- صفحة المتحدث الرسمي لرئاسة الجمهورية

كلمة السيسي خلال تفقده الأعمال الإنشائية لتطوير عدد من الطرق والمحاور 14/10/2022

منشور الأحد 23 أكتوبر 2022

 

 

 

مهندس 1: سيادتك الكوبري طوله 900 متر. الكوبري ها يربط سيادتك الوصلة اللي هي من محور ياسر رزق سيادتك لكوبري اللي هو صلاح الشاذلي. الكوبري سيادتك طوله 700 متر. الكوبري ارتفاعه عالي جدًا يا فندم، ارتفاعه في المنطقة ديت 45 متر.

السيسي: ده ها يعمل نقلة كبيرة جدًا.

مهندس 1: يا فندم ده ها يعمل محور طوله 25 كيلو، واصل من النيل، عند نهر النيل، مارًا بمنطقة الحضارات، لغاية يعدي منطقة المقطم بالكامل..

السيسي: رايح جاي طبعًا.

مهندس 1: رايح جاي يا فندم، 5 حارة لكل اتجاه. بيوصل لغاية جمال محمد علي، محور جمال محمد علي يا فندم. ده كله يا فندم بعد كدا..

السيسي: كدا إنتو عاملين منسوب الميل معقول، مش كدا؟

مهندس 1: الميل يا فندم منسوب معقول، وها يخلص في وقت..

السيسي: آه عشان مايبقاش حاد قوي.

مهندس 1: لا مش ها يبقى حاد يا فندم.

السيسي: مش كدا؟

مهندس 1: ها يبقى الميل معقول يا فندم، طبقا للكود يعني مش ها يعدي الكود وها يبقى أقل منه كمان. ال، ال، ها يخلص يا فندم إن شاء الله، كان المفروض يعني على التصميم بتاع الأولاني اللي هو الطبيعي، ها ياخد سنة و3 شهور. إحنا بإذن الله ممكن إن شاء الله يا فندم نخلص شهر 7 الجاي 23 بإذن الله.

السيسي: إن شاء الله.

مهندس 1: سيادتك لو كنا ها نشتغل بالنظام التقليدي، يعني ماكانش ها يخلص قبل سنة ونص.

السيسي: هممم.

مهندس 1: آآ فسيادتك إحنا درسنا كذا حل عشان نشتغل بيهم في وقت واحد. سيادتك الارتفاع اللي هو أكتر من 45 متر، ها نشتغل أعمدة بنظام الهولوكور، الأعمدة اللي هي مفرغة سيادتك ارتفاع العمود ها يبقى 45 متر، بس هو طبعا صعب جدًا في تنفيذه لأن الشدة بتبقى 45 متر مع بعضها، وبيبقى الحائط بتاعه  متر بس، فهو بيوفر كتير جدًا في الخرسانة، وبيسرع في الوقت شوية.

الأعمدة اللي أقل من كدا ها ننفذها بالنظام العادي. الكمر سيادتك اللي بيتعمل هاعمله بردو بأسلوبين إنشائيين: نظام البريستريسد، ونظام البريكاست.

...

مهندس 2: بانتهاء المحور ده يا فندم ها نكون ربطنا المنطقة بتاعة كورنيش النيل عبر محور الدكتور صلاح الشاذلي منها إلى محور ياسر رزق، بين منطقة شرق القاهرة ومنطقة جنوب القاهرة والمقطم.

السيسي: يعني إحنا هنا واقفين دلوقتي..

مهندس 2: هنا يا فندم إحنا واقفين، ده متحف الحضارات..

السيسي: ماشي، وده اللي إحنا عايزين نبينه..

مهندس 2: تمام.

السيسي: في ال، الفكرة هنا اللي هاتتعمل، الكوبري اللي إحنا بنتكلم على ارتفاعه 45 متر، اللي هو منسوب الجبل ده لغاية الأرض تحت، اللي هي المعدات اللي شغالة تحت مننا دلوقتي..

مهندس 2: بالظبط يا فندم.

السيسي: عشان تربط مع ال..

مهندس 2: عشان تربط يا فندم مع كوبري صلاح الشاذلي اللي في اليمين ده يا فندم..

السيسي: مش كدا؟

مهندس 2: ومنه لكورنيش النيل، وها يبقى عندنا الكوبري..

السيسي: الهدف هو نقل، عمل نقلة كبيرة جدا..

مهندس 2: نقل الحركة المرورية..

السيسي: بشكل غير مسبوق.

مهندس 2: بالظبط يا فندم.

السيسي: مش كدا؟

مهندس 2: بالظبط.

السيسي: لأن الناس ممكن تطلع من، من قدام القلعة وتطلع سلام سالم..

مهندس 2: ممكن نطلع يا فندم من صلاح سالم، يا نطلع شرق القاهرة، أو نيجي لمنطقة كورنيش النيل هنا، تمام، ونطلع بردو يا إما للمقطم، ومنها لشرق القاهرة، وكدا خففنا الضغط على الطريق الدايري، وده بيعتبر استكمال للخطة اللي سيادتك أمرت ووجهت بتطوير عدد من الطرق والمحاور فيها. أول محور فيهم يا فندم هو محور ياسر رزق، وده يا فندم بيربط بين محور صلاح سالم ومحور الأوتوستراد، بربطه بمحور حسب الله الكفراوي وسميرة موسى، بطول 9 كيلو متر وبعرض 5 حارة مرورية لكل اتجاه.

كما يتم إنشاء محور سميرة موسى بطول 12 كيلو متر وعرض 5 حارة مرورية لكل اتجاه، وتم تحرير الحركة المرورية فيه يا فندم بإنشاء عدد 4 كوبري بالإضافة ل 3 أنفاق.

دي عبارة عن طريق بطول 2 كيلو متر، أولهم يا فندم  عبارة عن كوبري بطول 900 متر وعرض 27 متر بارتفاع يصل إلى 45 متر، بيتم تنفيذه بأحدث الأساليب الهندسية، وده يا فندم لربطه على محور ياسر رزق. بالإضافة إن هو تم تنفيذه بأحدث الأساليب الهندسية لتعديل المخطط الزمني. بالإضافة لطريق بطول كيلو، كيلو 100، بيصل كميات الحفر والردم فيه يا فندم إلى 800 ألف متر.

السيسي: ده اللي إحنا واقفين عليه..

مهندس 2: اللي إحنا واقفين عليه يا فندم.. بيصل كمية الحفر والردم فيه إلى 800 ألف متر مكعب. بالإضافة لكدا يا فندم بيتم تطوير طريق كورنيش المقطم بطول 7 كيلو بعرض 2 حارة مرورية لكل اتجاه في المنطقة من محور حسب الله الكفراوي حتى شارع 9.

بالإضافة لكدا يا فندم سيادتك صدقت، وشغالين دلوقتي فيه، بتطوير شارع 9 من ميدان الرسالة وحتى ربطه مع محور ياسر رزق بعرض 6 حارة مرورية لكل اتجاه، عدا المنطقة من ميدان (كلمة غير واضحة) وحتى ميدان مسجد الحمد بيبقى بعرض 5 حارة مرورية لكل اتجاه. وأي أوامر يا فندم.

السيسي: متشكرين.

...

 

4:41

 

مهندس 3: وبالدراسة يا فندم والعرض على سيادتك، سيادتك صدقت على إنشاء حائط ثاني يا فندم بطول 900 متر في قطاعات مختلفة يا فندم اللي فيها المشاكل الإنشائية للهضبة، كان يعود (كلمة غير واضحة) لسنة 2000، كان حصل تآكل للجبل يا فندم أمام سيادتك ده حد الجبل القديم، وتم معالجته في حينه يا فندم عن طريق الردم بأنواع مختلفة من التربة الغير متجانسة.

وبالتالي يا فندم بعيدًا عن تنفيذ محور ياسر رزق وجدنا إن في صعوبة في الحفاظ على سلامة الهضبة الإنشائية يا فندم حتى مع إنشاء محور كورنيش المقطم وياسر رزق، وتم يا فندم بالفعل إجراء أعمال الجسات والتصميمات، وبدأنا يا فندم التنفيذ عن طريق إنشاء حائط بارتفاع يصل من 6 ل 18 متر يا فندم، وبأساسات عميقة تصل إلى 3 صفوف من الأساسات العميقة، وسمك الحائط يا فندم ها يوصل إن شاء الله لمتر وتدعيمه لكل 6 متر يا فندم بدعامات عمودية، لضمان يا فندم أولا أعمال الردم اللي هاتم بأسلوب إنشائي سليم إن شاء الله تحافظ على أولا سلامة محور كورنيش المقطم الجاري تنفيذه، وفي نفس الوقت يا فندم عدم تأثيرها على محور ياسر رزق الجاري تنفيذه.

السيسي: أي أمطار هنا أو هنا، ما عندناش مشكلة.

مهندس 3: إن شاء الله يا فندم بإذن الله.

السيسي: ها؟

مهندس 3: بإذن الله يا فندم.

السيسي: طيب.

مهندس 3: تم دراستها يا فندم تمامًا، وإن شاء الله في بعض القطاعات ها يبقى فيها تدبيش بدون مونة عشان يبقى في فلتر للميه بعد كدا عاملين له سايد حاجة زي ميول جانبية سيادتك تجمع ميه الأمطار دي، أو بلاطات خرسانية لحماية الأجناب. بإذن الله.

وإن شاء الله يا فندم مخططين بإذن الله الطريق بالكامل إن شاء الله ها يبقى خلصان 30 / 12، عدا يا فندم  المنطقة اللي هي فيها الحائط الساند دي، طولها كيلو يا فندم، المنطقة دي إن شاء الله ها ياخد مدة تنفيذها بإذن الله 4 شهور، ولكن 30/ 12 ها يبقى فاتحين إن شاء الله على الأقل 3 حارة في الاتجاه ده يا فندم. إن شاء الله الطريق ها يبقى شغال بإذن الله.

السيسي: يعني ها نخلص إمتى؟

مهندس 3: إن شاء الله يا فندم 30 / 12 الطريق بالكامل، المنطقة دي يا فندم ها يبقى مفتوح بردو فيها الطريق، ها يبقى فيها حارتين بس سيادتك، ها يتأخروا إن شاء الله ل 30 / 1 أو 15 / 2 أقصى..

السيسي: يعني شهر كمان أو اتنين.

مهندس 3: بإذن الله يا فندم.

السيسي: متشكرين يا أحمد.

مهندس 3: متشكرين يا فندم. أوامر سيادتك.

...

 

6:48

مهندس 4: استكمالا لأعمال تطوير وإنشاء طرق ومحاور جنوب القاهرة وربطها على محاور شمال وشرق القاهرة، وصولا إلى القاهرة الجديدة والعاصمة الإدارية الجديدة. سيادتك صدقت يا فندم بإنشاء وتطوير شبكة طرق منطقة زهراء المعادي والطرق المحيطة بمحور حسب الله الكفراوي، بإجمالي أطوال 35 كيلو متر، 5 حارة مروريةلكل اتجاه، بإجمالي 10 حارة مرورية، تصل إلى 16 حركة مرورية في المناطق السكنية والخدمية لضمان استمرارية المرور وخدمة المواطنين.

المنطقة اللي سيادتك مشرفنا فيها يا فندم، تم تنفيذ طرق بإجمالي أطوال 9 كيلو متر، الطرق دي يا فندم تم حفر أكثر من 600 ألف متر مكعب في تربة صخرية، وباستخدام المعدات الميكانيكية، وتم ردم أكثر من 100 ألف متر مكعب، بـ.. بأكثر، باستخدام معايير الجودة.

سيادتك يا فندم كدا قدرنا نربط القادم من طريق الأوتوستراد، وطريق الصعيد الحر، وحلوان، بطريق العين السخنة مرورا بمحور محمد عزت عادل. وتم ربط القادم من محور الشهيد بمحور محمد عزت عادل، ومنه إلى كورنيش النيل، ومناطق جنوب القاهرة. وتم ربط القادم من المقطم ومحور ياسر رزق والقادم من المنيب بطريق العين السخنة.

وبكدا يا فندم تم إنشاء مجموعة من الطرق موازية للطريق الدائري لتوفير، لتخفيف العبء المروري على الطريق الدائري، خاصة يا فندم إنه بيتم مشروع الأوتوبيس الترددي. وبكدا يا فندم نقدر نوفر استهلاك المحروقات والتوفير في زمن الرحلة.

وتم يا فندم التنسيق مع الجهات المعنية لإنشاء وتطوير البنية التحتية، وبالفعل يا فندم تم تطوير وإنشاء البنية التحتية من مياه وغاز وصرف وكهربا..

السيسي: قبل ما تعملوا.. قبل ما تقفلوا يعني..

مهندس 4: قبل ما نقفل الطرق يا فندم.

السيسي: طيب، كويس.

مهندس 4: لخدمة المواطنين وتحقيق أقصى استفادة من أعمال الإنشاء والتطوير. وزي ما سيادتك أمرت يا فندم، تم قطع طريق العين السخنة، وتم عمل التحويلات المرورية اللازمة لضمان سيولة الحركة المرورية..

السيسي: شغالين في النفق معاه..

مهندس 4: شغالين في النفق يا فندم، وجاري الأعمال الإنشائية في النفق يا فندم.

السيسي: وهايخلص إمتى؟

مهندس 4: إن شاء الله زي ما وعدنا سيادتك يا فندم، إن شاء الله شهر 2 يا فندم. خلال شـ..

السيسي: طب أنا بس بودي هنا أوضح حاجة مهمة قوي..

مهندس 4: اتفضل يا فندم.

السيسي: إحنا بنقول إيه، بنقول إحنا بنعمل محاور موازية للطريق الدائري، مش كدا؟

مهندس 4: تمام يا فندم.

السيسي: وبنعمل في نفس الوقت في كل كتلة سكانية موجودة شبكة طرق تخدم على سكانها.

مهندس 4: تمام يا فندم.

السيسي: بحيث النهار ده بدل ما أنا، لو أنا موجود، يعني، ال.. ساكن في منطقة آآ..

مهندس 4: زهراء المعادي..

السيسي: محمد عزت عادل، أو زهراء المعادي، وأبقى محتاج أروح لغاية الدايري عشان أتحرك عليه.. لا ده أنا عندي طريق موازي أهو..

مهندس 4: محور يا فندم.

السيسي: محور أتحرك عليه بسهولة جدًا جدًا. أنا عندي ملحوظة شوفتها..

مهندس 4: اتفضل.

السيسي: الدواير المرور بتاعتكو ديت.

مهندس 4: تمام يا فندم.

السيسي: في الحقيقة شايفكم مبالغين فيها قوي، في اتساعها.. أنا أقصد أقول، كانت ملحوظة بالنسبالي إن اللي متحركين بينحرفوا شديدا جدا في، عشان يتحركوا داخل الدواير دي..

مهندس 4: تمام، إحنا بنضمن يا فندم إن القادم يقدر ياخد سرعته لدخول ال، ال، الدوران.

السيسي: طيب، طيب.. إيه تاني عندك؟

مهندس 4: دي القطاعات الإنشائية بعد التطوير يا فندم.

السيسي: طيب.

مهندس 4: 5 حارة مرورية، والمناطق سيادتك 16 حارة مرورية، 5 و 3 حارة خدمة، لخدمة المواطنين وضمان استمرارية الحركة المرورية على الطريق الرئيسي.

السيسي: في حاجة بردو إنتو في المنطقة هنا، أو في ال، في ال، في التصميم اللي إنتو شغالين بيه، حسيت إن إحنا ممكن نضيف حاجة؟ لو إنتو لقيتو حاجة كمصممين طرق ومنفذين للطرق ديت، في المنطقة اللي إنتو فيها، غير اللي إحنا عاملينه.. اطرحوه عليا.

مهندس 4: تمام يا فندم.

السيسي: هه؟

مهندس 4: هاتتم الدراسة والعرض على سيادتك يا فندم.

السيسي: متشكرين يا محمود.

مهندس 4: أوامر يا فندم.

السيسي: شكرا.

...

ألقيت الكلمة في القاهرة أثناء تفقد الرئيس الأعمال الإنشائية لتطوير عدد من الطرق والمحاور بالقاهرة الكبرى، كمحور ياسر رزق والمحاور الداعمة بربطه بمحور الحضارات وصلا لكورنيش النيل، وأعمال تطوير منطقة المقطم وكورنيش المقطم والهضبة الوسطى، وأعمال إنشاء طرق جديدة تربط بين محور حسب الله الكفراوي والطريق الدائري ومحور الشهيد. وذلك أمام عدد من المهندسين المشرفين على المشاريع والأعمال الإنشائية.

...

خدمة الخطابات الكاملة للسيسي تجدونها في هذا الرابط