نص كلمة وتعليقات السيسي خلال جلسة "مسيرة الطاقة المصرية: إنجازات وطنية وآفاق المستقبل" بمنتدى مصر 22/10/2026

الرئيس السيسي خلال جلسة "مسيرة الطاقة المصرية… إنجازات وطنية وآفاق المستقبل" بمنتدى مصر  22/10/2026

36:26

السيسي: أستاذ كمال (ماضى)، اسمح لي.. بسم الله الرحمن الرحيم، معلش أنا هضطر إن أنا أتدخّل في الكلام اللي بيتقال، لأن إحنا لما عملنا المنتدى ده كان الهدف منه إن إحنا مش نطرح طرح المتخصصين، طرح المتخصصين أمر مهم جدا، وعشان يعني نبقى آآ.. لكن إحنا لما عملنا المنتدى كان الهدف منه إن إحنا نفهّم الناس الحقيقة، الحقيقة اللي إحنا.. والتحدي اللي موجود قدّام الدولة في أي موضوع بنتكلم فيه؟

وأنا عشان كدا معلش يا أستاذ كمال، أنا قاطعتكم كلكم، فسامحوني يعني. كل كلمة اتقالت صحيحة وطرح رائع جدا ومحترم، لكن لازم تعرفوا إن إحنا بنكلم المواطن البسيط خالص، فلماجي أقول له مثلا مثلا يعني، وكل مسؤول قدّام مني وخبير قداّم مني من حقه يردّني لو لقى إن الكلام بتاعي خارج عن السياق خالص.

إنتو اتكلمتوا على 2014، واتكلمتوا قبل منها على أزمة الكهربا في 2011 و12 وقبل كدا كمان، ودايما هقول لينا كلنا، فيه حاجة إسمها أنا بقولها دايما وأرجو إن إحنا نكررها، منين، أو بكام ومنين؟ قبل ما تقول الطرح اللي بتطرحه، قولي بكام ومنين، يعني لو جيت قلتلي أعمل طاقة أو بنية أساسية لطاقة مستقرة في مصر، وتعتمد المكون بتاعها بنسبة معتبرة على الطاقة الجديدة والمتجددة، هروح مكلم وزير الكهربا، أقول له قولّي تكلفة تأهيل الشبكة عشان تقدر تبقى مُستعدية تتحمل إنها تستقبل طاقة جديدة ومُتجددة لغاية مثلا 40% من إجمالي الطاقة المستهلكة، وقولّي التكلفة بتاعتها قد إيه، والفترة الزمنية المطلوبة لتأهيل الشبكة دي.

لو جيت قلت لي إن آآ.. مُقترح بإن إعداد البنية الأساسية للطاقة في مصر يعني.. يعني إيه، أنا مش بكلم حضراتكم، ده أنا بكلم حضراتكم عشان تردوني لما أقول كلام مش مظبوط، يعني إنت عايز تعمل محطات توليد، سواء كانت محطات التوليد دي طاقة أحفورية، غاز وبترول أو غاز ومازوت، أو محطات طاقة جديدة ومتجددة، آآ.. إذا كانت بقى طاقة نووية أو طاقة شمسية أو طاقة رياح، وأنا بكلم أنا بكلم الناس المواطن العادي، طيب، لما أجي أعمل الـ.. الـ.. البنية دي، يعني عايز إيه، وبقول للناس لو سمحتم انتبهوا لكلامي، لأن أنا عامل المنتدى ده عشانكو إنتو، مش عشان الكلام اللي بيطرح، لأن الكلام ده إحنا بنجيب الخبرا ونقعد معاهم بشكل مستمر عشان ناخد منهم يعني مقترحاتهم وعلى تصوراتهم لحلول آآ.. مبدعة وخلّاقة لأزمة إحنا بنقابلها أو ممكن نقابلها.

فده بيتم على مدار الـ.. يعني عمل المؤسسات بتاعة الدولة في المستوى الكبير ده، لكن أنا يهمني إن المواطن يعرف إن أنا عشان أوفر لك طاقة، فيه عناصر كتير لازم تبقى متحققة، لو جيت اتكلمت على الـ.. البنية الأساسية، يعني.. يعني محطات التوليد، محطات التوليد أو محطات الإنتاج لو شئتوا إن إنتو تسموها، هي عبارة عن الـ.. أي بقى محطة، من أول محطة طاقة زي.. بلغاز أو بالمازوت زي ما قلت، أو طاقة نووية أو طاقة شمسية، دي ليها تمن، بكام ومنين؟

طيب، عشان أنا أنتجت الطاقة دي خلاص، عايز أنقلها لكم، فمحتاج شبكة نقل وتوزيع، منين؟ أو بكام ومنين؟ وأنا بعملها كدا، فيه حاجات فنية بتبقى موجودة على محطات تحكُم وسيطرة عشان تنظم وتدير عمل الإنتاج ونقله وتوزيعه، بكام ومنين؟ وبعدين، بعد ما أعمل ده كله، إنت بتقابل تحديات أخرى، زي مثلا تحدي في تكلفة الطاقة اللي ممكن تجيبها، أو تحدي في جيوسياسي زي اللي بيحصل دلوقتي بإنك إنت تبقى عامل موازنتك على مثلا 70، 75 دولار لل.. للبرميل، وتجد إنه مثلا بقى 90، بقى 100، طيب التعويض ده بكام ومنين؟

فلما الحوار اللي بيتقال هنا دلوقتي هو حوار المتخصصين، لكن الحوار اللي موجود على المواطن بيقول لك غالي عليّا، غالي إيه.. عليّا، لأن الثقافة اللي موجودة لدى.. لدى مواطنينا هو إن هو ما تبقاش غالية عليه، فلازم إحنا نفهّمه إن التكاليف المطلوبة للموضوع اللي بنتكلم فيه هي فوق طاقة الدولة.

ولما نيجي النهار ده الـ.. المهندس محمد (شعيب) يقول إيه، لابد من الـ.. يبقى فيه نظام قوي لدفع مستحقات الشركاء الأجانب، كلام صحيح، شريكي بيديني بترول أو بيديني غاز بالـ.. بمقابل، فلابد إن أنا أديله الـ.. إيه؟ طب بكام ومنين؟ وكأن إن إحنا كدولة قاصدين إن إحنا نعمل أزمة لنفسنا.

طب أنا عشان أحل المسائل دي أضطر إن أنا مثلا عايز أعمل الـ.. أجهز الشبكة لزي ما تقال كدا 7% كل سنة، يعني لو إنت شئت إنك تتكلم إن كان 25، 27 آآ.. 1000 ميجا في 2014، إنت بتتكلم النهار ده في خلال 10 سنين 70% زيادة، يعني عايز توصل للرقم ده، طب إنت عشان توصل له، عايز محطات وعايز كمان تأهل الشبكة إنها تستحمل الزيادات في الـ.. آآ.. آآ.. اللي إنت هتـ.. يعني التنمية اللي إنت بتعملها، طب برده بكام ومنين؟

هي التحدي اللي في الدول اللى زي عندنا هو بكام ومنين، في التحدي اللي زي.. ليكو كلكو يا مصريين، انتبهوا للكلام اللي بقوله عشان أنا حريص على تشكيل رأي عام واعي.. واااعي، مش كلام مترتب ومتنظّم أطرحه، عارفين المزيدات، الطرح اللي بيتقال إنكم إنتوا تشجعوا على مزيدات جديدة، وييجي الدكتور أو المهندس كريم يعمل مزايدة، عارفين عبال ما تشوفوا نتايجها بعد كام سنة؟ من 5 ل 7 سنة، ولا أنا بقول كلام يا كريم آآ.. أقول تاني؟ يعني لما ييجي كريم (بدوي، وزير البترول) يعلن عن مزايدة وجت شركات وخدت المزايدة دي ووافقت إنها تخش تعمل آآ.. بحوث و.. عشان تستكشف إمكانية الإنتاج بترول أو غاز في مصر، من يوم ما طرح المزايدة والتصديق عليها من البرلمان، لغاية لما ده يدخل الشبكة أو يدخل للخارج، ياخد من 5 ل 7 سنة، فلما المواطن يسمع مني إن أنا بقول له اعمِل مزايدات، يتصور إن الدولة متقاعسة ومش فاهمة، ومحتاجة تسمع من حد يقول له مزايدة، أو يقول له يدفع رسوم المستحقات الأجانب، ما تقول للناس إن التمن اللي إنتو بتاخدوا بيه البترول ده، الكهربا دي، غير اقتصادي على الإطلاق.

أنا حرصت إن أنا أحضر منتدى الطاقة ده عشان عارف إن هيتقال فيه كلام كتير، هيتقال فيه كلام كتير، لأن هو.. هو يعني.. الطاقة دي أزمة الأزمات في العالم.

إذن القضية اللي إحنا بنتكلم فيها هنا دلوقتي في كل الموضوعات اللي إحنا بنتكلم عليها، وسامحوني إن أنا قلت كدا، هتلاقي فيه مشكلة بين كريم وبين وزير الكهربا والوزير أحمد كوجك، المشكلة فلوس، أحمد كوجك عشان يوفر لهم الفلوس لكريم عشان يجيب البترول، المستحقات اللي بتيجي من الناس في تمن الطاقة اللي بيتم بيعها أقل كتير من تمن الشرا، فأحمد عايز العجز ده يسده، يا إما موارد الدولة كافية إنها تسده، يا إما موارد الدولة مش كافية إنها تسده، فيستلف، فلما يستلف يبقى ال 70 دولار أو ال 100 دولار تمن البترول اللي جابه للبرميل ما بقاش تمنه 100 دولار، بقى ال 100 دولار زائد السلف، فإنت حضرتك لا أنا باخد منك حق ال 100 دولار، ولا باخد منك السلف.

هقولها تاني، أنا ببيع لك الحاجة أقل من تمنها الحقيقي، ده.. ده بقول إيه.. اللي هو اتكلفت 10 قروش من غير سلف، أنا ببيعها أقل من 10 عروش، طيب استلفت، يبقى بقى السلف بتاعي أو التكلفة بتاعتي زادت، ما بقتش ال 10 قروش تمن الحاجة الحقيقية، بقت العشرة زائد السلف، لا باخد ده ولا باخد ده.

وبعدين تيجي تقول يا مواطن، إنتم و.. وليكو حق في ده كله.. إن إنتم يعني بتستلفوا ليه؟ عشان المواطن اللي بيقول أنا لا مؤاخذة أنا بشغل تكييف واحد، أنا عايز أشغل التكييفين وما أدفعش.

من فضلكم، خليكم منصفين في الطرح، وتعاملوا مع الطرح المثالي بفهم أعمق من كدا، طب أنا بقول المنتدى معمول.. يعني اللي أنا بقوله ده كنت، معذرة يعني، كنت محتاج يا محمود (عصمت، وزير الكهرباء والطاقة المتجددة) إن حد يشرحهولي، ده أنا بقعد مع محمود نكسّر دماغات بعض، وقبل منه الدكتور شاكر (محمد شاكر وزير الكهرباء السابق)، وأحمد (كجوك)، وكريم (بدوي وزير البترول)، ويستحملني وأنا بقول له كلام هو مالوش ذنب فيه كريم، محتاجين تقفوا جنب بلدكم كلكم مش جنبي (تصفيق)  انتبهوا...

(قطع في التسجيل)

(...) وعشان كدا ما كسبتش الموضوع يكمل كدا وأنا بقعد أسمع من زمايلي كل اللي بيتقال وكلام صحيح، بس كل طرح اتقال هنا ياخد له 5، 6 سنين يتعمل، ومليارات الدولارات مش موجودة، أنا بيجي لي رسوم أو الـ.. المبالغ اللي بيتم آآ.. تسديدها لوزارة الكهربا، وأراجع محمود عصمت وقبل منه الدكتور شاكر، وألاقي إن فيه 25 مليون مشترك، يا عصمت؟ ال 25 اللي إحنا بنديهم يعني الكهربا بتكلفة أقل 25 مليون مشترك ولا؟ طيب، فكان حد يقول إيه، يروح كاتب حد في الجورنال يقول إيه، خذوا من الأغنيا وسددوا عن الـ.. عن الباقي، هو الأغنيا كام؟ الرقم اللي باخده من الأغنيا، حتى لو كان أكتر وده مش حقيقي، حتى لو كان أكتر وده مش حقيقي، لا يساوي أي رقم يقدر يسدد عن الغلابة.

وأنا قلت لكم امبارح وقلت وبقولها تاني، التحدي بتاع الدولة المُتحضرة والشعب المُتحضر إنه عايز يعيش مستوى قد تكون قدرات الدولة مش قادرة توفره. فـ.. طب.. في ظل اللي بيتعمل ده، واللي بيتقال، هو أنا.. قلت عامل المؤتمر ده عشان خاطر الحكومة، اندهش جدا الدكتور مصطفى (مدبولى، رئيس الوزراء) قلتله لو سمحت أنا عايز مؤتمر لمدة أسبوع نتكلم فيه مع الناس، عشان هم يشوفوا اللي عملوه ويطمنوا بيه ويسعدوا، لأن بقت فيه حالة قدروا خلال السنتين 3 إنه يعملوا حالة عدم رضا ويبيعوها لكم، يقول لك الحاجة غالية، يقول لك ما هم مش عارفين يدفعوا رسوم مستحقات الأجانب، ما هو الـ.. الـ.. تكلفة الكهربا غالية، وفعلا الطاقة بتعمل كل حاجة في التسعير، لو غليت البنزين الميكروباص هيزداد سعره، والعربية النقل اللي بتشيل الـ.. منتجات الناس وحركة الناس هتزيد، فإنت بتحس بيها.

بس قولوا لي إيه هو الخيار البديل، هو أنا بتعتبروني يعني ولي الأمر، مش كدا؟ أو الأب؟ طيب كويس، الأب ليه موازنة، ليه قرشين بيقبضهم، هي موارد دولته، هي موارد دولته، زادت، يقدر يعمل ويوسع، ما زادتش ما يقدرش. فلما تلاقي الدين الداخلي والخارجي زاد، إنت زودتها ليه، الدين ده إنت جايبه ليه، يعني هو إحنا بناخده نفرقه على بعض، ما هو إحنا لو بنفرقه على بعض ليكو حق علينا، ومش مؤتَمنين عليكم ولا على مستقبل.. مستقبل البلد دي ولا أولادها، لكن هي الحكاية مش كدا.

ودي القضية اللي كانت موجودة قبل 2011، طب لما إنتو جيتوا بقى، وكانوا قبل ما يجوا يقول لك إيه، إحنا معانا.. معانا 200 مليار دولار آآ.. أرصدة الإخوان، أجيب لكم الجرايد؟ قالوا إيه، 200 مليار دولار، فمدام.. معانا 200 مليار دولار هنحل المسألة بقى، الناس كلها في مصر طيبة، لأ، والله العظيم لأقف أنا وإنتم قدام ربنا يوم القيامة، ويفصل بينا إن كنا ظلمناكو ولا لأ.. شكرا.

...

1:05:16

السيسي: يا كريم (بدوي، وزير البترول)، مديونيتك كام كقطاع بترول؟ قوله في الميكروفون.

وزير البترول: المديونية  تريليون.. تريليون و600 يا دولة الرئيس، لغاية 30 يونيو.. 30 يونيو 26 المجموع.

السيسي: أنا بس أحمد (كجوك) بيتكلم على الموازنة العامة وجهده فيها، وإحنا.. ده مقدر يا أحمد، مقدر جدا. أنا فيه سياق أنا بتكلم بيه، السياق الهدف منه يا أحمد هو طرح حقيقي لحال الدولة المصرية في مواجهة تحدياتها، من ضمنها قطاع الطاقة اللي إنتو بتتكلموا فيه. أنا ما قلتش إنك إنت تجيب موضوعات أخرى ونحمّلها على الموضوع ده، وعشان كدا قلت إيه، طب هو، طب ليه الكهربا ما اديتلوش؟

وزير المالية: ما عندوش.

السيسي: ما عندوش ليه؟

وزير المالية: عشان بيبيع بأقل من السعر اللي هو بيتحمله.

السيسي: طيب ما هو ده اللي إحنا يا جماعة بنقوله للناس ببساطة، لو سمحتم مفردات الكلام اللي تتقال للناس في الوضع اللي إحنا فيه غير المفردات اللي بتتقال وإحنا قاعدين قعدة في المكتب عندي، لا لا، عايزين تبقوا صادقين واضحين مباشرين، جد ولا.. أحمد، جد ولا إيه؟ إنت يا محمود بتديله حق الوقود اللي إنت بتاخده منه؟

وزير الكهرباء: مـ.. لا طبعا، لا يا فندم.

السيسي: قولها.. ما تقولها كويس. (قطع في التسجيل) (تصفيق)

هو إنت بتاخدهم من جيب (يضحك الرئيس).. بتدفعهم من جيبك ولا هتاخدهم لجيبك يا محمود؟ يا جماعة.. يا مصريين.. أنا بقول ده كله لحاجتين، عشان الحكومة دي اللي كانت زعلانة قوي ووصلت لمرحلة إن هي تقول لك إيه، نمشي، كلهم، بيشتمونا، بعد كل اللي إحنا بنعمله قاعدين بنبذل أقصى ما وسعنا، لأن كل طرح بيتقال من متخصص، مثلا، مخزونات للبترول في مصر لمواجهة الطوارئ، إحنا عملنا 33 مليون إجمالي؟ 33 مليون برميل موجودين، المخزون ده اتعملوا أيام طارق الملا (وزير البترول السابق)، صح كدا يا طارق ؟ 33 إيه، يكفوا 6 ل 8 شهر؟ مش كدا؟ طيب كويس قوي.

إذن.. طب ما هم ما إيه المشكلة؟ هم موجودين واتعملوا، بس ما اتمالوش.. ما إيه يا فندم، مفيش فيهم بترول.لأن عشان نجيب نحط فيهم بترول تقريبا من 2 ل 2 ونص يا كريم مليار؟ ها؟

وزير البترول: 2 ونص مليار دولار.

السيسي: ما أنا عارف.. طب ما طب ما تجابوش ليه؟ لأن هو هيدبّر فلوس للشركا الأجانب، ولا للمنتجات اللي بيجيبها، ولا للمخزون الاستراتيجي د؟ بالراحة.. بالراحة، هيدبّر فلوس، وأحمد هيدبر له فلوس، اللي يدفع الشركاء الأجانب ال 6 ونص ولا 7 مليار دولار اللي كانوا علينا عشان يبقى شكلنا محترم قدام الشركا الأجانب اللي معانا، وعشان هم كمان يضخوا استثمارات في تطوير الـ.. الحقول اللي عندنا مش كدا والآبار؟ طيب.

فدبّر له ال 7 مليار أو بشكل أو بآخر خلال سنة مش كدا، خلال سنة؟

وزير البترول: صح، ادبروا سنتين صح.

السيسي: ها؟

وزير البترول: صحيح ادبرّوا واتدفعوا بالكامل 10 يونيو 26.

السيسي: فإحنا خلاص، طب ده جا.. طب وفي نفس الوقت مطلوب فلوس كمان إن هو يجيب له المنتجات المطلوبة سواء كان بترول أو غاز عشان يلبي طلبات الناس في حدود نص 3، 3 وشوية مليار دولار في الشهر مش كدا يا أحمد.

وزير المالية: صح.

السيسي: طيب، البنك المركزي هيوفر له الدولار، بالراحة.. بالراحة بالراحة بالراحة، ما تقوليش ماليش دعوة، يا مصري، يا مواطن، ما تقوليش ماليش دعوة، لا اسمع ده، واسمعه كويس.

هو محتاج يروح للبنك المركزي يديله كاش مصري، والتاني، والبنك المركزي يديله إيه؟

وزير المالية: دولار.

السيسي: دولار، طب ال 3 مليار دولار في الشهر أو ال 2 ونص مليار دولار في الشهر، 3 يا كريم ولا كام؟

وزير البترول: هما دلوقتي 3 و400 بالأسعار اللي هي الحالية.

السيسي: خليهم نقول 3 عشان نعرف نحسب، يعني 150 مليار جنيه، ال 150 مليار جنيه دول المفروض ياخدهم من حاجتين الـ.. الـ.. يعني، المشتركين، سواء كانوا صناعة أو آآ.. منازل مش كدا يا محمود؟ ها؟

وزير الكهرباء: المنازل 40...

السيسي: يعني ماليش دعوة، تيجي الفلوس دي من هنا، يا من ده يا من ده أو الاتنين مع بعض، أو تمن العربيات اللي ماشية في الشـ.. الوقود اللي بيتباع في الشارع، الاتنين دول مع بعض المفروض يوفروا 150 مليار على الأقل إن ما كانش أكتر، نديهم لكريم، وكريم يديهم للبنك المركزي، والبنك المركزي يديله 3 مليار دولار أو آآ.. 3 مليار في 50 بكام؟ 150 مليار، 150، طيب.

لما تيجي تقول لكريم، تقول ل.. لمحمود، قولي دخلك الشهري كام اللي بتبيع بيه كهربا للناس، ولو سمحت علي صوتك.

وزير الكهربا: إحنا بالنسبة للي إحنا بنبيع بيه كل الكهرباء في السنة حوالي...

السيسي: لأ في الشهر من فضلك.

وزير الكهرباء: آآ.. إحنا بناخـ.. بناخد من الغاز 25 وبنحصل فلوس أقل من كدا.

السيسي: لا دي مش إجابة.

وزير الكهرباء: بحصل 20 مليار يا فندم في الشهر.

السيسي: كام يا فندم؟

وزير الكهرباء: 20 مليار.

السيسي: طيب، المفروض الـ.. 20 مليار دول يبقوا كام؟

وزير الكهرباء: لو.. لو إحنا بنتكلم على سعر التكلفة اللي موجود دلوقتي من غـ.. على ال 4 اللي أنا باخد بيهم من كريم المفروض الرقم ده يبقى حاجة و30، لو رحنا لسعر الغاز الحقيقي إحنا بنضرب الرقم ده في 8 المفروض يكون 160 مليار.

السيسي: طيب إحنا مش هنقول 160 مليار دولار، هنقول 100 مليار دولار، هنقول 80 مليار دولار، وإنت بتديله 20، مش كدا يا دكتور؟ 20 مليار.

مع الوضع في الاعتبار.. الوضع في الاعتبار إن أي وزارة ليها تكلفة تشغيل، يعني إيه تكلفة تشغيل يا محمود، إنت عندك محطات بتعملّها صيانة وبتعملّها إحلال، وعايز تعمل توسعة للجديد، فإنت عايز استثمارات، عايز فلوس تعمل محطة جديدة حتى لو كانت طاقة شمسية أو طاقة رياح أو طاقة نووية، عايز فلوس لها، فده استثمارات إنت محتاجها. طيب عايز تدي مرتبات للناس اللي بتشتغل عندك ولا أنا مش واخد بالي؟

وزير الكهرباء: آه طبعا.

السيسي: فإنت بتاخد حقك وتديله اللي باقي مش كدا ولا أنا مش فاهم صح.

وزير الكهرباء: تمام يا فندم.

السيسي: بتاخد بتخلص نفسك وتدي لكريم ال 20، 20 بقى كريم بقى يدبر نفسه مع وزير المالية أو فريق عمل صحيح، يقوم كريم يدبر نفسه في ال 70، 80 مليار اللي مستنيين في ال.. على فرضية إن تكلفة البترول والغاز، آسف، الوقود بنزين والسولار والغاز اللي بيتباع للسيارات، ده يعني بدون آآ.. دعم، مش كدا؟

وأنا لما جيت شرحت الموضوع ده من حوالي سنة، قلت يا جماعة حجم التكلفة بتاعة وزارة البترول للطاقة كذا، المتاح منها كذا، والباقي ده دعم من الدولة. طب النهار ده لو وصل، يعني، وصل برميل البترول ل 150، على طول الغاز بيبقى مكافئ ليه ويزيد بنفس السعر يعني.

طب هتعملوا إيه؟ لو جيت قلت لكم هتستحملوني إن أنا آآ.. 4، 5، 6 ساعات، وأرجو إن الناس الإعلاميين ما ياخدوش نص كلامي ويسيبوا الباقي، يا تقول سياق على بعضه، يا ما تقولش.. وجيت قلت لك إن أنا هضطر إن أنا أوقف الكهربا لمدة 4، 5 ساعات يوميا، هتستحملني ولا تقولي الجو أنا مش آآ.. وحد الصناعة بس عشان الدنيا تمشي، وما يبقاش فيه تأثير سلبي على الـ.. على الإنتاج وعلى البطالة وعلى وعلى.. طب المواطن اللي موجود في البيت ممكن يستحملني؟ مش يستحملني أنا، يستحمل مين؟ يستحمل مين؟ ها؟ يستحمل مين؟ يستحمل بلده، يستحمل مين يا فندم؟ بلده يا فندم، مش أنا يا فندم.

أنا إن كان عليا زي ما قال كدا أحمد (كجوك)، الرغبة قد الدنيا، بس مش كل اللي الواحد بيتمناه هيوصلوله دلوقتي، لأ هنوصله بفضل الله سبحانه وتعالى، وفيه كلام كتير بيتعمل آآ.. يعني عشان محاولة لحل المسألة، المسألة بتاعة التحدي اللي موجود لمصر في ديونها الداخلية والخارجية، فيه جهد بيتعمل، بس وإحنا بنتكلم على الطاقة، ده استنزاف مستمر.

طيب، أحمد، إنت حجم الدعم اللي بيُقدم على مدار السنة في كل النواحي رقم على بعضه.

وزير المالية: الدعم المالي...

السيسي: كل الدعم.

وزير المالية: كل الدعم المالي المباشر 840 مليار جنيه العام الحالي، ده كمان ما فيهوش تكلفة غير مباشرة، يعني لو حطينا عليه كمان تكلفة، لو ده اقترضناه، لو حطينا عليه 20% كمان تكلفة الاقتراض دلوقتي متوسط التكلفة، إحنا بنتكلم على  تريليون جنيه على الأقل بيتم دفعه في باب الدعم والحماية الاجتماعية.

السيسي: أنا عايز أقول لل.. أنا مش بخرج عن سياق الطاقة ولا الكهربا ولا حاجة، أصل هو الموضوع كله على بعضه، الموضوع كله في كل التحديات اللي بتقابل الدولة المصرية، في قطاع التعليم والصحة والبنية الأساسية والطاقة والاستثمارات، وأي حاجة بتفكروا فيها هي كلمتين بس، بكام ومنين؟

زي أي بيت، مش إنتو في البيوت عندكم لما يجي حد من الـ.. من الأبناء يطلب منك حاجة، تقوله اللي إنت عايزه ده بكام؟ إن كان متاح بتجيبه له، مش متاح بتقوله اصبر عليا شوية. هو المطلوب لدولة زي مصر إيه، اصبر عليا شوية، مش عليا أنا، عليها، لأن هي ماشية على الطريق. طب كل ده ليه؟ عشان أفكركو بـ 2011، لما خدتوها ل.. كسرتوها، التمن لغاية دلوقتي.

والله العظيم أنا ما بخوفكم خالص، وأنا معنوياتي في السماء جدا، وأنا بقول لكم كدا، ليه؟ لأن ده بيأكد لنا إن ال 14 أو ال 12 سنة اللي فاتو كان فيه إيد كريمة حاطة إيديها على مصر.

وزير المالية: ونعم بالله.

السيسي: كان فيه إيد كريمة، ربنا، رغم كل اللي إحنا بنحكي فيه ده، خلاها بالمستوى اللي إنتو شايفينه ده، مين؟ ربنا، فلازم أذكره وأشكره. (تصفيق)

(قطع في التسجيل) إوعوا تتصوروا إن أنا بتكلم كلام لطيف وبرقق القلوب؟ لا والله، اللي إحنا بنتكلم فيه ده هو حديث الدولة والحكومة من أول أنا ما توليت واللي قبل مني، وأيام الدكتور حسن (وزير الكهرباء والطاقة في عهد الرئيس الأسبق حسني مبارك) اللي كان وزير الكهربا كان ما عملش محطة ليه؟ ليه؟ عشان هو مش عارف إن في محطة؟! عارف إن فيه محطة، بس ما فيش فلوس للمحطة، وبيقولوا له ما تجيبش محطة عشان ما نستلفش، عشان إيه، ما نستلفش، ما عارف إن ما فيش أيام 2012 لما ما بقاش فيه وقود، الفيلم الفيديو اللي إنتو جبتوه في الأول.

أنا كنت ببقى قاعد في مجلس الوزرا مع هشام قنديل وكنت وزير دفاع، هشام قنديل ده اللي هو رئيس وزراء إيه، الإخوان، فـ.. انا راجل صادق مع بلدي، أنا همي بلدي مش همي حاجة تانية خالص، كنت أقول لهم: قولوا للناس إن إنتو مش قادرين، قولوا للناس إن إنتو مش قادرين، ما فيش، جبتوها على الأرض وبقى ما فيش، فإنتو لا عارفين تجيبوا لا بترول ولا غاز ولا هتقدروا تشغلوا محطات الكهربا.

المشكلة سهلة خالص، قرشين، مش موجودين هيبقى فيه مشكلة، موجودين مفيش مشكلة، الكلام ده معروف لأصغر اقتصادي، جوه التفاصيل بتاعة أي حاجة بنتكلم فيها.

مثلا، لو أنا عايز أعمل 20 جيجا طاقة شمسية، يعني 200 ألف ميجا طاقة شمسية، طيب، بعيد عن ال 1000 ميجا طاقة شمسية، تتكلف كام يا محمود؟

وزير الكهرباء: تتكلف 380 مليون دولار يا فندم.

السيسي: يعني كام تقريبا..  يعني 20 مليار.

وزير الكهرباء: 20 مليار.

السيسي: ال 1000 ميجا تتكلف 20 مليار جنيه لو أنا عايز أعمل طاقة شمسية، بس بالدولار يعني، بس عشان أعملها بردو عايز ال 20.. عايز آسف الـ.. الـ 20 مليار جنيه، وعايز أخلي الشبكة تقدر تشيل وتنقل.. تنقل الكلام، وعايز محطات التحكم تبقى قادرة عشان زي ما أحمد قال كدا الطاقة دي ما تـ.. ما تضيعش علينا بعد ما.. ما ننتجها.

حتى الـ.. بيقول.. يعني مثلا أحمد بيقول إيه، الـ.. أنا سمعت وفهمت البطاريات ومش البطاريات.. لما تطرحها بالطرح اللي إنت سمعته ده، وأنا بسمعه منك يا أحمد، أكن الموضوع محلول، طب ما تقولي البطارية اللي بتشيل 100 ميجا بكام يا محمود، ما تقول.

وزير الكهرباء: البطارية 200 مليون تقريبا 180.. 200 مليون دولار.

السيسي: يعني عشان أنا أجيب بطاريات تتخزن فيها طاقة شمسية 1000 ميجا عايز 5 مرات في كام، في 200، يعني كام؟

وزير الكهرباء:  مليار.

السيسي:  مليار دولار، يعني كام؟ 50 مليار جنيه. مش كدا يا دكتور؟

وزير الكهرباء: دي لمدة صـ.. مدة معينة...

السيسي: ها؟

وزير الكهرباء: وهتبقى لمدة معينة يعني مش تخزن على...

السيسي: لا ما أنا فاهم، ده هو عشان بردو محمود بيكمل لي الكلام، إن إحنا بنقول 4 ساعات، مش كدا يا دكتور؟ لو أنا جبت بطاريات تاخد من الطاقة الشمسية بالنهار وتخزنها وتضخها في الـ.. في الشبكة بالليل هتشتغل 4 ساعات بس، لأن هي ساعتها كدا، الدنيا هتتغير بعد سنة واتنين وتلاتة ممكن العملية تزيد. لكن أنا على كل حال عشان أخزن 1000 ميجا طاقة شمسية عايز  مليار دولار.

فـ.. طب الكلام اللي بيتقال من المتخصصين، ده يتقال هناك في الـ.. في اللقاءات بتاعتنا، لكن للمواطن المصري تشرح له كدا. الكلام ده أنا كنت بقوله أيام آآ.. الرئيس مبارك، أقول ما بيقولوش ليه؟ مش يحكوا للناس الحكاية، هو إنت فاكر نفسك إنك إنت ولي الأمر، ما تشرح لولادك، ما تشرح لشعبك. وأنا أتصور إن أكتر واحد اتكلم في تاريخ الدولة المصرية الحديثة دي، أنا، وعمري ما كدبت عليكم في حاجة. (تصفيق)

ما تمشيش في الشارع وتديني ضهرك، ما تمشيش في الشارع وتقول لي أنا مالي، لا إنت مالك، لأن أنا وإنت واحد، أنا ليا فيها زي ما إنت، بس أنا هنا وإنت في.. في آآ.. مسؤول مني، لكن إحنا واحد، لينا فيها زي بعض وعلينا فيها زي بعض، اشمعنى أنا أخاف عليها وإنت ما تخافش يعني؟

فالفكرة كلها في كل الكلام اللي إنتو بتقولوه، إنتو بتكلموا بعض، إيه يا دكتور؟ بيكلموا بعض، إوعوا تزعلوا مني.. وممكن تكون بتكلم بعض الناس هنا، صف اتنين تلاتة.. لكن أنا بكلم المواطن اللي قال الكهربا غالية عليا.. اللي هو البسيط.

...

1:30:10

السيسي: هنا الجلسة دي كانت للطاقة، طب لما نيجي نتكلم على التعليم نقوم نتكلم بشكل تاني خالص، لكن بردو مش هيبقى مرضيين فيه، لأن هو في الآخر قُدرات. تيجي تتكلم على الصحة تقول أنا المستشفيات مش عاجباني، صحيح ليك حق، بس بردو لأن إحنا بنتكلم بشكل قطاعي، أو قطاع الصحة، قطاع التعليم، قطاع الطاقة آآ.. قطاعات، لكن لو إحنا النهار ده بنتكلم نظرة شاملة، حط ده جنب ده جنب ده، المحصلة تبقى إيه؟ المحصلة تبقى إيه؟

وأنا لما بقول الكلام ده يعني لكم، الدكتور مصطفى قالها كدا على استحياء، الأذرع.. الإيه؟ الأذرع .. يعني.. يعني فيه جهد وأفكار بتتعمل لمحاولة إيجاد حلول لدعم المسار اللي إحنا ماشيين فيه، عشان لما نيجي نقول في 2030 كل التخطيط اللي إحنا عملناه، كل التخطيط اللي إحنا عملناه يتحقق، وييجي الـ.. صندوق النقد الدولي يقول إن المسار المصري في الإصلاح الاقتصادي، قال إيه؟ غير متوقع، مش ممكن إنتوا بتعملوا إيه؟ مش كدا يا أحمد، يعني بعد كل اللي أنا بحكيلكو ده.. بحكيلكو ده، المسار الإصلاح الاقتصادي في مصر مبهر وغير متوقع، آه، فأقوم ألاقي أنا الحكومة محمود عصمت زعلان، وألاقي أحمد كوجك زعلان، وألاقي كريم زعلان، وألاقي خالد عبد الغفار زعلان، خير خير في إيه مالكم؟ (قطع في التسجيل)

قاعدين على مواقع التواصل وعلى في الإعلام وعلى المقالات اللي بتتكتب ومش عارف إيه، فـ.. الضغط جامد على الحكومة يعني، ولو كان التغيير هيحل المسألة كنت عملته على طول، لأن دي أمانة في رقبتي يعني. لكن الحكاية إن أنا عارف، فأنا في.. في الـ.. في السياسة والمكر السياسيين يقولك إيه، اغسل إيديك بحكومة جديدة، بس أنا ما أبقاش شريف، ما أبقاش إيه يا أحمد؟ ما أبقاش شريف، ما أبقاش شريف (تصفيق)

لو عملت كدا، وعشان إن أنا أخلـ.. أستوعب الرأي العام، أستوعبه وكدا، طب غير حكومة يقوم يصمد، الحكومة تصمد، أو الرأي العام يصمد معايا سنة ولا اتنين كمان، بردو يزعلوا، غير الحكومة تاني، الرأي العام يصمد معايا سنة ولا اتنين، وأدينا قاعدين بقى، لكن أنا هروح من ربنا فين؟ هروح منه فين؟ (تصفيق)

فماقدرش، أنا عارف الحكاية و.. ومع بعضنا وبنجري وبنعمل، إن وفقنا ده فضل من الله، وإن ما وفقناش ربنا يا رب يوفقنا... أنا عايزكم إنتو بس تعرفوا الحكاية وأنا هسيبكم لنفسكم، إحنا عملنا المنتدى ده عشان الناس البسيطة تسمعه، لكن المتخصصين، رغم إن ده أمر مهم إن هم يتكلموا عشان حتى لأن فيه ناس موجودة في الحكومة وفيه ناس موجودة في الجامعات وفي الـ.. متخصصة وبتفهم، فهي بردو بنكلمها بقدر الإمكان آآ.. عشان هم يبقوا عارفين إن إحنا اللغة واحدة، اللي بيطرحوه واللي إحنا بنتكلمه وبنعمله زي بعضه تقريبا.

بس هي الفكرة كلها إنك إنت بتتكلم، ولكن المدى الزمني والتكلفة المالية لازم تتحط في الاعتبار، أي موضوع بنتكلم فيه، عشان تقول النهار ده اعمل لي 5000 ميجا، ده شمس صحيح، طيب، انتبهوا لكلامي كويس من فضلكم.

هقولها تاني، إن المرء ليصدق ويتحرى الصدق حتى يكتب عند الله صديّقا، وإن المرء ليكذب ويتحرى الكذب حتى يكتب عند الله كذّابا، ربنا يجعلنا من الصادقين والصديقين. (تصفيق)

يعني إيه الكلمة دي. أنا ممكن حضرتك تقولي كلمة تقولي آآ.. عنوان، أقوم أنا آخده أقوله، فأنا أبقى صادق وأنا قلت الحكاية دي قبل كدا، أبقى صادق إن أنا قلت أنا فعلا ما ادعتش حاجة، إنت قلت كدا وأنا قلت الكلمة دي ونقلتها، الصدق إنك تفتش في الكلمة وتذاكرها كويس وتعرف أبعادها قبل ما تقولها، ده الصدق اللي هو إيه، يتحرى، تحري الصدق هنا، إنتو بتقعدوا على موقعا لتواصل وعلى التليفون تعملوا لايكات وتعملوا مش عارف إيه وأنقل واعمل... وإنت ما إنتاش عارف إنك إنت بتحمل نفسك بأوزار لا يعلمها إلا الله، والله العظيم التليفون اللي معاكو ده يا حسنة جارية يا سيئة جارية.

هقولها تاني، التليفون اللي معاكم ده، أنا خرجت عن السياق؟ لا لا.. التليفون اللي مع حضرتك ده، اللي بتعمل له شير ولايك وكلام.. أنا ما عنديش تليفون، خالص خالص، أنا معايا تليفون مفيش فيه الحاجات دي، يا صدقة جارية يا سيئة جارية، كل كذبة أو افترا أو ادعاء غير حقيقي تاخد أجره إساءة عند ربنا.

إذا كنا فاكرين إن إحنا هنقابل ربنا، كلنا بنتكلم عنه سبحانه، وبنتكلم على لقاؤه، آه، لكن يقين اللقاء أمر تاني، يقين لقاء ربنا، يوم يقوم الناس لرب العالمين، يوم يقوم الناس لرب العالمين.

فـ.. نرجع تاني أقول إن إحنا لما بنشرح لكم هذا الشرح بهذا الطريقة للمواطن المصري، عشان، لأن في 2014 عملنا اسمها الخطة العاجلة، عملنا إيه؟ الخطة العاجلة، فـ.. الخطة العاجلة دي كانت محاولة لتخفيف عُمق الأزمة بتاعة الكهربا بشكل عاجل وسريع، فبعد ما اتكلمنا مع الموضوع ده وكلمنا إن إحنا هنعمل الموضوع الخطة العاجلة دي، فجه الدكتور شاكر (محمد شاكر وزير البترول السابق) بيني وبينه وكدا، قال لي إنت بتتكلم بجد؟ إنت هتعمل الخطة دي؟ دي غير اقتصادية، دي إيه؟ غير اقتصادية، قلت له أه، قال لي ليه؟ قلت له إن تكلفة عدم عمل الخطة أخطر على الأمن القومي المصري من التكلفة الاقتصادية.

هقولها تاني، عشان حاجة واحدة تعملوها، انتبهوا وإنتو بتختاروا للمكان ده حد تاني، انتبهوا وإنتو بتختاروا للمكان ده حد تاني، قال لي إنت بتتكلم بجد؟ عايز تعمل خطة عاجلة.. داخلة كانت بكام مليار يا دكتور.. 2 ونص؟ فكان الطرح سريع...

عايز تقول يا محمود؟ عايز تقول إيه؟

وزير الكهرباء: معلش يا فندم هقول الوجه التاني للموضوع بتاع مثلا المحطات الجديدة بعد إذن حضرتك آآ.. عشان يبقى باين بردو التأثير عشان إحنا جبنا فلوس أو استلفنا أو خدنا..  إحنا وفرنا 22 مليار متر مكعب غاز بـ 13 مليار دولار من محطات سيمنز اللي بتشتغل بمعدلات كفاءة عالية...

السيسي: ده موضوع تاني.. ده موضوع تاني.. لا لا لا استنى بس، إحنا كدا يعني الفكرة أكنك داخل في منافسة مع الواقع بإنك إنت عملت وبتعمل كويس، القضية دي ممكن تتعمل في كل وقت إنك تعمل محطة والمحطة دي تبقى اقتصادية جدا، إنما هي الأساس في الموضوع هو منين وبكام؟ أو بكام ومنين؟ ها؟

هتجيب الفلوس منين للمحطة دي؟ طب إحنا وإحنا بنتعاقد آآ.. السيمنز دي كان 2015، وكان تقديري للألمان وللمستشارة ميركل في الموضوع ده ما زال قائم لغاية دلوقتي، كل الاحترام والتقدير لهم وللشركة دي، ليه؟ في 2015 عملنا مؤتمر في شرم الشيخ للاستثمار، فجاب لي الدكتور شاكر ربنا يديله الصحة والاحترام كله ليه ولكل اللي عمله، فجا قال الـ.. كايزر اللي هو مدير الشركة آآ.. وافق  إنه يدينا المحطة برقم ساعتها، فجه قعد معايا رئيس الشركة، فقلت له آآ.. خلاص بقى كـ.. يعني الدكتور شاكر كان وصل للسعر اللي هو ممكن نتعاقد عليه يعني، واخد بالك يا محمود، وصل للسعر اللي ممكن نتعاقد عليه، فقلت قلت له أنا هطلع أقول إنك إنت دعمت مصر وشجعتها لو شلت لي 400 مليون دولار من المحطة، لو شلت لي إيه يا محمود، فهو الراجل يعني 400 مليون دولار خلاص يعني مفيش يعني، قلت له أنا هطلع أقول في المؤتمر، وأنا قلت في المؤتمر كدا، إن شركة سيمنز شالت من الرقم 400 مليون دولار دعم لمصر، وهقول دعم لمصر، كدا يعني، يمكن كان فيه أسباب أخرى للشركة عشان توافقني لكن في النهاية ده التوفيق بتاع ربنا لينا، فقال لي طب خلاص أنا موافق، أنا آسف اللي هقوله لكم، وهو خارج من على البوابة قلت له تعالى، هاخدهم 3، هاخدهم إيه.. ال 13 مليار دولار اللي إنت بتتكلم عليهم دول ده توفيق ربنا لينا عشان عارف بظروفنا، لكن اللي أنا عايز أقوله إن الخطة العاجلة لما اتعملت طبقا للمسار اللي اتعملت بيه كان مسار مش اقتصادي، كان مسار أمني، الفترة بتاعة من 2014 كانت كلها محاولة لاحتواء حالة.. حالة التظاهر، وحالة الفوران اللي لدى الرأي العام في مصر، عشان يهدى ويخلي باله من بلده، فكان فيه خطة لاحتواء الرأي العام في مصر، وكان من ضمنها إن آآ.. حالة الفوران اللي تمت في 11 و12 ومع الإخوان في 2013 مش هتنفع تستمر، الدولة بيها هتضيع.

فكان من ضمنها إن الكهربا لو ما كانش الصيف اللي بعده، زي ما قلت كدا للدكتور شاكر، واعملوا تعاقدات دلوقتي مع كاتربيلر وكلام من هذا القبيل، مش كدا، عشان تتحط تنزل المحطات المحمولة دي وتتجهز في خلال 6 شهور نخش على الصيف ما يبقاش فيه قطع للكهرباء.

في دول تانية.. في دول تانية الناس ما بتعملش كدا، ومصر للعدد ده يبقى فيها 60 ألف ميجا؟ مش كدا؟ زعلان الدكتور مصطفى بيقول لي قول ال 64 كاملين، بقول رقم يتحفظ، حقول 65، وتكملوهم 65 يا محمود طاقة جديدة ومتجددة.

وزير الكهرباء: تمام يا فندم.

السيسي: فـ.. أنا آسف إن أنا عطلتكم، لكن السياق بتاع الطرح رائع ومحترم وكل كلمة إنتو قلتوها مُقدرة والله، وإحنا نتمنى إن إحنا نعملها مع بعضنا يعني و.. ولو إحنا مع بعضنا كلنا كناس مسؤولين سواء كانوا في الحكومة أو ربنا حباهم العِلم والمعرفة والخبرة وما كانوش حتى في الحكومة، فـ.. ويعني الذاتية ما بقتش موجودة في أنفسنا، وبقى دايما مخلصين للفكرة ومخلصين لرب العالمين في طرح آآ.. رؤانا وكلام من هذا القبيل، أكيد ربنا هيوجد لنا سبيل لحل المسائل دي.

بس آآ.. الكلام اللي أنا قلته لكم مرة قبل كدا، وقلت لكم هاتوا أول لقاء وحطوه هنا، هاتوا أول لقاء، ما قلتلكمش غير العمل والصبر، ما قلتش حاجة تانية، ما قلتش هحلها، ولما اتكلمت قلت الدول بتقوم في 50 و100 سنة، بعد اللي حصل في 2011 الدولة المصرية تاخد وقت كبير قوي عشان تسترد عافيتها.

الـ.. اللي بيحصل مش عشان أنا موجود هنا، لأن العمل ده عمل جماعي لكل اللي كانوا موجودين في الحكومة دلوقتي أو اللي قبل منهم، من أول المهندس إبراهيم اللي كان واقف جايبينه في الفيديو مكسوف وزعلان ومحرج، وإيه؟ محرج من الناس، الكهربا والله وإحنا عارفين وهنحاول، لا الـ.. الكلام مش إحراج، الإحراج لما ما عملش اللي عليا أداري صوتي يوطى لما ماكونش عملت اللي عليا، أتداري لما ما عملش اللي عليا ،أتكسف، لكن عملت اللي عليا لا لا لا لا، ده الـ.. يمكن حد تاني يعرف يعمل أحسن من كدا؟ يا رب يوفقه، يا رب يوفقه.

اللي اتعمل في ال 12 سنة اللي فاتت ده فضل من ربنا وبكررها وأظن دي مش أول مرة، كل مرة أقول الفضل والمنة والكرم من صاحب الكرم اللي حماها في 2011 و12 و13 من أن تتحول إلى دولة فاشلة فيها 60 مليون تحت سن ال 40 كشباب ممكن يولع أي حاجة، نجاها وموقعي في الوقت ده والمسار بتاع الأحداث اللي تعرفوه واللي ما تعرفوهوش يقول إنها ما كانتش والله العظيم والله العظيم ما كانتش تنجى أبدا.

أنا ماعرفش آآ.. هو عايز يقول سبحانه.. هو عايز يقول سبحانه: أنا الملك اللي عايزه يكون واللي مش عايزه مش هيكون، خططوا واتآمروا واعملوا على أي مستوى، لو رايد ينجح، لو مش رايد مش هتنجح، وعشان هو ما كانش رايد ما نجحتش... (تصفيق)

صدقوني أنا كـ.. كإنسان إنسان صادق إن شاء الله، ربنا نجاها، وبقول له يا رب والنبي لأجل خاطر النبي محمد، لأجل خاطر النبي محمد، وبسألك بكرمك ولطفك وحنانك ونور وجهك الكريم تكمل فضلك علينا. متشكر جدا. (تصفيق)

...

ألقيت الكلمة في فندق سانت ريجيس بالعاصمة الجديدة حيث شارك الرئيس عبد الفتاح السيسي في جلسة حوارية بعنوان "مسيرة الطاقة المصرية… إنجازات وطنية وآفاق المستقبل"، وذلك في إطار اليوم الرابع لأعمال منتدى مصر ٢٠٢٦، وذلك بحضور الدكتور مصطفى مدبولي رئيس مجلس الوزراء، وبمشاركة السيد أحمد كجوك وزير المالية، والدكتور محمود عصمت وزير الكهرباء والطاقة المتجددة، والمهندس كريم بدوي وزير البترول والثروة المعدنية، بالإضافة إلى عدد من خبراء قطاع الطاقة والمسؤولين.