نص كلمة السيسى بتاريخ 24 فبراير 2016

بسم الله الرحمن الرحيم

كل سنة وانتم طيبين واسمحوا لى انى انا اوجه لكم ومن خلالكم لكل الشعب المصرى التحية والتقدير والاحترام

الحقيقة انا النهاردة هتكلم معاكم زى ما كل مرة بتكلم …. ايه …. ايه … بكل صدق دايما بكل اخلاص بكل امانة بكل علم وارجو ان احنا نحط تحت كلمة بكل علم دى خط كويس

انا بكلم كل المصريين وخاصة الفئات اللى هى … يعنى … مش المثقفين ومش المفكرين لأن انا بقول لو كل المصريين تفهموا اللى انا بقوله هيبقى الأمر دة … ايه .. بسيط وسهل على الباقى يعنى

خلينى اقول لكم ان احنا اول ما قلنا ان احنا الهدف بتاعنا هو الحفاظ على الدولة المصرية 

الدولة غايتها القومية هى بقاء الدولة، بقاء الدولة، الحفاظ على الدولة دة معناه ايه، معناه ان الدولة المصرية خلال الفترة اللى فاتت او السنوات اللى فاتت كانت معرضة لتهديد حقيقى ومازالت 

وانا فى البرلمان قلت كلام واضح، قلت يا ترى اللى كانوا هم يتمنوا، مش يتمنوا بس، بيعملوا من أجل ان يكون مصير مصر كمصير الآخرين قائم ولا انتهى؟ اذا كان انتهى يبقى خير، لكن هو مانتهاش، مازال العمل بيتم والجهود ببتذل والتأمر بيتنفذ عشان تسقط مصر

شوفوا كل التحديات اللى احنا ممكن نتكلم عليها، كل المخاطر اللى احنا ممكن نكون متحسبين منها، مالهاش اى قيمة، مالهاش اى قيمة غير ان وحدة المصريين اللى بيتم دلوقتى وانا بكلمكم محاولة العبث بها، محاولة العبث بها، عايزين ندخل بقة الناس تحاول تتقطع مع بعضها، مؤسسات الدولة مع بعض، فئات المجتمع مع بعض، ما احنا كل اللى اتعمل قبل كدة من ارهاب مانفعش، من صغوط مختلفة مانتفعش لا نجرب حاجات تانية، خلى بالكم لن ينتهى هذا الأمر الا بناجحنا الحقيقى اننا نتجاوزه

محاولة اسقاط مصر امر انا مابقولهوش … يعنى … لا اتحدث فيه، باستدعى خطر لاجراء استثنائ، هو توحدكم اجراء استثائى؟ 

هو ان احنا نكون كتلة واحدة دة اجراء استثنائى؟ ان احنا نحب بعض دة اجراء استثنائى؟ ان احنا نخاف على بلدنا، دة اجراء استثنائى؟ انا بقول لكم الكلام دة عشان انا موجود معانا هنا، شباب و … من المبادرة ال … بتاعة القيادة، ومن البرلمان ومن كل فئات المجتمع المصرى 

وانا بكلمكم من ضمن، وانا بكلمكم بوجه كلامى كمان لكل المصريين اللى بيسمعونى دلوقتى ودة مهم اوى انهم يسمعوه، كانت استراتجيتنا وسياستنا اللى احنا شغالين بها وهنفضل شغالين بها هى المحافظة على الدولة والبناء فى الدولة

طب تعالوا امسك واحدة واحدة من دول واكلمكم على كل اللى اتعمل خلال ٢٠ شهر، خلال ٢٠ شهر 

مش بتفاصيل كثير بس ارجو ان انتم تنتبهوا للى انا هاقوله 

كثير من الناس يقولوا البنية الاساسية للأمريكان فى ازمة سنة ١٩٢٨ عملوا التجربة دى

بس احنا لما بنخوض التجربة دى مش بنخوضها ترف، هم كان عندهم الدولة واقفة على حيلها بس عندهم ازمة اقتصادية، ماكانش عندهم ازمة فقد او نقص بنية اساسية، لكن انا عندى هنا فى مصر نقص فى البنية الاساسية بدليل لما النهاردة حجم الطرق اللى احنا بنتكلم فيه واللى انا لما بتكلم فى موضوع بقول دة بيخلص، مش ان احنا مخططين خلال ٥ ل ١٠ سنة ولا ١٠ ل ١٥ سنة انا بتكلم على حاجة خلصت، احنا بنتكلم على ٥٠٠٠ كيلو طرق طورناهم اثناء الموضوع يمكن وصلوا ل ٥ ونصف او ٦ 

الست الاف كيلو دول آخر السنة دى ان شاء الله هيكونوا خلصوا، طيب احنا عملينهم عشان … يعنى … ايه … بنحط فلوس فى البينة الاساسية عشان نشغل الناس عشان الظروف الاقتصادية ولا كمان عشان عندنا نقص حقيقى فى البنية الاساسية

هاقول كلمة ارجو ان انتم ما تتألموش منها وانا بقولها لكم، اصل انتم كمنكم كنتم عايشين جوا مصر مش واخدين بالكم ان فى نقص وفى ضعف وفى قلة، ومتصورين ان البنية الاساسية اللى موجودة دى بنية دولة، لا دى بنية دولة، وانا قلت الكلام دة قبل كدة، دول شوية طرق، بتكلم بالطريقة دى عشان نخلى بالنا، احنا بنحاول نعمل دولة حقيقية، بنحاول نعمل دولة حقيقية

انا بتكلم فى البنية الاساسية دى وهقول حاجاة برده مفردات اخرى نعرفها، انا بتكلم على ١٣٣ كوبرى فى ٢٠ شهر، ١٣٣ كوبرى فى ٢٠ شهر، ثمنهم كام، هم معمولين عشان يبقوا بنية اساسية بصرف عليها ولا عشان نسهل على الناس؟!

هو انا لما بكون بتحرك من مكان لمكان والمكان دة انا بركب فيه السيارة تاخد نصف ساعة او ساعة وانا اخفض لك المدة دى ب ٥ دقائق ولا ١٠ دقائق، انا مش ساعدتك؟! لو النهاردة اللى هو بيركب عربيته دة بيشوف مصالح ناس وبياخد منهم اجر، لما انا اخليه يمشى فى ٥ دقائق وقودة اللى بيستخدمه هو دة الوقود اللى بيستخدمه لما يمشى ساعة؟!  لا طبعا، يبقى هو هيعمل عبئ على المواطن، يقوله ادينى دة انا بعمل فى اليوم ١٠ رحلات ف ادينى تكلفة مالية تكفى ١٠ رحلات بالبلدى كدة، طيب لما يبقوا ١٥ يبقى انا رحمته ورحمت المواطن الغلبان اللى مايضطغتش عليه نتيجة ضعف البنية الاساسية اللى بتخدمه

صوتنا باقية الاجراءات الاخرى ان المواطن يبقى حاسس انه فى بلده معزز مكرم. يقدر يمشى مرتاح بشكل او بآخر

اسمعوا مصر فيها حوالى اكثر من ٧٠ الف كيلو، ٧٠ الف كيلوا موجودين على مدار تاريخها، لو حبيتهم تعملوا صيانة لهم وعملت ١٠٪ من الطرق دى يعنى ٧٠٠٠ كيلو، يعنى يخلصوا ال ٧٠ الف اللى هم ال ٧٠٠٠ كيلو دول على ١٠ سنين على بال ما الدورة بتاعة الموضوع دة تتم

اللى انا بقول عليه دة ما عاقش ولا على حساب جنيه واحد من الصيانة المخصصة او المبالغ المخصصة لصيانة الطرق

طيب انا كنت اقدر اقول للمستثمرين ان احنا عندنا بنية اساسية محترمة لحركتك وحركة الصناعة بتاعتك الى موانى التصدير والمطارات وخلافه، الا اذا كنت اكون عامل بنية اساسية محترمة

انا بقول كدة اول نقطة من نقاط السياسات بتاعتنا كانت البناء والحفاظ، انا بتكلم على البنية الاساسية، هو الطاقة اللى حضراتكم قعدتم سنين ٧ او ٨ سنين او اكثر، تقولوا الطاقة مالها، هو دة … حد يتصور احنا مش عايزين ننسى بصراحة، حد يتصور انها تخلص فى سنة؟! فى سنة!! عارفين يعنى ايه فى سنة؟ طب بكم؟ هاقول لكم بكم، ب ١٥٠ مليار جنيه، الكهرباء اللى حضرتك شفتها اتحلت مسألتها ب ١٥٠ مليار جنيه 

الطرق اللى احنا بنتكلم عليها دى مش اقل من ٥٠ مليار جنيه، زى ما بقول لكم كدة، واحنا بنعمل الطرق دى كان بيتعمل جوة المطارات والموانى، او جوة المطارات حقول طيران ب ٦٠٠ كيلو، ٦٠٠ كيلو، هتقول لى انت البيانات دى …. طبعا … طبعا … شوفوا انا عارف مصر زى ما انا شايفكم قدامى كدة، وعارف علاجها برده زى ما انا شايفكم قدامى كدة، وانا بقول الكلام دة لكل اللى بيسمعنى فى مصر، لو سمحتم ماتسمعوش كلام حد غيرى (تصفيق) 

احنا … انا بتكلم بمنتهى الجدية، ما تسمعوش كلام حد غيرى، انا راجل لا بكدب ولا بلف وادور ولا لى مصلحة غير بلدى، بلدى بس

ومش بس لى مصلحة وفاهم انا بقول ايه، فاهم انا بقول ايه، البرنامج اللى احنا عاملينه دة الهدف منه ان احنا اول مرة نعرف شبابنا قضية مصر الحقيقية من خلال برنامج مدته ٨ شهور، بنكمل دراساته بنكمل وعيه، بنكمل معرفته، لكن احنا النهادرة هنقطع مصر ولا ايه

انا مش هاسمح بكدة خلى بالكم، خلى بالكم انا مش هاسمح بكدة. ماحدش يفكر ان طولة بالى وخلقى الحسن معناه ان البلد دى تقع، قسما بالله اللى هيقرب لها لاشيله من فوق وش الأرض

انا بقول لكم كلكم، لكل مصرى بيسمعنى انتوا فاكرين الحكاية ايه، انتم عايزين … انتوا … انتوا مين؟ انتوا مين؟ هه، لا دول ٩٠ مليون وانا مسئول قدام ربنا ان انا اقف قدامه يوم القيامة اقول له خليت بالى منهم 

عايزين تخلى بالكم منهم معايا اهلا، مش عايزين لو سمحتم اسكتوا، اسكتوا

(تصفيق)

انا بكلمكم عشان …. نبقى …. مصر برقبتنا كلنا، وانا لما بقول لكم كدة مابشككش فى حد، بس خلى بالك، خلى بالك، خلى بالك انت بتتكلم مع كل المصريين، بكل ظروفهم، انت بتفقدهم معنوياتهم ليه؟ اكمل الكلام عشان يبقى سياق واحد

الكهرباء خلصت مشكلتها فى سنة، لا مش بس كدة، اتدفقت كهرباء لمصر، تخلص ٢٠١٧ أخر ٢٠١٧ بقول لكم اهه قد ٥٠٪ من الطاقة اللى اتعملت فيكى يا مصر على مدى تاريخها 

اقول تانى، مش كدة يا د. شاكر، كنتم تقعدوا تاكلم الدكتور شاكر، لما خلصت المسألة سبتوه 

(ضحك)

مشكلة الكهرباء ككهرباء مش بس ليكم انتم كمصريين تعيشوا عليها، لا دة كمان عشان الصناعة اى حد ييجى يقول انا عايز اعمل صناعة فى مصر اقول له اتفضل موجود الكهرباء اللى انت عايزها 

كان مين دة اللى هيجيلى يعمل صناعة عندى والكهرباء عندى بتقطع، قبل ما اقول ان المصريين تيحملوا ولا مايتحملوش، لا كان لازم يتعمل كدة، ودة خلاص، الحمد لله موضوع وانتهى ودلوقتى احنا فى اجراءاته اللى على الارض وبتخلص

روحوا شوفوا اللى على الارض بيتعمل، روحوا شوفوا اللى على الارض بيتعمل فى حاجة زى كدة، دة الناس بتقول فى حاجة اسمها تريد … لمصر مخصوص … اللى بيتهم فيه انجاز المهام والعمل اللى بيتم فيه.

نيجى على حاجة تانية فى البنية الاساسية الغاز، كان فى مصانع كثير، وكان عندنا نقص فى الغاز، اتجابت مصنعين للتغييز، موجودين فى مكان … مش عايز بس اقول عشان الشر واهله، صحيح احنا فى كلام لا نستطيع ان نتكلم به عشان ماحدش يضرنا بس.

المصنعين دول، ايجار المصنع فيهم بس فى اليوم ٥ مليون دولار، ٥ مليون دولار عشان نقدر نقول ان الغاز المطلوب لمصانع مصر كلها ولكل استخدامنا موجود خلاص، مش بس كدة، وكمان اللى هى تكلفة الاستيراد للغاز دة بكم، انا بقول المصنعين الصغيرين العائمين دول اللى اتعمل لهم شغل عشان يبقوا موجودين على رصيف معين ما يعنى ايجارهم الشهرى ٥ مليون الواحد عشان يوفر الغاز دة ومايبقاش فى مشكلة غاز فى مصر

الكلام دة ماخلصش فى ٣ ٤ ٥ سنين دة خلص خلاص، كنا آخر ميعاد لنا نوفمبر، كان نوفمبر اللى فات خلاص

شغالين دلوقتى فى الموانى والمطارات، فى دلوقتى ٣ موانى احنا شغالين فيهم بشكل كويس، شرق التفريعة … لما بكلمكم على مين انا بعمله، او احنا بنعمله، ما هو احنا اللى بنعمله كلنا، كلنا دة … يعنى … لأ … احنا بنحاول نشوف آخر ما تم فى عالم المجال اللى احنا بنتكلم فيه وبنحاول نعمله، احنا بنعمل مينا على ارقى مستوى، طب ياخد كم سنة، ٥ سنين ولا ١٠ سنين؟ سنتين! سنتين

فى ٩ شركات مصرية ولا ١٠ شركات شغالة، دلوقتى بتعمل كل شركة بتعمل ٥٠٠ متر عشان خلال السنتين نبقى خلصنا المينا دة ونبقى جاهزين 

فى المطارات وانا بكلمكم كدة احنا خلصنا ٣ مطارات، كل اللى بنعمله دلوقتى بنجيب العلامات الملاحية الارشاد بتاعة الطيارات عشان يبقوا الثلاث مطارارت جاهزين، كل مطار فيهم سعته، صالة الركاب بتاعته يستقبل ١،٧ مليون، الكلام دة خلص، مش الكلام دة هيخلص، دة خلص

كل اللى انا بقول عليه دة البناء البناء 

هنتكلم على حاجة تانية فى المية لأن انا لما لقيت الشباب بيقولوا … فى التحقيق بتاع الدكتورة هالة، ان الشباب قلقانين من الفقر المائى، صحيح وانا معاكم قلقان، خلى بالكم، حجم المية اللى بيتم معالجتها فى مصر ١٠ ونصف مليون متر مكعب فى اليوم، مش كدة يا دكتور، كويس، المعالجة دى ثنائية لحوالى ٨ مليون و٢،٥ تقريبا معالجة ثلاثية

احنا فى صدد عمل محطات معالجة فى خلال سنة ونصف سنتين لحجم مية قد اللى اتعمل فى ال ٢٠ ٣٠ سنة اللى فاتوا دول، مش كدة ولا ايه

اقول تانى؟ طب نصيبنا فين يا مصريين من دة، يعنى حد يقول لى نصيب المصريين من دة ايه؟ نصيب المصريين من دة هو دولة بتتبنى، دولة بتقول، بأن انا اوفر ١٠،٥ مليون متر مية فى اليوم، يعنى حوالى ٣،٥ مليار متر مكعب فى السنة، انا فى كلام ماكنتش اقدر اقوله، بس لجل انتم تبقوا عارفين ان ورا كل حكاية حكاية كبير، هاقول الكلام دة رغم انه من منظور الأمن القومى مش صح، ايه رأيكم بقة، بس هاقوله

مش فى سد بيتعمل ولا ايه، وهنتفق مع الناس على عدد سنين معينة يحجزوا مية عشان يبنوا السد دة ولا ايه؟ مش كدة؟!

طب المية دى اعوضها منين، اسيب الفلاحين من غير مية ولا ايه؟ لو سمحتم، لو سمحتم، من فضلكم اللى يتكلم فى موضوع يبقى دارسه كويس جدا جدا، واذا كان هو عايز يدرسه اكثر ومحتاج … عياز يتكلم فيه، تعالالى وانا اقول لك الحكاية ايه

(تصفيق)

تعالالى وانا اقول لك الحكاية ايه، لازم تذاكر موضوعك اللى بتتكلمه للناس فى اى مجال، حتى لو احنا قاعدين مع بعض كدة فى قاعدة خاصة، قبل ما تتكمل خلى بالك من الكلمة اللى انت بتقولها دية، الكلمة دى انت هتتحاسب عليها قدام ربنا، مش قدامى، قدام ربنا، هيقولك انت قلت كلام مش مزبوط، انت كنت ماشى عكس الاتجاه عشان مانتش عارف، بصراحة كدة، فلو سمحتم انا بس … مش عايز اتكلم اكثر من كدة، عشان اعمل … طب بقة … طب بكم بقة 

اى حاجة من اللى بقول لكم عليها اتعملت قبل كدة دى، عارف اتكلفت كم ودخلت فى تفاصيل التعاقد بتاعها، التعاقد ايه … اصل انا فاضلى، ما انا ماعنديش حاجة يعنى عشان اعمل كدة، انتم بتتكلموا على محاربة الفساد، طب انا هاقول لكم، اللى انا اتكلمت فيه دة ٤٠٠ ٥٠٠ مليار, ٤٠٠ ٥٠٠ مليار، انا متأكد ان اللى تم تخفيض فيه، مش اقل من ٢٠٠ مليار، كم 

(تصفيق) 

أوعوا تفتكروا ان انا ببالغ، اوعوا تفتكروا ان انا ببالغ، انا مستعد اقول على كل حاجة كانت معروضة بكم وتعاقدنا عليها بكم، اقول والله والله انا مستعد اقول لكم على كل حاجة من دول، كل كيلو اسفلت كان بيتكلف كم اتعرض بكم واتعمل بكم

كل الف ميجا كانت معروضة بكم واتعملت بكم، مش كدة يا دكتور

هل دة تقليل او تشكيك فى حد ابدا، محاولة مننا ان احنا نهتم ببلادنا بجد، ومحاولة مننا اننا نجرى عليها صحيح، نجرى عليها مش كلام، انا بصراحة عايز كل اللى بييجى يتكلم امسكه الوزارة معايا واشوفه هيعمل ايه، والله العظيم، نفسى كدة اللى بيتكلم دة اقول كدة تعال امسك ورينى هتعمل ايه

الكلام اللى انا بقوله دة بكرره كثير للمصريين عشان ننتبه، ننتبه، بقول العشرة مليون متر اللى احنا عاوزين نعملهم فى خلال سنة ونصف سنتين، ضرورى نعملهم، طب تكلفتهم كم، المتر طبقا للمعايير المعمول بها ٥*٧ مش كدة يا دكتور؟ كويس

يعنى ايه؟ يعنى المليون بكم يا فندم؟ كم؟ ٥ مليار، يعنى العشرة يبقوا كم يا فندم؟ ٥٠ مليار، طب احنا هنعملهم بكم يا فندم؟ نصف الرقم دة 

(تصفيق) 

انا بقول الكلام دة لكم ليه، عشان لما حد يقول لى يعنى عايزين نحارب الفساد، انا معاكم فيه صحيح، اذا كنت انا مابقبلش انى اخد من حد جنيه، يبقى هاسمح لحد ياخد جنيه؟ ازاى يعنى، انما ازاى نعملها وانا لما هاتكلم على البقاء، وانا قلت هنا الغاية القومية للدولة المصرية ان البيت يستمر، بيت مصر يستمر، مايحصلوش حاجة، فعشان يستمر كنا لازم نبنى وفى نفس الوقت نحافظ عليه

يعنى الاثنين مع بعض يحققوا الهدف

قناة السويس اللى اتعملت كان ممكن تاخد ٣ سنين ونفضل عايشين فى المود بتاع القناة ٣ سنين، اى سياسى يقول لك خليها كدة افضل، ماتخلصهاش فى سنة احسن، اه اومال ايه، عشان نفضل عايشين الحلم يعنى

احنا عملناها فى سنة عشان نقدر نعملها فى سنة، وعملناها عشان ندى الأمل للناس، وهاكمل الكلام، وبرده تكلفتها المالية، عن كل الاسعار اللى قدمت مش اقل من … اقول ايه بس … وانا لما بتكلم فى الاسعار مابقصدش بها غير استدعاء حاجة عند المصريين، عند الوزراء عند المسئولين، لو سمحت حضرتك تدخل فى التفاصيل عشان تمنع الفساد، تدخل فى التفاصيل عشان تمنع الفساد، اعرف تفاصيل كل شغلة بتتعمل عند حضرتك عشان تمنع الفساد، بس مش اكثر من كدة

ف … فى معالجة المية احنا محتاجين عشرة مليون او اكثر، او اكثر، طب ليه عايزين دة دلوقتى وخلال سنة سنة ونصف، انا كان المفروض ماقلش الكلام دة لحضراتكم لكن بقولوا عشان فى ناس بتحاول تشكك فى قدرة الدولة المصرية، وعلى ان هى قادرة على تحقيق اهدافها وامالها

فى ناس بت .. اشتغلت عشان تخلى المصريين فى حالة نفسية مش مزبوطة، فى ناس بتتكلم فى مواضيع هى مش عارفاها فاضطريت اقول لكم كدة، المفروض ماقلش الكلام دة

بس انا بصيت ان مخاطر عدم ال … التحدث فى الموضيع … اقل من البلد تضيع منى، فبقول

ماحدش بيقول بيانات لدولة كدة على الهوا، ماحدش يقول تفاصيل دولة كدة على الهوا، للناس كلها تسمعها، الناس بتقعد تضيع وقت كثير اوى وجهود كبيرة جدا عشان تجمع البيانات دى عشان تشوف انت رايح فين

دة اللى المفروض تكونوا واخدين بالكم منه يا مصريين 

يتبقى … احنا قلنا المعالجة فاضل التحلية، تحلية مياة يعنى بجيب مية بحر واحليها، يعنى هو النيل مش كفاية؟ لا مش كفاية

اذا كنتم … الشباب اللى بيتكلم على النت خايف من الفقر المائى طبعا، هل النهاردة مصر من ٥٠ سنة او ١٠٠ سنة زى دلوقتى تعدد سكانها؟ حجم المية اللى بييجى لمصر ماتغيرش كثير، حجم المية اللى بييجى لمصر ماتغيرش كثير، نتصدى للمشكلة ولا …

احنا مستهدفين حوالى ٥٠٠ الف متر مكعب من المية يوميا، ولو الأمور كانت ايه … قدرنا نوصل لأسعار مناسبة مع الشركات اللى بنتكلم عليها، ممكن نزود يبقى قد نصل للمليون

انا بتكلم كدة على بنية اساسية طب كل اللى انا بتكلم عليه دة بكم ووقت اد ايه ومين يعمله، انا عايز اقول لكم فى محطات معالجة قعدت ٨ سنين و٩ سنين تشتغل عشان تخلص وانا ماقصدش باللى انا بقوله دة تقليل او اسقاط على اى حد سابق، لكن اللى احنا بنعمله حاجة تانية محاولة لمجابهة المشاكل بتاعتنا بشكل ايه … محاولة وبنتمنى ان ربنا يوفقنا

انت بتتكلم على محطة بتعقد ٨ سنين عشان تعمل ٢٥٠ الف متر مكعب او ٥٠٠ الف متر مكعب وجاى النهاردة بتكلمنى على ١٠ مليون فى اليوم بعد سنة او سنتين، ان شاء الله هنشوف، دة كل دة انا بتكلم فى بنية اساسية

كل دة، بعمل دة عشان ارمم الواقع اللى كان موجود قبل كدة، عشان نصل ان احنا نبقى دولة حقيقية 

فى نفس الوقت احنا شغالين فى المناطق الصناعية ودة كان كلامى اللى انا بقوله للسيد وزير الصناعة وللحكومة، احنا اعدادنا وتجهيزنا لهذة المناطق عشان تبقى فرص للاستثمار سواء كان المستثمرين كبار او للصناعات الصغيرة والمتوسطة ماشية بمعدلات ايه … هقول طبيعية، ودة مش هينفع، دة مش هينفع. لابد ان احنا بسرعة نؤهل هذة المناطق فى اسرع وقت ممكن، بالمرافق وبالبينة المطلوبة لها عشان تطرح على المستثمرين اللى عايزين يعملوا صناعات جوة هذة المناطق. لو ماكناش هنعلم كدة المنطقة دى عقبال ما تشتغل تاخد لها من ٥ ل ١٠ سنة، طب الناس دى هتستنى ٥ ل ١٠ سنة؟ طب انا ما انا اعمل اللى على، كدولة واخلص بسرعة ولو قدرت اعمل اكثر من كدة اعمل عشان نقدر نحل المسألة

لما نيجى على ال ايه … الواحد ونصف مليون فدان اللى هم ال ٤ مليون، هل فى ضرورة لهم؟ عشان فى نقاش كثير عن الموضوع دة وانا اتكلمت فيه مرة واثنين قبل كدة، قلت دايما المستثمر مابيفكرش غير فى الارباح، وبالمناسبة دة طبيعى، دة حاجة مش عيب، لكن احنا كدولة مابنفكرش كدة، بنفكر ازاى ندى فرص حقيقية لمجتمعات و … اذا كنت انا بكلمكم دلوقتى واكثر من ٥٠٪ من مساحة مصر عشوائيات. اذا كان الرقم مبالغ فيه، الدكتور مصطفى يراجعنى، … هه … كم؟ … ٥٠٪ من مساحتك يا مصر عشوائيات وتتكملوا على العدالة الاجتماعية 

ناس .. مرمية كدة، ويصوروهم فى التلفزيون ويقول لك شايف مصر فين الحكومة، الدولة المصرية، بيعايرونا بفقرنا بس انا مش هاسكت، لا والله 

(تصفيق)

ولو احنا مصريين بجد مانمش غير لما نبنيها، لما حد بيوجعنى (HG of pinch) مابقاش عايز ارد عليه، ولما حد يوجعنا يا مصريين ماتردوش عليه، اشتغلوا، اشتغلوا، ابنوا، عمروا 

ابنوا وعمروا بلادكم، هو دة الرد، هو دة الرد، انما ارد عليك … ايه … دة ماينفعش

ارجع تانى للمناطق العشوائة، فى عندنا ٤٥٠٠ قرية فى مصر، منهم ٢٧ الف تابع، معاهم ٢٧ الف تابع، لو ماخدناش بالنا عشان التاريخ بيسجل كلامى اللى انا بقوله دة، لو ماتصدناش للمشكلة مزبوط، هيبقى احنا عندنا كمان ١٥ سنة ولا حاجة، ٣٥ الف قرية عشوائة، حط ال ٢٧ على ال ٤٥٠٠ بتوعك، اقول كمان مرة؟

يبقى انا النهاردة لما اطلب ان احنا يبقى لينا مساكن … سكن اجتماعى تصل ل ٦٠٠ الف وحدة فى السنة ابقى مبالغ فى، ابقى مبالغ يا دكتور، لأ، طيب هى فى القاهرة؟ لأ، كل الظهير الصحراوى بتاع الصعيد النهاردة بيتدرس دلوقتى وانا بكلمكم، لاطلاق السكن دة، عشان نوفر للناس والا هتكمل على الارض الزراعية اللى فى مصر

عشان يتعمل مبانى لهم، وبقول لهم اذا ماكنتوش تعملوا عمل متكامل، الناس مش هيبقى فى عامل جذب الناس تروح للمكان اللى انت بتعمله دة. يعنى ايه … يعنى لو احنا ماخدنا بالنا واحنا بنبنى وبنينا للناس كدة وخلاص … حاجة … مش هتروح، انا عايز ابقى جنب المدرسة وعايز ابقى جنب الطريق عشان اروح فى المكادة دة 

فاللى بيتعمل مابيتعملش سكن اجتماعى دلوقتى بلوكات مساكن شعبية، لا، احنا بنعمل ان شاء الله سكن يليق بالبنى ادميين، خلى بالكم، وهم بيعرضوا علينا الموضوع قال لك نعمل ٦٠ متر و … مش كدة، ٦٠ متر كفاية عليهم، قلت يعنى الولاد والبنات يبقوا فى اوضة واحدة، ينفع، لو سمحت، انا بكلمكم كلام حقيقى، مش انتم بتحبوا بلدكم يا مصريين وخايفيين على عرض ولادكم، طب ازاى هتعملوا دة، سايبينهم كدة؟ مانشغلتوش بهم؟ بس انشغلنا وخلاص، طب عملت ايه، طب دفعت كم، طب اديت ايه

هاقول لكم على حاجة، ما انا قلت هاتكلم كثير النهاردة، تحيا مصر، اللى عملناها من سنة ونصف، اجمالى المبلغ اللى اتجمع فيها ٤،٧ مليار منهم مليار من الجيش 

(تصفيق)

٤،٧ مليار جنيه وعايز تعالج ملايين من المصريين من الفايرس سى مش لاقيين وعايز تعمل سكن للناس فى المناطق العشوائية عشان تاخدهم منها، كلنا، دة لو كل يوم ١٠ مليون من ال ٩٠ مليون تليفون اللى موجود مع الناس، صبح على مصر بجنيه من الموبايل بتاعه  بعشرة مليون جنيه، يعنى فى الشهر ب ٣٠٠ مليون جنيه، يعنى فى السنة ب ٤ مليار جنيه، احنا بنتكلم كثير … احنا بنتكلم كثير، بس احنا صحيح عايزيين عدالة اجتماعية، انا اعمل عدالة اجتماعية ولا احنا نعمل عدالة اجتماعية؟ احنا .. احنا نعمل ايه … للناس دى ما يليق بهم

انا ان كان على، والله، هاقول تعبير صعب جدا، جدا، والله العظيم انا لو انفع اتباع لاتباع

(تصفيق)

(تصفيق بعد سكوت)

ف … ف … احنا ان شاء الله المستهدف حتى الآن ٦٥٦ الف وحدة وهيبقى دة اللى اتعمل خلال السنتين ونصف، احنا المفروض الارض هتتسلم لشركات المقاولات اقصى حاجة خلال ابريل القادم دة واحسبوا سنة من ابريل نسلم الناس المساكن دى

وبالمناسبة للى بيسمعنى كل من هيتقدم ويقدم على شقة وتنطبق عليه الشروط هاعمله شقة

(تصفيق)

خلى بالكم المية الف شقة بيتكلفوا ١٦ مليار ونصف بالشكل اللى انتم شفتوه اللى احنا افتتحناه، الشكل اللى انتم شفتوه اللى كان فيه السجادة الحمرا، اللى كان فيه السجادة الحمرا (ضحك) 

(تصفيق)

اه ما انا بقول لكم بس عشان تبقوا عارفينن، ب ١٦ مليار ونصف الميت الف شقة، يعنى لو عايز اعمل مليون يبقى عايز ١٦٠ مليار جنيه، عايز كم؟ ١٦٥ مليار جنيه، طيب، بقول تانى كل من يتقدم للحصول على شقة وتنطبق عليه الشروط، ان شاء الله هنديله حتى لو الرقم دة زاد ١٠٠ ولا ٢٠٠ الف، يعنى اكثر من ٦٥٦ يعنى ٨٠٠ ٩٠٠ يعنى ايه الحكاية، بتجيبوا الفلوس منين مش كدة؟ كويس اوى السؤال دة، لأن السؤال دة بيتسأل كثير، ولازم انتم تعرفوا كل حاجة برده

فى ناس اشقائنا فى الخليج ساعدونا كثير، ولكن واحنا … اسمحولى ان احنا نوجه لهم كل التحية والشكر

(تصفيق)

لكن صدقونى ماكانش ينفع ان احنا نستمر كدة، مايصحش، يعنى مايصحش ان احنا نبقى … يعنى هم وقفوا وقت الشدة، وقت الشدة اللى هو بعد ٣٠ يوينو كانت محطات الوقود فاضية والدنيا كلها واقفة وكان فى مشاكل كثير فهم وقفوا جنبينا كويس، وقفوا جنبينا كويس، انا بس هاقول لكم على حاجة فى التبرول اللى هو جزء او بند واحد، وارجو الناس تاخد بالها من الأرقام اللى انا بقولها وممكن تكتبوا ورا منى، ممكن تكتبوا ورا منى من باب انك تبقى عارف حكاية بلدك 

خلال السنتين ونصف دول، بالاسعار العالمية، مصر استهلكت وقود ب ٥٣٣ مليار جينه، ب ٥٣٣ مليار جنيه، بالاسعار انهين؟ الاسعار العالمية، باسعار مصر اللى هى بقة اللى هى اللى دة انتاج من عندنا احنا، جزء كبير منه، وجزء منه لشريك اجنبى معايا، الاجمالى بتاعه بدل ال ٥٣٣ اللى بتكلم عنه، لو بعت هابيع بال ٥٣٣، لكن هاحسبه عندى انا من انتاجى انا، وارجو المهندس شريف يصلح لى لو غلطت، ٣٨٤ مليار جنيه، اشقائنا فى الخليج ساهموا معانا فى الفاتورة دى ب ٥١ مليار جنيه، قاموا ب ٥١ مليار جنيه، طيب لغالة دلوقتى هم … بناخد منهم وقود … وانا بكلمكم دلوقتى بس دى تعاقدات تجارية، يعنى ايه تعاقدات تجارية، يعنى بناخد دة بالأجل، يعنى بنشترى الوقود دة بالأجل، مش منحة، ماينفعش بقة كدة، طب بقولوا لكم ليه، مش انتم تبقوا عارفين الدنيا ماشية ازاى وهنعمل فيها ايه كمان مع بعض يعنى

ف … الباقى التعاقدات اللى النهاردة ماشية واللى ممكن تمشى خلاف الفترة اللى جاية، تعاقدات بالأجل، احنا بنطلب منهم اجل فى السداد مش عايز اقول عدد السنين عشان ماحرجش حد، لكن بنطلب اجل، اجل كويس، حتى تستقر امورنا بشكل افضل من الواقع اللى احنا موجودين فيه، وحتى تنتهى الازمة الاقتصادية العاليمة وحتى تنتهى الأزمة اللى اتعملت لنا يا مصريين، هو اللى ضرب السياحة فى مصر، ضربها ليه؟ ضربها عشان انتم تخرجوا، قطاع بالكامل كان بيجيب ممكن لغاية ١٤ مليار دولار واحنا محتاجين دولار عشان نجيب به حاجات كثير لمصر، فاللى ضرب السياحة ضرب السياحة عشان نعيش اللى احنا فيه، قوم احنا نمكنهم ونقول لهم انجحوا ولا نقف، ردوا على لو سمتحم 

(الحضور: نقف)

هو الوقوف كلام ولا ايه، نقف يعنى نبقى واخدين بالنا ان دة تخطيط معمول لكم عشان ماتقوموش، انا كل دة بتكلم فى الحفاظ على الدولة الغاية القومية، فبقول بناء وبقول بقاء، هو عايز يضرب البناء عشان يأثر فى البقاء، وانا كان ممكن اوى كلنا تبقى استراتيجيتنا ان احنا نركز على الارهاب ونسيب كل الملفات دى، اصل احنا عندنا حرب، احنا ماعملناش دة، احنا مشينا كدة هنجابه الارهاب ونبنيها، وبنبنيها، وبفضل الله هنبنيها اكثر من كدة كمان 

(تصفيق)

ارجع تانى اشقائنا فى الخليج فى المبلغ دة دفعوا ٥١ مليار جنيه، يعنى حوالى ٧،٥ - ٨ مليار دولار، طيب طب احنا مادام اتكلمنا على الجزئية دى، هافكركوا تانى بالموازنة بتاعتنا وافكركوا تانى بالحصص اللى جواها واللى هيتبقى لمصر فيها، انا دايما بقول ارقام ممكن تتحفض، بقول ارقام ممكن تتحفض عشان اللى بيسمعها منى ياخد باله. لو تصورت ان انا هاقول ان الموازنة بتاعتنا ٨٥٠، ٨٥٠ بلاش الكسور، دة اللى احنا ممكن نصرفه على مصر، طب تعالوا نشوف ايه اللى لينا نقدر نصرفه بجد على مصر منهم؟

دة احنا بنتمنى انه يكون ٢٥٠ مليار جنيه عحز، مش كدة؟ مش كدة؟ 

عجز، عجز يعنى ايه يعنى سلف، بكمل ال ٨٠٠ دول ب ٢٥٠ مليار سلف ماعييش ٨٥٠ فبجيب ٢٥٠ سلف، ادى واحدة

عندى برده رقم عشان مايتنسيش، دعم ٢٥٠ مليار، دعم يعنى ايه، يعنى بقدم لحضرتك، مش … مصر بتقدم لك بقة، تخيلوا مصر الدولة دى بتعمل دة مع شعبها، بتقدم ٢٥٠ مليار جنيه على الاقل سنويا فرق اسعار لأهلها لناسها فى قطاع الطاقة والغاز والسلع والخدمات، بكم؟ انا بقول ب ٢٥٠ وحتى قلت العجز ٢٥٠ وهو اكثر من كدة بس انا حبيت اقول لكم ارقام تقدروا تبقى دايما حاضرة فى ذهنكم. وتقول طب باقى ايه، لأ لسة فى حاجة تانية، وفى ٢٥٠ مليار خدمة الدين، خدمة الدين يعنى ايه، خدمة الدين، يعنى السلف، اللى احنا … استلفته الدولة، ازاى بتدفع عليه خدمة، فوائد قروض، فوائد القرض اللى اخدته، لغاية ٢٠١١ كانت مصر ال .. حجم الدين الداخلى حوالى تريليون جنيه، الف مليار، فى الأربع سنين ونصف دول احنا قفلنا الترليون التانية يعنى بقى ٢٠٠٠ مليار، ٢٠٠ مليار خدمتهم كم؟ فبنقول دلوقتى بقول رقم مش دة الرقم الحقيقى هو اكثر من كدة، نقول ٢٥٠ مليار، يتبقى ايه للناس، يتبقى ايه لمصر، يا مصريين، انا مش بقول لكم كدة … انا حبيت اديكم، هى دى القضية

وانا لما … لما الناس التقت بى فى الحملة قلت الكلام دة وكمان انا اللى قلت الكلام دة ل … مخابرات لكل اللى التقيت بهم من المثقفين ومفكرين ومصريين، كنت بقول لهم قضيتكم، شوف انا بعمل ازاى واقف ازاى، قلت لهم اللى انا بقول لكم عليه دة، لحسن حد يتصور ان انا بقوله دلوقتى عشان انا فى موقع الرياسة لأ انا كنت بقوله فى موقع بتكلم فيه عن حال بلدنا، الحال الحقيقى لمصر، بنقوله للناس بالطريقة دية الصعبة عشان تبقى عارفة، وبالرغم من كل دة كل اللى اتقال عليه دة اتعمل واللى ان شاء الله بنكمل عليه هنعمله، طب ازاى؟ يعنى … يعنى … بس انا قلت كلمة عشان موضوع منين دى تبقى واضحة، ان دة من مصر، دة منين من مصر، ادارة الموضوع هو مصر، و لما حد بييجى يتقدم لينا بأى مساعدة احنا بنعلنها لأنه مايصحش، مايصحش مانقولهاش يعنى

ف … خلصت من موضوع الاسكان، وان ماكانشى هنقدر نتحرك كل سنة ونوفر اسكان اجتماعى مناسب للناس وكمان الحكومة تبقى قادرة على انها تكف ايدى البناء على الاراضى الزراعية والبناء العشوائى … انا فى الأول بوفر عشان يبقى وفرت للناس لكن فى المقابل المفروض لابد ان يبقى فى اجراءات قوية حقيقية والا الاراضى الزراعية بتاعتنا فى خلال سنوات مش كثير اوى هتنتهى، ولازم يبقى فى وقفة حاسمة مش من الدولة بس، من المصريين، لازم نقف ونقول يا ترى احنا بنعمل فى بلدنا ايه؟

فلازم احنا فى الاسكان الاجتماعى نبقى مستعدين ان احنا نقدم للناس كل اللى يطلبوه على مدار السنين اللى جاية وهنقدر ان شاء الله

نيجى على المليون ونصف فدان مرة تانية بتكلم فيهم وبقول ان احنا بنتكلم فى مجتمعات عمرانية مكتملة ماعندناش خيار تانى، ماعندناش خيار تانى، برده عايز اقول حاجة … انا قلت حاجة على المية، وقد يكون على الحاجة اللى على المية ارتباط بالمليون ونصف فدان … يبقى اكثر من كدة خطر جدا … خطر جدا والله 

المشروعات الصغيرة والمتوسطة اتكلمنا فيها قبل كدة واتكلم فيها الاستاذ طارق، كآلية مستقلة، وخلونى اتكلم معاكم فيها بتفصيل اكثر

الهدف اللى انا قلته لينا وللحكومة ان احنا نوفر كيانات نعملها احنا، وتبقى كأن انا بعمل لحد مشروع، المشروع دة … turn key يعنى، انا بعملهوله عشان اوفر عليه مشوار الدراسة، وال … لو انا النهاردة هاعمل عمل، هاقوم بالمشوار دة من اوله لآخره، لكن لو انا النهاردة جيت لقيت حاجة معروضة على … وانا لما اجى اعمل الف كيان صغير، زى ما كل واحد يعمل كيانه، سواء كان فى البنا او فى توفير المعدات، او … لا طبعا، انا لو عملته، هيبقى اوفر كثير والوقت بتاعه اقل كثير وهاعرضه على الناس، عشان بس الناس ماتفهمنيش غلط، معناه اللى هيتقدم بمشروع يتفضل، بس انا بقول بالاضافة لكدة لو سمحتم فكروا فى اللى انا بقول عليه دة، ان انتم تعملوا مجموعة كيانات واعدة للعمل، تقدموها للشباب، تعال خد اشتغل نساعدك وامضى على قرض، الموضوع دة كله اتكلف المبلغ الفلانى انت ابقى سدده من ارباحك، خلاص شكرا، يبقى انا قطعت معاه نصف المشوار، انت بتدرس معاه، بتدرس معاه عشان تطمن انه هو … ايه … يعنى … المشروع بالنسبة له مفيد بدل ما هو يتورط وينضر فيه، دة صحيح، بس انا ممكن اكمل بشكل اكثر من كدة

المبلغ المرصود، دة مرصود لشباب مصر، او مرصود بكل من عايز يقوم بعمل صغير او متوسط، دة ٢٠٠ مليار مبلغ مش بسيط، مبلغ كبير اوى، لو تصوروا يكفى اد ايه، يكفى ملايين من الناس بس بشرط ان هم ربنا يا رب يوفقهم وينجحهم 

انا اتكلمت كدة على البناء باختصار شديد وخلونى اكلمكم على البقاء، يبقى احنا عايزين نخلى بالنا من بلدنا مصر، فكان لابد ان انا اشوف البقاء دة، ايه المستهدف، ان انا لو عايز اهد دولة اهدها ازاى، ونشتغل على ان دة مايحصلش معانا

البقاء يعنى تحديات داخل وتحديات خارج

تحديات خارج يعنى ايه؟ يعنى سياساتنا الخارجية، المصالح المصرية، والأمن القومى المصرى مع الأمن القومى العربى

يا ترى احنا فى الموضوع دة، خلال السنة ونصف دول، قدرنا نحسن موقفنا وندعم موقفنا فى مجال التحديات الخارجية؟ انا اقدر اقول بكل صراحة ايوة

كثير من الدول كانت محتاجة تسمع مننا وتعرف القضية اللى فى مصر ايه، هل القضية اللى فى مصر كانت قضية محاولة تغيير حكم بالقوة ولا التجاوب مع ارادة شعب اراد التغيير؟

فكانوا محتاجين يسمعوا مننا ودة اتقطع فيه جهد كبييير جدا، دول كثير ومسئولين كثير التقينا بهم عشان نوضح لهم النقطة دى، وانا افتكر ان هى .. والأمر بقة واضح، علاقتنا مع العالم كله، ما فقدناش علاقة مع حد، وماكتسبناش عداوة مع حد، و … الحمد لله على الصعيد الأفريقى زى ما انتم شايفين كل يوم بنحسن اكثر وبنتحرك افضل

على الصعيد العلاقات مع اسيا والدول الكبيرة الهند الصين اليابان كوريا، الامور ماشية كويس وفى نفس الوقت احنا محافظين على علاقتنا الاستراتيجية مع الولايات المتحدة ومع الغرب، دة ببساطة خالص، وطبعا دة مش محتاج منى شرح كثير لكم

يتبقى التحديات الداخلية، الأصل فى الدولة المصرية او الأصل فى اى دولة مؤسساتها، المؤسسات دى مع بعضها البعض، كل ما تكون قوية ومستقرة وسليمة، كل ما الدولة قدرتها على البقاء والممانعة، يعنى الدفاع عن نفسها تزيد

طب ايه مؤسسات الدولة اللى انا هاتكلم فيها، دستور، برلمان، مؤسسة رياسة وحكومة وخلونا نقف قدام كل نقطة من دى، اى نقطة من اللى انا قلت عليها دى لما تتهز تهز الدولة المصرية

افتكروا كويس واحنا داخلين على التعديلات الدستورية ودستور جديد والاستفتاء عليه كنا عاملين كلنا ازاى، دلوقتى بقة فيه دستور بيحكم، فى تشريع بيحكم، فى اطار بين المجتمع وبعضه وبين المؤسسات وبعضها الدستور حدده خلاص.

اى عبث فيه، يبقى بتعبث فى البقاء

نخش على حاجة تانية البرلمان، طيب هاتكلم على البرلمان باختصار شديد، يا ترى البرلمان دلوقتى … حد تدخل … فى ال .. بال .. اثناء الانتخابات عشان يجيب س او ص، يعنى دة ارادة الناس؟ طب كويس، طب تعالوا نشوف البرلمان اللى عندنا اخباره ايه؟

اخباره ان خمسين فى المية منه، ناس اول مرة تخش البرلمان، مش بتقولوا ادوا الناس فرصة، طيب ما هى الناس اخدت الفرصة، ٥٠٪ منه اول مرة يكونوا اعضاء فى البرلمان المصرى، هى دى نقطة جيدة ولا مش جيدة، ان عدم وجود تزوير فى الانتخابات دى نقطة جيدة ولا مش جيدة، طب كويس، يا ترى الشباب اللى فيه اد ايه؟ ثلثه، دى نقطة ايجابية ولا مش ايجابية

طب يا ترى عظيمات مصر، فيه اد ايه؟ 

(تصفيق)

انا بكلمكم بصحيح، هم اللى سقفوا الستات بس؟

ضحك

مايصحش والله (ضحك)

لا انا بقول لو انتم جبتم برلمنات العالم كلها بالكامل هتجدوا ان نسبة تمثيل المرأة المصرية، او تمثيل المرأة فى البرلمان المصرى، نسبة معتبرة بالنسبة للعالم كله، صحيح، انا بقول كدة ليه بس؟ بقول كدة ليه؟ لأن انا … انا مش مرتاح ان احنا مش شايفين دة، مش مرتاح له الصراحة، دة ساعات بنجيب لكم بعض البرلمانات مش عايز اقول اسمائها مايصحش، بيضربوا بعض فى ال … فى ال… جلسة، وانتم قاعدين اه ايه ايه، ليه؟ ليه مش قادرين تحسوا ان انتم عملتوا حاجة حلوة، خلال ٤ سنين صعاب اوى، ليه؟

اقول تانى: اقول برلمان لم يزيف، اقول برلمان نصفه اول مرة يدخل، فى حجم ماكانش له مممارسة قبل كدة فى برلمان، بقول فى ثلثه شباب، بقول فيه اكثر من ٨٠ سيدة، مش عايز اقول حاجة تانية عشان انا عاهدت نفسى ماقولش على المصريين غير المصريين، ماقولش مصرى كذا ومصرى كذا، مش عايز اقول الكلمة دى ومش عايزين نقولها كلنا، فأنا مش عايز اقول وفيها كمان اعداد اد ايه، لأ

اللى انا عايز اقوله، دى تجربة وماتنسوش وانتم بتتكلموا فى التجربة دى ان فيها جيد وفيها مش جيد، سيبوا اللى مش جيد دلوقتى لأن انتم محتاجين فى اطار المحاظفة على الدولة المصرية تبصوا على النصف المليان فقط، ليه؟ عشان احنا فى اضعف حالاتنا، فمحتاجين نخلى بالنا ونعزز الروح المعنوية دى اخر نقطة هاقولها فى البقاء

طيب، الحكومة، النهاردة لما بيكون في حكومة ودولة مستقرة، الامور ماشية، طب تعالوا بقة نلغبط فى الحكومة، انا بقول لكل المصريين، اوعوا حد يزعل منى، انتم هتعرفوا اكثر منى الحكومة دى كويسة ولا لأ؟! دة انا بقعد معاهم كل يوم

انا عايز اسألكم، انا مابادافعش عن حد، هو بياخد ايه عشان يستحملك؟ بياخد ايه؟ عشان تفضل تمسك فيه طول النهار والليل طاخ طاخ طاخ، خير؟ ليه كدة؟ و … فى الجرائد، انا ماكنتش هتكلم على الاعلام (هههه ضحك)

(تصفيق)

صحيح يعنى ليه كدة؟ صدقونى لو فى حاجة عايزة تتعدل هانعدلها والناس كلها مستعدية لدة، صحيح

بس ارجو ان احنا نوفر مناخ، لأن احنا اذا كنا بنتكلم على الدولة خلوا بالكم من اللى انا بقول عليه دة، حافظوا عليه، شجعوا 

هتصدقونى لما اقول لكم ان ساعات بقعد مع الناس ٨ - ٩ ساعات مش كدة، بس نقوم نصلى ونرجع تانى عشان الامور تبقى واضحة، لكن انا عارف كويس اوى … بس التحديات كثير … عارف كويس اوى الحالة ايه، بس التحديات كثير

طب انت بتشجعنى ولا بتقلقنى، بتقلقنى مش هاتحرك، هاخاف، هتقلقنى هاعمل ايه؟ هاخاف، هاخاف ل … هابقى داخل بيتى وانا … وقلت لكم الكلام دة قبل كدة مرة ولا اثنين، لأ … المشاكل … انا مرة قلت لكم مرة قبل كدة انا ماحطتش ايدى فى حتة فيكى يا مصر الا لما لقيت فيها اللى فيها، فالحكومة … نتكلم برده كدة حاجات صغيرة يعنى، يعنى قلتم ان انتم عايزين تتطوروا وهيكلة الجهاز الادارى و مش عارف ايه وبتاع … طيب اتعمل جهد، ان احنا نتكلم ان هو كله كويس او مش كويس دة كلام ناخد وندى فيه مع بعض، هى محاولة واترسخت او اتأسست على ٣ نقاط انا قلت لكم وبكررهم، هو الهدف الاول اصلاح ولا مافيش، لو فى اصلاح يبقى لابد ندفع الثمن 

طيب الثمن دة يبقى على حساب الأسر، لأ، يعنى مرتبات الناس، وبقول لكم تانى وبسمع كل المصريين، اذا كان عندنا ما يقرب من ٧ مليون موظف فى الحكومة ف … مليون منهم كفاية. مليون منهم كفاية. طب احنا مصر قالت لأهلها ولولادها للأسر دى مالكمش مكان عندنا؟ لأ 

طيب مصر قالت ان احنا فاتورة الدعم غالية علينا وعجز الموازنة كبير، مرتباتكم نخفضها ١٠٪ لأ، الكلام دة هيؤثر على … حجم العلاوة الدورية اللى بتتاخد كل سنة؟ لأ … ايه بقة؟ لا صحيح ايه دة بقة؟ طب فى حاجات عايزة تتعدل، نعدلها، لكن انا بقول لكم تانى، مايبقاش بقة الكلام … لأ، اذا كنتم عايزين تصلحوا بلدكم بجد، لازم تقفوا جنب بعضكم البعض، وجنب المؤسسات اللى انا بقولهالكم دى 

يعنى … خلينا انا اكلمكم عن المؤسسات السيادية شوية، يا ترى خلال السنين اللى فاتت كلها ونظام التعليم بتاعنا اللى موجود قدر يطلع لنا منتج كويس ولا لأ؟ انا بتكلم على سنين طويلة، يعنى كتلة كبيرة جدا مننا هى اللى استفادت من التعليم دة او اضررت به

وبناخدهم فى مؤسسات كثير، اوعى وانت بتصلح تكسر، اوعى وانت بتصلح تكسر، ليه بقة لأن كسر المؤسسات دى معناها الدولة اللى انا بتكلم عليها دى، انا بقول لكم كلكم، فى عندنا قانون وفى سيادة للقانون ومافيش تدخل ابدا، ودة برده فى اطار ان احنا بنتكلم على ان احنا لو عايزين بلدنا تبقى دولة لابد ان احنا نحترم القانون وسيادته وماندخلش فيه، كلنا 

طب عايزين نعمل تعديلات طب ما تتعمل التعديلات ما فى برلمان خلاص، عايزين نصوب حاجة، وممكن، نصوب ال … يتصوب

ف … البقاء اللى انا بتكلم عليه بيتم محاولة للعبث فيه دلوقتى، نشكك فى البرلمان ونهاجمه، نخش على الحكومة نديها، نخش على مؤسسات الدولة … اه ان بقول لكم كدة … لا لا لا .. لا يا جماعة، مش هيتبقى حاجة، دول ٩٠

طب انا هاقول لكم على حاجة … هامشى معاكم وفكروا فى اللى انا بقوله لكم كويس، اظن بعد اللى انا بقوله دة وبحكيه مافيش كلام تانى الصراحة، 

انا لما اجى النهاردة اقول الحكومة لا تقر فى البرلمان القادم، تعال يا برلمان شكل حكومة، ماشى كم شهر؟ الله اعلم. انتم بتدخلونى فى دوامات ليه؟ الدستور هيتنفذ علينا، ولو اتنفذ الدستور علينا وحصل مشكلة هتوصلنى للى ايه؟ للى بعده للى بعده، والبلد دى بتعيش يومها بيومها، يوم بيوم خلى بالكم، خلى بالكم انا مش بوجه لحاجة، انا مش بوجه لحاجة، بس انا بنبهكم، يوم بيوم يعنى مانستحملش ان احنا نقول ان الحكومة دى تقعد شهر تبقى مستنية كدة لما حكومة تانية تتشكل، لأ 

بس عشان ماحدش يقول ان احنا ماكناش نعرف، القانون والدستور له … ايه .. اطار وله مسار، ان نفذته ممكن يوصلك من غير ما تقصد ولا يقصد، انما هو هتنفذ القانون، يوصلك لحاجة انت ماكنتش عامل حسابها. 

اقول تانى؟ بقول تانى، البقاء يعنى ان المؤسسات بتاعة الدولة دى نخلى بالنا منها بس مش معناه ان احنا … يعنى … نتهاون فى ادائها، لأ انا ماقلتش كدة، بس انا بنبه، بقول تانى، نخلى بالنا من كل حاجة واحنا بنعملها عشان مانقولش نلاقى نفسنا داخلين بنخبط ايه … فى مشكلة كبيرة بصراحة، ويبقى النهاردة زى ما بقول لكم، المؤسسات دى نلاقى انها بتتفك مننا مؤسسة ورا مؤسسة، لأ، دة احنا ماصدقنا ان احنا بقة عندنا التركيبة والكيان بالشكل دة ونجحنا نعمله كدة، دة كل الدنيا بتيجى النهاردة تزور البرلمان المصرى، يعنى كل الناس معترفة به وفرحانة به، واحنا المصريين قاعدين … ايه … 

اللى بيحصل محاولة ل … ايه … فى توافق مجتمعى متشكل بعد ٣٠ يونيو، هدف استراتيجى لكم كلكم ان انتم تحافظوا عليه، المجتمع المصرى كله، الكتلة دى، لسة، لسة بدرى اوى عشان تبتدوا الممارسات الديمقراطية بالمعنى المفتوح، ان هو ننقض دة ودة يمشى و .. لسة شوية، مش بقول مافيش ديمقراطية، لا والله، بس خلوا بالكم احنا بنعملها فى ظروف صعبة فحافظوا على مصر

حافظوا عليها وحافظوا على التوافق المجتمعى دة، مالاقيش ابدا .. انا مش عايزة اجيب اسماء اى حد او اى كيانات او اى مؤسسات فى الدولة، لأة 

القانون هياخد مجراه ولو سمحتم نتوقف كلنا عند الخط دة، ولو سمحتم الكيانات اللى بتكلم عليها انتبهوا كويس، انتم جزء من البلد دى مسئولين عن امنها وسلامتها وعلاجها، فخلوا بالكم، خلوا بالكم، انا قلت موضوع الاقتصاد عشان تفهموا كويس اد ايه صعب ان احنا نوفر اموال لتعليم جيد [1:11:54]، صحيح، وعلاج جيد، صحيح، لسة، يعنى فى قصور فى دة اه طبعا، طبعا، هو انتم تتصوروا ان حد هيقدر ينهى المسألة فى سنتين ثلاثة اربعة لا والله، بس بينا كلنا نقدر ننهى مسائل كثير، ب نسع بعض، ونتفهم ظروف بعضنا البعض الامور دى ممكن تمشى بشكل احسن من كدة

انا مش بتكلم على ان احنا بس نحافظ على التوافق لا، احنا محتاجين نقويه (HG) نحسنه، ويبقى فى برامج عندنا من الحكومة ومن منظمات المجتمع المدنى ومن الاعلام عشان النسيج دة يفضل قوى، يفضل قوى، التحدى مانتهاش وبصوا حوالينا منكم وانتم تعرفوا انه لسة مانتهاش .. بس.

(تصفيق)

يتبقى فى بقاء الدولة، اللى بيهدد بقاء الدولة، العمل العنيف، الحرب بأى مفهوم لها، سواء كانت حرب ال … يعنى حرب بين دول او الارهاب اللى احنا بنجابهه دة، احنا دلوقتى بنتكلم على مجابهة الارهاب اللى … اللى كان موجود، او اللى موجود عندنا يعنى

وخلينى اقول لكم باختصار، انا كنت موجود وكنت عارف كويس وانا مدير المخابرات ايه اللى موجود فى سنيا، ايه اللى موجود فى سنيا، كويس، وعددهم واسلحتهم والشكل اللى كان موجود ايه، واقدر اقول ان بعد سنتين ونصف، لأن المجابهة بدأت بعد ٣٠ يونيو، لكن قبل كدة ماكانش فى مجابهة، وبالمناسبة برده، هم اللى بدأوا، هم اللى بدأوا، مش احنا

(تصفيق)

انا بقول لكم كلام حقيقى، بقول لكم كلام حقيقى، هم اللى بدأوا كنا ممكن كلنا نعيش مع بعض وكل واحد بفكره، لكن ماحصلش، ماحدش … انت .. يعنى .. هاقول لكم حاجة غريبة اوى وارجوا ان انتم تتفهموها كويس

٢٥ يناير كان كل المطالب اللى موجودة تغيير النظام، لو كان دة تحقق والناس مشيت، كان ممكن تبقى الاثار وقدرة الآخريين على ماكانتش تبقى بالشكل دة 

المطلب تحقق لكن فضلت حالة موجودة جوة مصر، حولت مرتبات الناس، مرتبات الناس من ٧٠ مليار ل ٢٢٠ مليار، هم كانوا بيعملوا فى نفسهم كدة، بيعملوا فى نفسهم كدة، ما انت هتيجى تحكمها هيبقى دة عبئ عليك، زى ما هو عبئ علينا دلوقتى

بس كانت الفكرة فكرة، من ٧٠ مليار ل ٢٢٠ مليار جنيه، طب احنا زدنا بالمبلغ دة؟ لأ، انا بقولها بس ك ايه، كحالة اتعملت واتشكلت ومش عايزين نرجع تانى لحاجات من دى. وخلوا بالكم يا مصريين لو فى فرصة لزيادة اى اموال لأى حد فى مصر، طب برده بقولها لكم دة يمكن خامس مرة اقولها، مين هيتردد فى انه يدى للناس عشان تعيش كويس. من يتردد، احنا مش هنعرف ندى كويس الا اذا كنا نبنى ونشتغل كويس، مش هنقدر غير كدة. 

لكن انا بحكيلكم عشان سينا والمجابهة، بقول لكم الأول انا كنت عارف كان فيها ايه وبعد ٣٠ شهر انا عارف فيها ايه. لأ احنا كنا فين، مش بس فى سينا وفى كل مصر

طيب هل الكلام دة بيترتب عليه تجاوزات؟ ايوة

(تصفيق)

ايوة، يعنى انا رادى عن كدة؟ لأة

(تصفيق)

بس احنا بقيت فى معادلة صعبة جدا، فى معادلة  ان انا ازاى احكمها ماتقعش منى وان انا فى نفس الوقت مايحصلش تجاوزات 

يعنى هى دى المعادلة وانا بسمعها لكل المصريين اللى ممكن يكون فى حد قاعد متألم، بيقول ايوة انت … لا فى ناس مظاليم، طب ما احنا طلعنا خلال … ٤ مرات ؟ ٤ مرات مش كدة، وتانى وثالث والبرلمان موجود وشبابه موجود، لف وشوف وانت تحت امركم 

(تصفيق)

صحيح مش البرلمان موجود، عايز تعمل مرور وتطمن بنفسك وماله، اتمنى ان البرلمان يمر ويشوف، اتمنى ان البرلمان يروح لأهالينا فى سينا، اتمنى ان البرلمان يروح لأهالينا فى النوبة، اتمنى ان البرلمان يروح لأهالينا فى المنطقة الغربية 

اسمع وشوف، خد الناس اللى موجودة من الصعيد ومن النوبة واطلع، اطلعوا وكلموا الناس، دى بلدنا كلنا، فى كلام كثير اوى ممكن نعمله ويحقق حاجات كثيري، يبعدنا عن الاجراء الأمنى، فى حاجات كثير ممكن نعملها.

ف … هل المجابهة او الارهاب انتهى؟ لأ لسة. لكن … بي… بينا كلنا مع بعض، هو اللى وقع لنا الطيارة، يقصد ايه؟ بس انه يضرب السياحة؟ لأة، ويضرب العلاقات. يضرب العلاقات مع روسيا ويضرب العلاقات مع ايطاليا، يضرب العلاقات مع الدنيا كلها عشان نبقى معزولين لوحدينا

آخر حاجة عايز اقولها لكم فى موضوع البقاء تانى هو الروح المعنوية، الروح المعنوية للمصريين لما الناس تبقى قلقانة وخايفة ومش مطمنة على بكرة، فى احباط، فى يأس فى تشكك، ودة خطر، خطر جدا ودة يتعمل اكيد بدون قصد لأن مافيش سياق، طب مافيش سياق ليه عشان لأن مافيش دماغ للموضوع، طب احنا عملنا كدة ليه؟ احتراما للدستور، مش كدة برده ولا ايه؟

ماعملناش دماغ للإعلام ليه؟ عشان بنحترم … و …. موجودين معانا هنا وكلفتهم بالمهمة دى من سنة ونصف. 

بقول تانى، السياق دة كان بيخلى الناس تتكلم كلام منتظم، الدماغ بتوصل الكلام، فالكلام بيبقى معروف ايه الموجود، قناة اتصال حقيقية، ولازم نعترف ان احنا مش عارفين نعمل دة، مافيش قنوات اتصال حقيقية بين الدولة وبين مؤسسات الإعلام، عشان بس ماحدش يبقى … مافيش تواصل حقيقى بشكل منتظم وموقوت عشان .. مع مؤسسات الإعلام

طيب انا قلت النقطتين دول فى رؤيتنا للحفاظ على الدولة المصرية البناء والبقاء، ودة الصراع اللى بيتم معانا، محاولة لايقاف البناء والسعى لتدمير البقاء

شوفوا لا يمكن حد هيستطيع ينال من مصر طول ما المصريين كتلة واحدة

(تصفيق)

طيب خلينى اتكلم بسرعة كدة عن الشباب يا ترى انتم حاسين بجد ان احنا بنسعى من اجلكم … يعنى بنسعى ان احنا نتواصل معاكم، بنسعى ان احنا نجهزكم، نوفر ما امكن فى ظل ظروفنا دى، حاجة ممكن تشجعكم وتطمنكم على بكرة

خلينى اقول لكم … شغالة فى مشاريع جوة مصر، بدون مبالغة، بدون مبالغة، مش اقل من ٢ مليون مواطن، بدون مبالغة، احنا كنت لسة بكلم النهاردة السيد وزير الاسكان الصبح، واقوله لما هنيجى نعمل ال … ٤٠٠ الف شقة دول هيبقوا حوالى ٦٠ مليار جنيه، تقريبا يعنى او اكثر شوية قال لى اه، قلت له تقريبا حوالى كم منهم كم منهم اجور، كم منهم مرتبات، فلوس الناس تاخدها ٢٠ - ٢٥٪، ٢٠ يعنى ايه، من الستين يبقى كم؟ كم؟ ١٢ - ١٥ مليار، كل الصناعات اللى شغالة لصالح الاسكان دة هتشتغل من اول عربية الرمل لغاية … كل مواد البناء المطلوبة، طب العمالة دى انا النهاردة فى ظل ظروفنا الصعبة دى، اقدر اراهن على ان ال ٢ مليون دول كمان مايبقاش عندهم شغل، لا بقى، يبقى انا عايز بقة … لا لازم يشتغلوا واوفر لهم شغل هم عايزينه

وبالمناسبة كان جالى … وانا بتكلم مع رئيس الهيئة الهندسية لقيته بيكلمنى يقول لى يا فندم ممكن اجيب عمالة وقال جنسية معينة، قلت له ليه؟ انا مش ببالغ فى الكلام اللى بقوله لكم خالص، قلت له لأة احنا اتفقنا ان احنا نخلى كل المشاريع بتاعتنا بعمالة مصرية، حتى لو جبت، حتى لو جبت، خد ودرب واديهم اثناء التدريب فلوس، هيقعدوا شهرين ثلاثة اربعة، اديهم ٤٠٠-٥٠٠ جنيه كل شهر لغاية لما يبقى جاهز وبعد كدة يخش على … يشتغل يعنى، فأنا عايز اقول لكم ان … بنحاول كثير اوى مع كل شبابنا ان احنا نوفر فرص حقيقية لمستقبل افضل مش هيبان دلوقتى بشكل مباشر يعنى

البرنامج الرئاسى دة، المجموعة الاولانية الناس اللى هم، انتم كلكم هتبقوا مع بعض، هناخد منكم مجموعة كبير تبقى مع الحكومة، لأن جزء كبير منهم جاى من الحكومة بالمناسبة، وهيبقوا فى المحافظات لأن جزء كبير منهم فى التوزيع الجغرافى بتاع الجمهورية، واتصور ان احنا ممكن كمان نودى على الاقل اثنين مع كل نايب من النواب، ليه؟ يشوف ويسمع ويتعلم اكثر معالجة سياسية ومعالجة اقتصادية ومعالجة أمنية وهو اللى يجهز الكلام دة للنائب بتاعه

هنشوف، احنا بنتكلم فى ٨٠٠، ٥٠٠ دلوقتى، ثم كل شهر، كل شهرين ندخل ٥٠٠ تانيين، مش هو دة المستهدف، مش كدة يا … يعنى بنكلم ان احنا  ٥٠٠ فى ٥٠٠ فى ٥٠٠ وناخد من كدة وان شاء الله … ايه … 

(تصفيق)

بعد ما يتخرجوا هناخد، عشان بس الأمور تبقى واضحة، افضل العناصر نوديها فى الأماكن اللى بتكلم عليها دية مع فى الرياسة وفى الحكومة ومع المحافظين ومع البرلمان

(تصفيق)

طيب احنا شغالين فى التعليم، يعنى باقية المسارات الأخرى مش سايبنها، بس اوعوا تفتكروا، اوعوا تتصوروا ان التعليم ممكن نحل مسألته فى سنة واتنين وخمسة وعشرة، لأة، احنا رايحيين اليابان وبنقول لهم، ان شاء الله خلال اليومين ثلاثة اللى جايين دول، رايحيين وبنقول لهم من فضلكم تعالوا ساعدونا فى هذا الموضوع بشكل قوى واحنا مستعدين للتعاون معكم، لو عايزين نعمل لكم ١٠٠ مدرسة عشان نعمل كتلة قوية فى هذا المجال مستعدين، دة مالوش علاقة بجهد وزارة التربية والتعليم اللى شغالة مع نفسها

اوعوا تتصوروا ان احنا هنقدر نصلح التعليم، ودة مش … مش عدم تحفيز للتعليم، لأ، هى الحكاية كدة، هاقول لكم على حاجة، محمد على لما مسك الحكم، مسك الحكم ١٨٠٥، ١٨٠٥، قعد ٤٥ سنة يقود مصر

عمل الجيش بعد ١١ سنة، عمل الجيش بعد ١١ سنة، خلوا بالكم 

احنا طبعا شفتم الرؤية بتاعة ٢٠٣٠ ودى عليها نقاش وهنتحرك بورش عمل وكدة وان شاء الله خلاص سبتمبر وخلال السنة دى بالكامل نشوف كمان احنا رايحيين فين

انا اتكلمت على الاصطفاف الوطنى وأهمية الحفاظ عليه، و … و … يعنى … مش هينفع ان احنا نهين المصريين، مش هينفع

(تصقيف)

وهم لازم يعرفوا ولازم كلنا نعرف اننا كلنا واحد، ودى بلدنا … وبالمناسبة، الحق من ان الناس تنصر الظالم، لا، لو حد فينا غلط، طيب ما يتحاسب، دة مالوش علاقة بالباقى يعنى

(تصفيق)

الكلام دة ينطبق علينا كلنا بصراحة، يعنى انا اقدر اقول يعنى، صحيح اقدر اقول يعنى ان فى اى مؤسسة فى الإعلام مثلا حد غلط يبقى الإعلام كله وحش، فى التعليم حد غلط يبقى كله وحش؟ 

وبرده ماقدرش اقول فى الداخلية ان لو حد غلط كل الداخلية وحشة، ماينفعش

(تصفيق)

احنا … اختم كلامى ليكم بقول لكم انا اتكلمت معاكم كثير وحاولت انى انا اتكلم ببساطة شديدة جدا توضح حجم الاشكالية الموجودة، والإشكالية الموجودة ماينفعش انك انت تشوفها غير كلها مع بعضها وتقول يا ترى هيبقى تاثيرها ايه على مصر او علينا

وبالمناسبة اوعوا تفتكروا ان اللى انا بقول عليه دة كله احنا مش قادرين عليه… لا لا لا … انا مش عايز اقسم لكم، اللى اتعمل فى السنة ونصف دول، وانا عارف انا بقول ايه، ما يتعملش فى ٢٠ سنة

(تصفيق)

دة مش جهدى انا، دة جهدكم انتم، هو اللى عمل دة مين؟ اللى عمل دة المصريين، التحية هنا لمين، التحية للمصريين 

(تصفيق)

انا بشكركم و سعيد جدا ان انا التقى من خلالكم بكل المصريين، وبطمنهم على مصر، وبقول لهم مصر واقفة بخير وسلام، وانتم فى امان وسلام، و … و ماحدش هيقدر، ماحدش هيقدر

آخر حاجة: تحيا مصر، تحيا مصر، تحيا مصر

شكرا والسلام عليكم ورحمة الله وبركاته