نص كلمة الرئيس السيسي خلال زيارته للمقر الجديد لرئاسة مجلس الوزراء 2/10/2023

4:14

السيسي: بسم الله الرحمن الرحيم، أولًا صباح الخير جميعًا، وأنا سعيد إن أنا ألتقي بيكم في المقر الجديد لرئاسة مجلس الوزرا، وبتمنى لكو التوفيق.

وأنا موجود هنا النهار ده عشان أوجه لكم أولًا التحية والتقدير والشكر، وبقول لكم إن عملكم مقدر جدًا جدًا، فأنا بشكركو على العمل الكبير اللي اتعمل خلال الفترة اللي فاتت. وعايز أقول لكو إن إحنا نستمر في عملنا، بنفس القدرة لآخر يوم، آخر يوم إمتى إحنا ما نعرفش، انا كإنسان أشتغل وبس، أبني وبس، أعمر وبس.

فـ.. ولسه بردو كنا دي، يعني بقول إيه، هو مش مهم القرار، المهم إصرارك على تنفيذ القرار. الموضوع اللي إحنا بنتكلم فيه العاصمة وكل محتواها، الدنيا كلها كانت بتقول ما تمشيش، بس إحنا مش عاملينها يعني وجاهة حضارية واجتماعية و، لأ، إحنا عاملين فكرة، الفكرة دي معناها إن في دولة بتحاول تغير من نمط وأسلوب عملها بأجهزتها المختلفة.

كان ممكن الكلام ده يقول حد ممكن نعمله داخل، داخل الـ.. الوزارات في.. في وضعها القديم. دايمًا أقول إن الجديد تقدر تحط فيه أنظمة، وتحط فيه مسارات أكثر نجاحا من إنك إنت تقدر تعمل تعديل على الواقع اللي موجود. دي نقطة.

النقطة التانية هي جاية في إطار مجموعة أهداف إحنا كنا بنتكلم فيها، إحنا بنحول أرض زي ما قلنا قبل كدا من أرض ما لهاش قيمة إلي... والمفروض إن إحنا كدولة من ضمن الحاجات اللي، اللي يعني تتكلموا فيها، هو حجم ال.. الأصول اللي أضيف للدولة المصرية بالمشروعات اللي اتعملت. فأنا عايز أقول، مش مهم فقط الخطة.. المهم إنك تصر.

كان لازم أجيلكو عشان أطمئن إن إنتو خلاص استقريتو، والدولة كلها بقت موجودة هنا في الـ. إحنا بدأنا من آخر السنة اللي فاتت، مش كدا؟ وبالتالي أي، حتى تشغيل، ويبقى في ليه تحديات إحنا بنشوفها وبنحلها أول بأول، وده أمر طبيعي يعني.

فـ.. ألف مبروك، ربنا يوفقكم، و.. مزيد من العمل ومزيد من الجهد، وإن شاء الله ها يبقى في مزيد من التوفيق، ما فيش كلام يعني، ما فيش كلام. متشكرين جدًا، شكرًا جزيلًا، شكرًا.

ألقيت الكلمة في المقر الجديد لرئاسة مجلس الوزراء، بالعاصمة الإدارية الجديدة، وذلك بحضور الدكتور مصطفى مدبولي، رئيس مجلس الوزراء، وعدد من الوزراء.