 260 جنيه في الشهر.. أرجو إن إحنا البيانات والأرقام اللي أنا بقولها دي، بالبساطة اللي انا بتكلم فيها دي، حطوها في الاعتبار.

طيب.. في حاجة كمان بتتقدم؟ أيوة.. بطاقة التموين.. الـ4 بياخدوا 200 جنيه، واللي أكتر من كدة زود 25 جنيه لكل مواطن، أول 4 في البطاقة بياخدوا 200 جنيه، 50، 50، 50 ،50، اللي بعد كدة بياخد 25 جنيه.. يعني الخامس والسادس والسابع والتامن حط 25 جنيه لكل مواطن، يعني كام؟ يعني تقريبا الدولة بتدي 1000 جنيه كل شهر لأيّ أسرة، لأي أسرة..

طبعا الناس اللي يعني ظروفها المادية متيسرة مش هانتكلم معاهم في الحكاية ديت.. أكمل بقى الكلام اللي قاله الدكتور شاكر النهاردة.. كيلو الكهربا بيكلفنا 140 قرش، ماشي يا دكتور؟ أنا لا لا لا لا، لو سمحتوا، أنا دايما مع المصريين بقول رقم مايتنسيش، لا أقوله 137 ونص.. أنا بقول 140 قرش.. ال 140قرش دول، الشرايح الأولانية منهم، ال50 كيلو، وال100 مش كدة؟ وال150، تقريبا يعني الـ50 كيلو لو واحد بياخد 50 كيلو، يعني غرفة واحدة فيها لمبة مثلا وتلاجة صغيرة كدهو، وخد 50 كيلو، يكلف مصر 70 جنيه، يكلف مصر كام؟ 70 جنيه.

الله، حد يقولي يعني إنت بقى دلوقتي جايبنا نفطر معاك، عشان تسمعنا الكلام ده؟ (يبتسم ثم ينظر نظرة جادة) طب والله العظيم أنا عايش في الكلام ده بقالي أكتر من 30 سنة، عايش فيه، بحلم ليها، نفسي أشوفها دولة فتية قوية وسبب إيه عجزها، مش بس أداء حكومة ولا، لا والله، هي مجموعة حاجات مع بعضها.

أرجع تاني، يبقى المواطن اللي هو عنده الغرفة دي، اللي عنده تليفزيون صغير ولمبة ولا حاجة، وخد 50 كيلو، دول تمنهم 70 جنيه، أنا باخد منه كام؟ 12 جنيه (يبتسم) كام؟ 12 جنيه، طب اللي بياخد 100، بيبقى بياخد 140 جنيه، هاخد منه كام؟ طب اللي بياخد 200؟ اللي بياخد 1000؟ في جميع الأحوال لأي مستوى انا بتكلم عليه لسه ماخدناش تمن الخدمة، مش كدة يا دكتور، يعني الناس اللي أهلنا واللي موجودين في الأحياء اللي عندها سور وعنده خمس ست غرف وعنده كام تكييف، وعنده.. حتى الآن؟ حتى الآن آه، حتى الآن..

فـ، أنا ماتكلمتش مثلا على الوقود.. أنا هقول متوسط للوقود، 80، 90، آآ 95، سولار، متوسطاته، من 8 لـ 8.5 عشان ماتـ إيه ما تحتاروش في تكلفته، حتى الـ95؟ حتى الـ95. مش كدة ولا إيه؟ يعني..

هي دي الحكاية.. مافيش حد يقدر يبيع كدة.. ويبني بلد بالطريقة دي، والبلد تنجح وتستمر، خلي بالكم، أنا دايما بقول لزمايلنا في الحكومة إحنا عندنا في حاجة اسمها الدعم الافقي، الدعم الافقي اللي انا بتكلم عليه ده ان النهاردة انا بدعم 10 مليون، بعد كام سنة بيبقوا 15، بعد كام سنة بيبقوا 20، 30، 40، 50، 80، 100 فإنت مش معقول النهاردة حد هاينزل يجيب ياخد بطاقته نقوله لا ما تاخدش عشان احنا عاملين حسابنا ان احنا ندي تموين فقد ل50 مليون مصري، لا ما بيحصلش، وبالتالي بينمو، والدعم اللي احنا بنقدمه او اللي بتقدمه الدولة المصرية، آآ لـ لل، وده عبء على الدولة، عبء كبير قوي.

إحنا اتكلمنا في حاجات كتير، ولو لقيتوا إن إحنا خلال الفترات اللي فاتت في مؤتمرات الشباب و، و... في اللقاءات اللي إحنا كنا بنتكلم فيها كنا دايما انا ببقى حاطط قدام مني التحدي ده، هو ده التحدي اللي احنا، اللي انا في تقديري، يعني عايز اعمل تعليم كويس، لازم في الاخر برضه اقدر اصرف عليه كويس، عايز اعمل علاج طبي كويس، لازم يكون عندي قدرة مالية كويسة، وانا قلتلكوا مرة قبل كدة، دولة فيها 100 مليون، إوعى تقولي إن هي موازنتها تبقى 2 ترليون 3 ترليون 5 ترليون 10 ترليون جنيه، أنا بكلمكم، بكلمكم ولو سمحتم يعني المصريين أذكيا جدا، خدوا الكلام واقعدوا فتشوا فيه كتير، لأن ده يمس وطن احنا عايشين فيه ومستقبل لأبناء إحنا مسؤولين عنهم، وأحفاد احنا عايزين نقولهم لا احنا مش هانضيعكوا معانا، مش هانضيعكوا معانا.

ف.. إزاي يعني، قولولي اعمل ايه؟ قولولي اعمل ايه؟ أنا بقعد مع ناس كتير جدا جدا عشان اقولهم نعمل ايه؟ وببقى مستعد اسمع منهم، بس صدقوني، أنا ما بجدش، ما بجدش حد عنده حل (ينظر لرئيس الوزراء).. مش كدة؟ ماحدش عنده حل.. وساعات أسمع كلام يعني مترتب شكله كويس صحيح.. وخلاص.. لكن قولولي على مسار تنفيذي كنت فين في مقالة من كام يوم في الجرنان بيقول يعني مايصحش وزارة النقل والسكة الحديد تخلي في تكييف للقطر، لعربية قطر، والناس الفقرا مايركبوش، أو يركبوا قطر مافيش فيه تكييف، صحيح، بس قولولي إزاي؟

عشان كدة الكلمة مهمة، والوعي المجتمعي مهم، عشان انا قلت الكلام ده قبل كدة وقلتلكم لما يتم توصيف ما نحن فيه بشكل مش.. مش حقيقي، لما ألاقي.. أنا مش عايز أتكلم عن شرايح معينة آآ عشان بس يعني خلينا، خلينا كدة كأمة مع بعضها يعني. لكن.. معقول إن إحنا يبقى ده فهمنا؟ وده اللي إحنا بعد كل السنين دي ويعد كل اللي حصل ده هو ده اللي احنا بنقدر نقدمه للناس ونقولهم دي، ده جوهر مشكلة مصر؟ حد يقولي ده، طب انت بس اللي، عايزين نحاسب عالفساد شوية، حاضر. أكتر حاجة بنقدر نعملها في الموضوع ده ان احنا  يعني اطلاق إيد المؤسسات الرقابية ومابنهزرش، ماقدرش، ماقدرش أقبل إن أنا يبقى في حد بيتجاوز وأسيبه، وده كلام بردو مش لل، يعني مش هنا عشان إحنا قاعدين مع بعض كدة، بس الموضوع مش إرادة حكومة ورئيس وأجهزة رقابية بس، لا دي المجتمع كمان، يعني المجتمع يساعد ان احنا آآآ يساعدنا.

فإحنا ان شاء الله، ماشيلناش المهندس شريف القضية وقولناله هانخلص الموضوع إحنا، أو خلصه إنت وربنا يوفقك، لا طبعا، إحنا كلنا مع بعض، إحنا كلنا مع بعض في الدولة ديت، وانا مافيش حاجة هاتتعمل في مصر أنا مش مسؤول عنها، وأنا مابستخباش. أنا بواجه مشكلتي وإن كنتم معايا يبقى كتر خيركم.

حاجة تانية انا ده اللي انا شايفه، إن كان في حد تاني يقدر يشوف حاجة تانية ويقدر يحل المسألة بشكل أكتر، أنا أول واحد هاصقفله وأقوله اتفضل، انا بكلمكم بصراحة، بكلمكم بصراحة.

شوفوا.. ماحدش يعبث بمستقبل وأمن بلد فيها 100 مليون، كل واحد فينا يخلي باله من كلمته اللي بيتكلم فيها وبيقولها لنفسه وبيقولها لأولاده في البيت عشان يشكل وعي لدى أسرته ويشكل وعي لدى الناس اللي بيتحدث معهم في كل احاديثنا الخاصة اللي قاعدينها مع بعض تناولوا المواضيع اللي انا بتكلم فيها دي لأن هي دي مشكلة بلدنا، مشكلة بلدنا هو اللي انا بتتكلم فيه ده. إن إحنا بنستلف 330 مليار فقط لصالح الدعم، واحنا لا بنقدر ندفع اللي بنسدده، ولا بنقدر ندفع الفوايد بتاعته، ولا ايه؟ لا صحيح؟

انا عايز اخلي المهندس شريف هو اللي يتكلم في الموضوع ده عشان تشوفوا قد ايه الحكومة، تشوفوا قد ايه الحكومة تعبت واتعذبت في الكام سنة اللي فاتوا، اوعوا تكونوا فاكرين المواطن المسؤول الحكومي اللي بيكون موجود ده بيقضي وقت جميل، لا والله، بيُعَذَّب، بيـ إيه؟ بيعذب، صدقوني أنا، لأنه عايز ينجز مهمة صعبة مش حاجة تانية، وفي نفس الوقت الناس كلها بتشد فيه هو تقوله يلا عايزين، انت مش قادر، مش، مش، مش كفء، مش آآ وده مش حلو.

وبالمناسبة الكلام اللي انا بقول عليه ده عمره مش 20 سنة ومش 30 سنة.. وانا بتكلم كدة لأن أنا ماحبش أزايد، وماحبش أقول كلام مش أمين، لأ، ده الكلام ده عمره 30 و40 و50 سنة! كان صغير، وكبر وتفاعل، واحنا لم نتصدى ليه كما ينبغي أن يتم التصدي ليه.

أنا.. عارف ان احنا داخلين على عيد كل سنة وانتوا طيبين وعيد سعيد عليكوا ان شاء الله، لكن كان لابد ان انا اتكلم معاكوا في الموضوع دوت واواقول لكل مصري ومصرية الأمر اللي انا بتكلم فيه ده على قد ما في ناس كتير تعتبره صعب، لكن قسما بالله، هو أسهل مما تتصوروا التغلب عليه عندما نتحمله (يرفع سبابته) عندما ايه؟ نتحمله.

اما ان احنا مانتحملوش هو او غيره ونقول لا لا لا ده مش هاينفع معانا، يبقى خلاص، يبقى أي مسار، والكلام ده اتعمل 77، ولو كان نجح ساعتها ماكناش ابدا وصلنا للحال اللي احنا موجودين فيه ده.

أنا بس حبيت ان انا أطمن لدكتور مصطفى وهو داخل عالوزارة الجديدة بكلمتين كويسين واطمنه (يبتسم) واقوله يعني الحكاية ماشية ازاي.. فـ.. يعني إحنا لما جينا في في محاولة تخفيف تخفيف اثار ما نحن فيه على المواطنين، انا بقولكم وانا مسؤول عن الكلمة دي، لا يقل عن 3 مليون مواطن بيشتغلوا النهاردة بقالهم على الأقل الـ4 سنين، على الاقل الـ4 سنين، دول ماكانش هانقدر نوصلهم لا بدعم آه لأن الدعم اللي احنا بنقدمه اللي احنا شايفينه ده، طب أنا عايز ادي للأسرة أكتر من كدة عايز اديله 1500 جنيه مع المبلغ ده عشان يقدر يعيش، عايز اديله 100 جنيه كل شهر، كل يوم، أنا بقولكوا وانا مسؤول عن الكلمة ديت، في 3 مليون مواطن شغالين آآ في البلد في الدولة المصرية يغيروا شكلها، يغيروا مضمونها، يجهزوها لبكرة للمستقبل، ثم كمان هم يقدروا يعني في نهاية اليوم يجد حاجة يرجع بيها.

أرجو إن، يعني، لما نقول ان احنا المعاشات على سبيل المثال، كان ليها رقم قبل الثورة، ودلوقتي إحنا داخلين في 800؟ لا انا بتكلم عالرقم للمعاش الواحد.. 750، أنا عارف..

فـ.. يعني.. أنا هاقولكوا على رقم كدة للمعاشات في 2023؟ 2023.. 2023.. هايعدي الـ300 مليار جنيه، وزير المالية موجود يرد عليا لو كنت الرقم مش مظبوط، مش كدة يا فندم؟ كام؟ هايتجاوز 300 مليار جنيه..

أنا بس بقولكوا الكلام دوت عشان، اتفضل يا فندم، عشان تبقى الأمور واضحة، انت بيتم دعم او بيتم رفع قيمة المعاش لكن حضرتك مش متصور ان قيمة المعاش ده بتتراكم لأنها في النهاية بردو كل اللي بتكلم فيه ده عبارة عن اقتراض، اقتراض؟ اه طبعا، خدمة الدين السنة دي 514؟ 540 مليار جنيه.. الخدمة دي عبارة عن إيه؟ اللي هي الفوايد المستحقة بس، مش كدة؟ يعني انا مش هاقدر أكسر من قيمة الدين العام أو الدين اللي على الحكومة او الدولة المصرية آآ وأقول مثلا هاينقص 5% السنة دي و5% السنة اللي بعدها، لأ.. ده خدمة الدين ال540 ومش هاندفعهم، مش هاندفع ال.. ال.. الأقساط لتقليل هذا الدين، هانعيش ازاي؟ هاتدوا أولادكم إيه، وأحفادكم إيه؟ إذا كان كل الناس هاتقولي لأ انا ما... إحنا مالناش دعوة وإحنا مش قادرين دلوقتي، لا لا.

يعني انا بكلموا بمنتهى الصراحة، وبمنتهى منتهى الوضوح والمكاشفة معاكوا كأسرة مصرية، الأب بييجي يقول لأولاده وأهله أنا هاقدر على دي ومش هاقدر على دي، وهم بيتفهموا ده إذا كانوا عايزين الأسرة دايما تبقى مستورة، وتبقى يعني محفوظة، وماتضيعش، بيتحملوا معاه، أما لو قالوله لا بقى إحنا مش مستحملين وانت لم تحسم الأمر ومش هانكمل معاك على كدة، بتضيع الأسرة، بتضيع الأسرة. 

وإنتوا شوفتوا سنين،، كانت ممكن هاتضيع فيها مصر، ربنا سبحانه وتعالى حفظ البلد دي مرتين، في 2011، وفي 2013، و.. يارب لك الحمد والشكر على ذلك، لكن أكتر من كدة.. لا.. تؤ، معلش انا اسف ان انا جد قوي كدة، بس انا زي ماقلتكوا في بداية الكلام، والله ماعندي غير الكلام ده، وعايش فيه ليل ونهار، إحنا قادرين، وقادرين ان احنا نحط ايدينا في ايدين بعض وساعة لما قال ان احنا ماعندناش حد ليه ظروف صعبة كان المقصود بيها ان التكافل اللي موجود في المجتمع المصري، كل المجتمع المصري في الشهر الفضيل اللي احنا موجودين فيه ده قادر على ان هو يعني مايخلش حد محووج في شهر رمضان او حتى في غير رمضان والجمعيات بتعمل كدة، والدولة بتحاول تعمل كدة.

لكن بردو عشان أختم كلامي بقى و.. ويبقى كفاية كدة، إحنا معدلات الزيادة السكانية في مصر، ده موضوع بقى بسيط، ده موضوع بتاع الـ.. كل اسرة يعني، وتستطيع الاسر الجديدة او الحديثة انها تفكر كويس قوي ان هو يبقى طفل الأول، وبعدين تلت أربع سنين ويبقى في طفل تاني، ومش معقول ان احنا نجيب إنسان مسؤولين عنه ونعمل كدة.

كل سنة وانتوا طيبين، الكلام اللي انا بقوله ده مسؤولية كــــــل اللي سمعوه.. الاعلاميين المفكرين المثقفين.. آآ رجال الأعمال آآ، المسؤولين في الحكومة، يعني القديم والجديد اللي في الحكومة حتى اللي في الحكومات السابقة انت مسؤول انك انت من خلال معرفتك انك انت تقعد تتكلم عن ده.

هل النهاردة لو في مواطن عليه ضرايب وعارف ان احنا في الأزمة الكبيرة ديت اللي احنا بنعيشها آآ يأجل دفع ضرايبه يوم؟ أنا مابقولكش ساهم معانا بـ.. حاجة.. لأ.. بس بقولك التزاماتك اللي عليك من فضلك لأنك انت بالمناسبة لما تدفع الالتزامات هاتساعدنا في ان البلد دي تستقر وبالتالي هايفضل شغلك مستمر وتقدر تنمو فيها.

فـ.. انا مش عايز اقول اتكلم اكتر من كدة لكن عايز اقولكم يعني، ولا ايه؟ يعني أرجو إن، لو أنا النهاردة خدت ضرايب مستحقة على، على ملاءة ضريبية متنازع عليها، مش كدة يا دكتور؟ ملاءة مالية ضريبية متنازع عليها، رقم كبييييير قوي، لو كل كل الناس اللي شغالة في المجال والناس اللي بتدفع للمجال حطت الارقام ديت هاتسهل علينا، لأن أنا بضطر أستلفها فبدل ما استلف اخد مستحقات لأن لو انت اديتني المستحقات دي كمان خمس سنين انا هاستلف 5 سنين فانت أذيت نفسك واذيتنا واذيت مصر.

طولت علكيوا كل سنة وانتوا طيبين وعيد سعيد عليكوا وأنا برحب بأسر الشهدا وإن  شاء الله نلتقي في أول يوم العيد عشان نشكركم وعشان نرحب بيكوا، كل سنة وانتوا طيبين، شكرا جزيلًا


ألقى السيسي هذه الكلمة خلال حفل إفطار الأسرة المصرية الذي أقيم في أحد فنادق القاهرة وحضره رئيس الوزراء مصطفى مدبولي ورئيس الوزراء السابق شريف إسماعيل إضافة إلى العديد من كبار رجال الدولة والإعلامين ورؤساء الأحزاب وأبطال مصر من الرياضيين وشيوخ القبائل المصرية ومجموعة من أسر ضحايا القوات المسلحة والشرطة.