نص كلمة السيسي وحواره مع طلبة الاكاديمية العسكرية في أثناء جولته التفقدية 6/8/2025

 

https://www.youtube.com/watch?v=5T02ax9YI8I

السيسي: السلام عليكم ورحمة الله وبركاته.

الطلاب: وعليكم السلام ورحمة الله وبركاته يا فندم.

اسمحوا لي في البداية إن أنا أوجه لكم جميعا التحية والتقدير والاحترام لقيادة الكلية وأعضاء هيئة التدريس والدارسين والدارسات، والحقيقة مش هقول ليا تحفظ ولا حاجة على كلمة مصنع الرجال بس، ما هو ما بقاش رجال بس، ده رجال وسيدات يعني، فهي مصنع للكل، لبناء شخصية متوازنة قادرة، مش فقط للقوات المسلحة، لأ، لكل مؤسسات الدولة.

الأكاديمية بتقوم بدور كبير قوي، يمكن كل يوم بيتضح هذا الدور والهدف ال.. اللي اتعملت أو ال.. من أجله، أنشئت الأكاديمية، ويمكن أنا موجود هنا النهارده عشان حتى فيه دورة جديدة موجودة من الدورات المدنية، أرحب بيهم، أنا عارف إن هم بقى لهم يومين أو، النهارده تالت يوم؟ تالت يوم، طبعًا عارف إن ده صعب لأن فيه أسر وفيه أولاد صغيرين وكده، فـ.. برحب بيهم، وبقول دي تجربة الهدف منها بناء شخصية، أيا ما كانت بقى نوعية الشخصية دي، ونوعية المهمة، قادرة على مجابهة تحديات العصر، ده اللي إحنا عايزين نتكلم فيه ونأكده، هي الفكرة مش فكرة تواجد لمدة معينة كده يعني، لأ ده فيه ورا منها برامج كبيرة جدا، والبرامج دي صُمِّمَت بمتخصصين من الجامعات من كبار المتخصصين كمان من الجامعات المعنية بعلوم الاجتماع، علوم النفس، والمواد العلمية الأخرى طبقا للتخصص يعني.

مش عايز أطيل عليكم في هذا الأمر ولكن أنا بس بأكد إن كل التحية لكم وكل الترحيب بيكم وكل الأماني الطيبة والتوفيق ليكم جميعا، ومش ها أوصيكم، المدة اللي إنتو موجودين فيها هنا مدة طالت أو قصرت هتنتهي، فاستفيدو من كل لحظة إنتو موجودين فيها سواء من البناء في ال.. المعرفي، او حتى الاستفادة ال..  البدنية، ده جزء كمان ممكن نستفيد منه وعادات آآ تبقى ممكن بعد كده آآ نضخها في مجتمعنا والناس المحيطين بينا.

فـ.. ربنا يوفقكو إن شاء الله، وهنا بالجدية والمسؤولية اللي بتتمتع بيها الأكاديمية وقيادتها وأعضاء هيئة تدريسها، أصل هم انا انا ما كنتش.. انا عمري ما اتكلمت في النقط دي، أنا عايز أقول أعضاء هيئة تدريس الأكاديمية، يعني، عناصر منتقاة، مؤمنة بالفكرة، مؤمنة بالفكرة ومؤمنة بالهدف ده، وبالتالي يعني لما الناس تـ.. كل الناس تبقى، يعني، تبدأ يومها الساعة 4 ولا 4 ونص، وساعات بيبدأوا يعملوا ال.. الاستيقاظ المفاجئ ده الساعة 2 أو 1 بالليل أو 3، حسب التخطيط المفاجئ اللي هم عاملينه، مش أي حد يقوم بالدور ده ويستمر ويعيش كده، ده أكيد هم، يعني، يعني قائمين هنا في الأكاديمية عشان يحققكوا الهدف ده، بس كان مهم قوي إن أنا أشير إلى الدور العظيم اللي أتمنى إنه يستمر في كل التخصصات، وفي كل المجالات.

آآ يمكن النهارده أتحدث معاكم قليلًا، يعني لأن إحنا دايمًا بنتعود لما بنلتقي يعني بنتحدث معاكو ومن خلالكم أيضًا بنتحدث إلى الرأي العام في مصر وكده وأقول على الصعيد الداخلي، يعني على صعيد الدولة المصرية، أنا عايز أطمنكم إن الأمور بفضل من الله سبحانه وتعالى، تسير بشكل جيد، ويمكن الأحداث اللي بتمر بمنطقتنا بتؤكد بفضل الله ثوابت السياسة المصرية اللي إحنا وضعناها تقريبا من 10 سنين في التعامل، سواء مع قضايانا بشفافية ومصداقية وصراحة، وأيضا بجدية وأمانة لمحاولة التغلب على.. بتأكد بفضل الله سبحانه وتعالى إن كل يوم والتقدم اللي بيتم فيها زي ما إنتو عارفين مثلا على سبيل المثال وأرجو إن إحنا دايمًا يبقى عندنا سياق للأحداث وللمسار اللي إحنا آآ يعني عاصرناه.. أنا بتكلم الكلام ده لكل الدارسين وأيضًا للمصريين، ما تنسوش إن إحنا من 10 سنين أو أكتر شوية كان فيه مشكلة كبيرة جدًا في مصر، مشكلة كبيرة جدًا وكانت ممكن المشكلة دي تعصف بأمننا وباستقرارنا لغاية دلوقتي، إوعوا تفتكروا إن الموضوع ده لما حصل ما كانش ليه تداعيات كبيرة جدًا على أحوالنا، وما ننساش الحكاية دي، إن كل حدث بيتم على مستوى الدول يبقى ليه تأثير، تأثير سلبي أو إيجابي.

الحمد لله إحنا ماشيين كويس، مش بشهادتنا إحنا، بشهادات المؤسسات الدولية رغم الظروف الصعبة اللي بتمر علينا في منطقتنا وحالة آآ حالة الاضطراب الكبيرة جدًا اللي هيكون ليها تأثير كبير جدًا دلوقتي ومستقبلا على منطقتنا، وبالتالي رغم كل الظروف دي وعلى سبيل المثال أكتر من 8 مليار دولار كان عائد مباشر لقناة السويس تقريبًا إحنا فقدناه نتيجة الظروف اللي انا بتكلم عليها دي  آآ في المنطقة والحرب اللي بتدور في غزة.

لكن بالرغم من ده بفضل الله مسار الإصلاح الاقتصادي ماشي جيد وإحنا بنتقدم كل يوم عن يوم، مش بسهولة، لأ، فيه صعوبة، كلنا بنعاني من ده، وأنا بقول كلنا بنعاني من ده لأن لازم كلنا نبقى متضامنين في الإنجاز اللي احنا بننشده لمصر بالمصريين.

فاسمحوا لي بس أطمنكو على هذا الأمر، مافيش عندنا مشكلة لا في.. لا في سلع ولا.. منتجات غذائية ولا حاجة الحمد لله عندنا الاحتياطات بتاعتنا تكفي زي ما دايمًا بنتكلم وأنا بقول الكلام ده بصفة عامة لأن الدنيا مش بتعيش بكدا بس، لكن أنا بطمنكو إن الأمور الحمد لله ماشية جيدة.

شوفوا، فيما يخص الاقتصاد وتحسين أحوال الناس، ده محصلة جهد شعب، مش حكومة، ولا قطاع من الدولة، لأ، ده محصلة قطاعات الدولة بالكامل، عندما هذه القطاعات تعمل بكفاءة وبعلم وبمعرفة بشكل كبير، الإنجاز ممكن يتحقق، والأهداف اللي ممكن اللي اتحقق ممكن تتحقق ويزيد كمان، فأنا بس عايز أقول لينا كلنا لأن إحنا ساعات خلال الأحداث دي بنشوف يعني على مواقع التواصل ويمكن على وسائل الإعلام أحيانًا كلام كتير قوي، وأنا زي ما قلت لكم مرة قبل كده، أو أنا قلت هنا مرة قبل كده، إن التقدم العلمي والتقدم اللي الإنسان بيعمله ده جزء من سنن الدنيا اللي ربنا سبحانه وتعالى حطها، ما فيش حاجة جاية غلط، مافيش حاجة جاية من غير ترتيب إلهي، التطور الإنساني اللي بيـ.. بيتم في الوجود كله، ده تطور من.. منذ.. يعني.. منذ نشأة الكون لغاية دلوقتي، مقدر تقدير دقيق لحكيم عليم خبير.

 فـ.. على سبيل المثال زي ما قلت كده مواقع التواصل الاجتماعي كتير من الناس يقول لك ده شر، لأ، الشر استخدامك ليه، إنما هي لها فوائد عظيمة جدًا جدًا لو إنت أحسنت التعامل معاها، وهنا أنا بتكلم لأن إحنا قلنا من ضمن الأهداف بتاعتنا هنا حتى في الأكاديمية إن إحنا نقول لل.. لقطاع كبير موجود معانا إنك إنت ممكن تستغنى عن التليفون يوم كامل، وليلة كاملة، وشهور كاملة، ما فيش تليفون إلا بـ.. في توقيتات محددة، إزاي إحنا ممكن نتعامل مع كل شيء بشكل آآ أنا بس بشاور على حتة مواقع التواصل اللي إحنا بقت جزء كبير جدًا من.. من حياتنا.

وأنا بالمناسبة مش بكلمكوا إنتو بس، أنا بتكلم من خلال كل مصري، وبقت النهارده بتستخدم استخدام إحنا، مش إحنا مصر، إحنا الناس في أي حتة في الدنيا، زي ما قلت يا تستخدمها استخدام جيد، أو استخدام سيء.

مش هطيل عليكم لكن عايز أقول مـ.. مش لازم، لازم نفهم، إن كل الحاجات دي كمان بقت تستخدم آآ يعني كـ.. يعني تستخدم كسلاح يوجه ل.. لخفض روحك المعنوية، لنشر الشائعات، لتفكيك الإرادة، والتضامن، والصلابة، من خلال كلام كتير جدا جدا، وأنا رهاني في ال.. في الموضوع دوت على وعي المصريين اللي بيزداد كل يوم عن يوم، اللي بتأكده ال.. تصرفات وردود أفعال كل الناس مع الأحداث وال.. والقضايا اللي بتمر بينا. لكن أنا بس حبيت أفكركم وأفكر كل اللي بيسمعنا إن خلي بالكو مش كل اللي بتشوفوه وبتسمعوه في مواقع التواصل وحتى في وسائل الإعلام، وحتى في وسائل الإعلام، ده الإعلام ده علم كبير جدًا جدًا جدًا وفن كبير جدًا جدًا جدًا، فن التأثير، فن التأثير على الناس و.. توجيه الرأي العام بشكل أو بآخر، كل الكلام ده إحنا هنا آآ في مصر مش بتكلم على هنا للدارسين في الاكاديمية والدارسات، لأ، أنا بتكلم في مصر بقينا أكثر فهما ووعيا ليه.

آآ.. فأنا بس عايز أقول ننتبه للموضوع ده كويس قوي، لأنه في الوقت اللي إحنا فيه ده هو أصعب وقت في منطقتنا وبتستخدم فيه كل الوسائل لإحداث التأثير المطلوب لإنجاح الخطط المطلوبة تنفيذها، لن يستطيع أحد هزيمة شعب، ما فيش حد يقدر يهزم شعب، ما فيش دولة تقدر تهزم شعب، إنت ممكن تهزم أفراد، قطاعات، لكن شعب، متماسك، مؤمن بالله سبحانه وتعالى، ومؤمن بأهدافه، وواثق في نفسه، لا، ماحدش يقدر، ماحدش يقدر يهزم الشعب، وأرجو إن الكلمة دي يعني تبقى قدام عنينا ونفكر فيها كويس، بشرط، إن الشعب ده يبقى فاهم وواعي وصلب ومستعد دايمًا إن هو يضحي، يضحي بكل حاجة، حتى لو وصل الأمر إنه يضحي بحياته زي ما إحنا موجودين عشان كده.

طبعا الموقف الخارجي زي ما إنتو شايفين ومتابعين كلكو إن طبعا زي ما قلت بقى لنا دلوقتي تقريبا سنتين أو أكتر، أنا بعتبر إن، إن من 2011 وبننتبه للكلام ده كويس، والمنطقة بتاعتنا بتعاني من ظروف صعبة جدًا، مش بس السنتين بتوع غزة والحرب اللي موجودين فيها تقريبًا، لأ، أنا بعتبر إن المنطقة منطقتنا العربية، بتمر بظروف صعبة منذ 2011 ويمكن من قبل كده كمان.

وعلى كل حال، ده بيتطلب مننا أو بيأكد قبل ما أقول يتطلب مننا، بيأكد إن الثوابت في السياسة المصرية هي كانت دايما التوازن في العلاقات والبعد عن المؤامرات وعدم التدخل في شؤون الآخرين والتعاون فقط في البناء والتنمية والتعمير، وده اللي إحنا يعني اعتنقناه ومارسناه وبنمارسه لغاية دلوقتي، وبفضل الله سبحانه وتعالى إحنا شايفين نتايجه إن إحنا بفضل الله في وضع أفضل من الأوضاع السابقة، وبيأكد إن المنطقة محتاجة دايمًا إن إحنا كلنا.. وهنا أنا بردو ها أرجع لموضوع الإعلام والتواصل ومواقع التواصل، وأقول مثلًا، خلال ال.. الأسابيع ويمكن الشهور القليلة الماضية، استخدمت وسائل الإعلام للإساءة للعلاقات بين.. بينا وبين أشقاءنا، وإحنا علاقتنا طيبة جدا وأنا مش بقول كلام سياسي، لا والله، أنا بحلف بالله، إحنا علاقتنا طيبة جدًا، بكل ال.. بكل أشقاءنا في منطقتنا العربية، وأي حد بيحاول إنتو لازم تكونوا فاهمين كدا يا مصريين، أي حد بيحاول يخليكو تقعوا وتختلفوا مع أشقاءكم ده بينشد الفرقة وبينشد الضعف لينا كلنا، إحنا في أحوج ما نكون دلوقتي إن إحنا نبقى مع كلنا مع بعض، المنطقة بتمر بظروف صعبة جدًا والأمن الإقليمي مهدد بشكل كبير، تفتكروا ده الوقت المناسب للخلاف أو النزاع؟ مين بيفكر بالطريقة دي؟ وعشان كده يمكن أنا حبيت أقول في، في أول نقطة في نقطة ال، في الموقف الخارجي أو.. على صعيد الخارج يعني، إن أنا بأكد على علاقتنا القوية والمتزنة، خاصة بمنطقتنا العربية، مفيش مشكلة خالص.

 وأنا والله صادق معاكوا، مع كل أشقاءنا، سواء كان في المغرب العربي وشمال أفريقيا أو في المشرق العربي ودول الخليج، وأنا بأكد على النقطة دي قوي، وانتبهوا، فيه مخطط لإن إحنا نختلف مع بعضنا البعض، ونخلي الاختلاف يبدأ على مستوى الشعوب، إحنا أشقاء وهنفضل أشقاء، وأمننا وأمنهم أمن واحد، أمننا العربي أمن واحد، وأي حد يفكر يدخل في المنطقة دي هو بيهدف إلى الإضرار بينا، وإوعى يا إنسان يا مصري يا عربي يا سعودي يا إماراتي يا كويتي يا قطري يا سوري يا، يا.. أنا بقول يا إنسان عشان كدا.. إوعوا وانتبهوا، مش كل اللي بتشوفوه وبتسمعوه تصدقوه وكمان آآ تتحركوا وراه، ده إحنا في أحوج ما نكون دلوقتي إن إحنا نبقى كلنا كده مع.. عشان أمننا وعشان شعوبنا.

أنا بس حبيت أقول النقطة دي لأن أنا لقيت خلال الفترة اللي فاتت محاولات للوقيعة بينا وبين أشقاءنا اللي إحنا آآ بنحترمهم وبنقدرهم وأيضا مقدرين مواقفهم الإيجابية معانا، ومش هننسى ده أبدا، والمفروض ماننساش ده أبدا ليهم.

يتبقى ال.. المشكلة ال.. اللي انا يمكن اتكلمت فيها إمبارح معرفش انتو شوفتوها.. أنا عارف بيبقى عندكم قاعات وشاشات في ال.. في.. الميسات يعني.. اتكلمت على موضوع قطاع غزة والجهود اللي إحنا بنبذلها من أجل وقف الحرب، وأنا قلت يعني الكلام ده وبكرره باختصار شديد قدامكم دلوقتي، إن إحنا خلال مش بس أيام الفترة اللي أنا موجود فيها، لا، حتى قبل منها، كانت الدولة المصرية متفهمة، ومدركة كويس جدًا لمخاطر الصدام بين آآ ال.. آآ، يعني العناصر في قطاع غزة وما بين في الدولة الإسرائيلية، وكان كل جهدنا خلال ال.. من 2005 أو 2007 لغاية دلوقتي هو محاولة دائما إن التصعيد ما يتمش والاقتتال مايحصلش، ولكن حصل خلال الفترة دي 4، 5 مرات اقتتال انتهوا أو انتهى بالاقتتال الأخير ده، وده كان زي ما قلت إمبارح أنا وبكرره قدامكم كان تقدير من مصر على إن إحنا كنا عندنا تقدير إن أي مواجهة هتكون تمنها يدفعه الشعب الفلسطيني في قطاع غزة، ويدمر القطاع، ونبنيه تاني، ويدمر القطاع ونبنيه تاني، طبعا المرة دي حجم التدمير ليس له مثيل، بس أنا بأكد على أهمية فهمنا، لما بنقول إن إحنا نبقى فاهمين وعندنا تقدير بعواقب الأمور، يبقى الناس تضع ده في الاعتبار.

على كل حال، إحنا جهدنا خلال من 7 أكتوبر لغاية دلوقتي هو محاولة لإطفاء نيران الحرب وتخفيف المعاناة عن الشعب الفلسطيني وأيضا إطلاق سراح الرهائن والأسرى من الجانبين؛ نجحنا أحيانًا ومانجحناش كتير لأن مش إحنا، الموضوع مش عندنا إحنا بس، الموضوع فيه أطراف أخرى، الموضوع اللي احنا بنتعامل معاه مش مصر اللي.. مش موقف داخلي، لا ده موقف دولي، المنطقة بالكامل، لكن معانا شركاء بنتعامل معاهم وبنـ.. يعني، ونتعاون معاهم من أجل زي ما قلت كده وقف الحرب وإدخال المساعدات وإطلاق سراح الرهائن.

فـ.. بردو، بردو خلال الأسابيع القليلة الماضية، الكذب والافتراء والادعاء والتضليل والخداع... يشوهوا الدور، طب ليه؟ هو كل اللي انتو شايفينه في المنطقة ده، لسه متعلمتوش؟ لسه ما.. يعني.. لسه متعلمناش إن لن يصح إلا الصحيح؟ لسه بتكدبوا؟ لسه بتخدعوا؟ لسه بتحلموا أحلام غير قابلة للتنفيذ أو التحقيق أبدًا، أو التحقق يعني؟

على كل حال، أنا بس حبيت أقول النقطة دي لأن هم ساعات من كتر ترديد الكذب، ساعات الناس بتصدقهم، وفي غياب أو ضعف آآ صوت قوي جدًا للحق والحقيقة ممكن الناس تنخدع.

لازم تتأكدوا من حاجة واحدة، شوفوا، إحنا دايمًا نقول إن أحنا بالله ما بنخافش، طب ليه ما بنخافش؟ اللي بيعمل حاجة غلط بيخاف، لأن بيبقى جواه حاجة بتقول له إن ممكن تتحاسب على ده، على الأقل يعني في الدنيا وعلى الأكثر في الآخرة يعني، فيبقى خايف. لكن إحنا بفضل الله سبحانه وتعالى بنخاف منه هو بس، لأنه هو اللي شايفنا، و.. وهو خبير وبصير وقادر، وبالتالي بنعمل له حساب كبير قوي، إيدينا بفضل الله سبحانه وتعالى لا هي ملطخة بدماء أحد ولا بأموال أحد ولا بالتآمر على أحد، وهدفنا كله البناء والتعمير والتنمية والإصلاح.

فـ.. عشان كدا إحنا ما بنخافش، وكل التآمر اللي بيتعمل والخداع الي بيتعمل ما بنخافش منه مش عشان إحنا أقويا فقط، لأ؛ عشان إحنا عارفين إن إحنا لينا سند كبير، السند الأكبر في الوجود كله، وكل مانـ.. ما هنخاف ونعمل له حساب، كل ما هننجح وهنكبر وماحدش بفضل الله هيقدر يعمل أي حاجة.. ماحدش هيقدر يعمل أي حاجة. بالله وبالله وبالله.

كل سنة وإنتو طيبين، سعيد إن أنا موجود معاكم، بشوف فيكو بكرة وبشوف فيكو الأمل والمستقبل لمصر، ربنا يا رب يوفقكم. شكرًا جزيلًا، وخدت من وقتكم كتير معلش بس كان يوم جميل إن أنا أكون موجود وسطكم النهارده، وربنا يا رب يحفظكم من كل سوء. السلام عليكم ورحمة الله وبركاته.

...

السيسي: إحنا من جانبنا لازم زي ما إحنا متفقين يا أشرف احنا عندنا مجموعة هنا معنية بمشاكل بلدنا وولادنا اللي موجودين هنا عشان إحنا نحللهم بعض من المسائل اللي حضرتك بتتكلمي عليها.

طالبة 1: أنا ماعنديش أي تساؤلات يا فندم ولكن أنا بس حابة أعبر عن شكري وامتناني لحضراتكم للسماح لينا، للسيدات بشكل عام بالتواجد في هذا الصرح العظيم، الأكاديمية العسكرية المصرية، الحقيقة كان حلم بالنسبة لي إن أنا أشوف حضرتك، وكنت بشوف حفلات التخرج في التليفزيون دايمًا، وكنت بدمع من الفخر وكنت بتمنى إن أنا أقدر أكون متواجدة في هذا الصرح العظيم بأي شكل ولكن ما كنتش عارفة إزاي. أكيد الأكاديمية العسكرية هتضيف لينا كتير يا فندم والموضوع أكيد متعب في الأول ولكن كل ما الهدف بيكون أسمى، كل ما التضحيات بتكون أكتر والتعب بيكون أكتر، فإحنا متقبلين ده بشكل تام وما فيش أي مشكلة.

طالبة 2: كان حلم حياتي إن أنا أنضم للقوات المسلحة، فبالنسبة لي أنا بحقق حلم حياتي إن أنا موجودة في فترة التدريب هنا، كان حلم حياتي التاني إن أنا أشوف سيادتك.

السيسي: ربنا يبارك فيكي

طالبة 2: وأنا من محافظة سوهاج يا فندم وعايزة أبلغ حضرتك إن كل  أهل الصعيد بيحبوا حضرتك جدا ومقدرين مجهود سيادتك ويعني بجد كل اللي حضرتك بتعمله إحنا شايفينه فوق راسنا

السيسي:  ربنا يبارك فيكي يا بنتي. متشكر جدًا على الكلام الجميل اللي انتي قلتيه، وإحنا سعداء إن إنتو موجودين معانا هنا، واستفيدوا زي ما قلت... شوفوا.. المكان هنا فرصة جديدة، وتجربة مختلفة، عيشوها وحاولوا تستفيدوا منها...

طالبة 3: طبعا حابة أشكر حضرتك إن إحنا موجودين هنا وحضرتك دايمًا مع المرأة، حابة أشكر حضرتك إنك إديت فرصة للبنات إن هم ينضموا للنيابة العامة ومجلس الدولة وإن ده مكنش موجود قبل كده، شكرًا جدًا لحضرتك.

السيسي: المهم إن إنتو (كلمة غير واضحة) تجربتي كلها إن الست حاجة عظيمة جدا، كل التقدير وكل الاحترام وكل الثقة فيكو، فربنا يحفظكم و.. وأهلا بيكم وربنا يوفقكم.

...

السيسي: برحب بيكم.. سعيد إن أنا ألتقي بيكم في الأسبوع الأول من التدريب، وباتمنى لكو التوفيق، تجربة جديدة يمكن تكون صعبة في الأول شوية، صعبة شوية، لكن مع الوقت ها تتعودوا عليها، وها تستفيدوا منها إن شاء الله. و.. وأنا بقول كدا عشان إنتو تساعدونا في الاستفادة إن إنتو يبقى عندكو استعداد نفسي، لكن بتمنى لكوا التوفيق، وسعداء إن إنتو موجودين واللي انتو موجودين فيه ده أنا بقول إن هي محاولة مننا كدولة إن هي تأهل وتطور جهازها الإداري، كل جهازها، مش الجيش بس، مش الشرطة بس، لأ، كلنا، وإن نجحنا في ده يبقى فضل كبير من ربنا، وبيعتمد جزء كبير منه من الفكرة دي ونجاحها على استقبالكم لها، واستعدادكم للتعاطي معاه بشكل إيجابي، والله إنتو المستقبل كله، ولازم تكونوا عارفين كده، مكانتكو كبيرة، مكانتكو كبيرة وربنا سبحانه وتعالى أراد كدا، مكانتكو كبيرة وإوعوا يعني أوعوا تقللوا من إمكانياتكو وإرادتكو إنتو قادرين على إحداث تغيير كبير قوي في حياتنا، في عملنا، حتى في مجتمعنا.

نطاق التأثير بتاع كل آآ يعني دارسة منكم نطاق كبير قوي، بدءً من بيتها وأبناءها، ثم جيرانها ثم صديقاتها وأصدقاءها، ثم أسرتها الكبيرة، يعني، نطاق كبير قوي، ثم في العمل، ولو حد عايز من حضراتكن يعني إن هم يقدموا رسالة، ماجستير أو كده إحنا مستعدين، ماجستير وإحنا محتاجين ده، إن إحنا ناخد درجات علمية، ماجستير ودكتوراه، و.. يعني.. ولا يتوقف تحصيل العلم أبدًا.

ربنا يوفق الجميع وكدا أنا عارف إن ده صعب جدًا عليكم إن إنتو تسيبوا البيت والولاد يعني وحتى اللي لسه ما اتزوجتش تسيب باباها ومامتها يعني، لكن أسرة كبيرة هنا يعني، الفريق أشرف دايمًا يقول لي إن الإدارات المدنية مستوى رائع جدًا جدًا ومحترم جدًا جدًا و.. ومجتهد جدًا جدًا، فده أمر بيسعدني، ويشرفني وبالمناسبة أنا كنت متوقع كده. ربنا يوفقكم ويحفظكم وبالتوفيق إن شاء الله. متشكرين.. متشكرين.

...

السيسي: مبادرة الرواد الرقميين، وهنا أنا بأكد لكو إن المبادرة دي الهدف منها إن إحنا نعطي فرصة لشبابنا وشاباتنا الراغبين والقادرين.. الراغبين والقادرين.. بتتعمل تقييمات علمية إحنا ما بنتدخلش فيها، بنحاول (كلمة غير واضحة) عادلة تماما عشان يبقى اللي داخل قادر يستفيد إنه لو مش في المستوى هيقعد معانا وإحنا، وأنا بقول لكم، للي مايعرفش، هنا، في الأكاديمية مافيش رسوب.. مافيش رسوب طيب بعد ما نوفر الجو ده، والمناخ ده، والتعليم ده، ويحصل رسوب يحصل إيه؟ بنقول متشكرين، شكرًا، مش  كده؟ أنا حرصت على إن أنا أقول لكو الكلمة دي لكو إنتو عارفين الكلام ده وده الإجراء اللي بنعمله، لكن أنا بقول حتى الكلام ده هيتعمل مع الرواد الرقميين، اللي هيقصر في مادة مش هيكمل معانا، اللي هيقصر في مادة، المفروض ماقولش الكلام ده، إحنا كلامنا واضح، إحنا الطالب هيتكلف مليون جنيه، عشان ييجي، والطالبة، ييجي يبذل أقصى جهد وإلا يدي الفرصة لحد تاني.

فالإجراء ده بيتعمل ونتمنى لهم التوفيق وإن شاء الله مبادرة رواد رقميون هنحقق بيها اللي إحنا عايزينه أيضا ويبقى عندنا جيل من الشباب والشابات بنأهلهم ونجهزهم من مستوى لمستوى أعلى. الماجستير والدكتوراه هيبقى هنا. والماجستير والدكتوراه. من فضلك يا (جمل غير واضحة) مش عايز أطول بس أكتر من كده (جملة غير واضحة) شكرا جزيلا.

---

ألقيت الكلمة في القاهرة حيث قام الرئيس عبد الفتاح السيسي بجولة تفقدية في الأكاديمية العسكرية المصرية؛ استهل الزيارة بمشاركة طلبة الأكاديمية العسكرية صلاة الفجر، وتابع طابور اللياقة الصباحي للطلبة.