- صفحة المتحدث الرسمي لرئاسة الجمهورية

نص كلمة السيسي خلال تفقده أعمال تطوير عدد من الطرق في القاهرة 19/11/2022

منشور الخميس 24 نوفمبر 2022

 

المهندس: سيادتك مشرفنا دلوقتي في محور جمال عبد الناصر يا فندم، اللي بطول 14 كيلو متر، يبدأ من تقاطعه مع الطريق الدائري، ووصولًا إلى تقاطعه مع طريق التسعين، وتم مراعاة تحرير الحركة المرورية طبقًا لأوامر سيادتك على المحور ده عن طريق إنشاء عدد 5 كوبري.

الكوبري رقم واحد يا فندم اللي هو كوبري تقاطع محور جمال عبد الناصر مع ميدان أربيلا، لربط مناطق التجمع التالت بمناطق جمال عبد الناصر. الكوبري رقم 2 لربط محور جمال عبد الناصر مع محور طلعت حرب ومنه لامتداد محور عزت عادل ومنه إلى مناطق زهراء المعادي. الكوبري رقم 3 اللي سيادتك مشرفنا عليه كوبري محمد نجيب تقاطع محور جمال عبد الناصر مع محور محمد نجيب، لربط مناطق القادم من الطريق الدائري الأوسطي ومناطق طريق التسعين الجنوبي ومنها إلى  طريق السويس. الكوبري رقم 4 يا فندم كوبري تقاطع محور جمال عبد الناصر مع شارع الجزيرة لربط مناطق التجمع التالت وكذلك الكوبري رقم 5 تقاطع محور جمال عبد الناصر مع محور العبور.

السيسي: أيوة يبقى إحنا عملنا محورين. محور عبد الناصر 14، والسادات برضه 14، مش كدا؟

المهندس: تمام سيادتك.

السيسي: لما ها نخلص الكوبري اللي ارتفاعه 45 متر ونعدي بيه المقطم، مش كدا؟ وشارع 9 والشارع الموازي ليه وياسر رزق، ها يبقى إحنا اتحركنا من مصر القديمة، مش كدا بردو؟

المهندس: بالظبط يا فندم.

السيسي: ها؟ لغاية الأوسطي، مش كدا؟

المهندس: بالظبط سيادتك.

السيسي: يبقى محور حر، أو محاور حرة، تقلل الوقت، وتقلل الكثافة بتاعة العربيات، مش كدا، وتقلل الوقود.

المهندس: بالظبط يا فندم.

السيسي: بدل ما كنا ها نلف حوالين هضبة المقطم، ها ناخد هضبة المقطم معانا، صح كدا؟

المهندس: بالظبط يا فندم.

السيسي: اتفضل.

المهندس: وجاري سيادتك الحمد لله دلوقتي يا فندم إحنا جاري دراسة الأماكن أسفل الكباري يا فندم صالح الاستثمارات إن شاء الله.

السيسي: طيب، لو أنا من جمال عبد الناصر أو محور السادات، وعايز أوصل لغاية الدائري، الأوسطي يعني.

المهندس: الدائري الأوسطي يا فندم.

السيسي: آه أعمل إيه؟

المهندس: عندنا سيادتك محور جمال عبد الناصر يا فندم بيربط على طريق محمد بن زايد يا فندم اللي سيادتك أمرت بتطويره دلوقتي يا فندم إن هو يبقى 6 حارة مرورية لكل اتجاه، بالإضافة لطريق خدمة هايبقى إن شاء الله 3 حارة مرورية لكل اتجاه. الطريق ده يا فندم بيربط على الطريق الدائري الأوسطي ومنه يا فندم الكوبري للربط على محور لاستكمال محور بن زايد من عند مسجد الفتاح العليم يا فندم.

المحور ده سيادتك بالعرض سيادتك صدقت إن إحنا نوسعه، كان 4 و4، ها يبقى سيادتك 6 و6 رئيسي، وإن شاء الله 3 و3 خدمة بإذن الله.

السيسي: طيب. فيه حاجة عايزين تضيفوها، حاجة هاتحسن حركة الناس أو (جملة غير واضحة)؟

المهندس: هو يا فندم الحمد لله بنهو أعمال المحور ده يبقى إحنا كدا استكملنا تطوير شبكة الطرق بالكامل في منطقة القاهرة الجديدة إن شاء الله، وبإذن الله يا فندم بمجرد نهو الأعمال بالكامل سيادتك في منطقة جنوب القاهرة يا فندم اللي هو تطوير شارع 9 بإذن الله، وده إن شاء الله مخططين زي ما سيادتك أمرت على نهاية الشهر عدا بس التعرض للرصيف اللي موجود. بالإضافة إن إحنا يا فندم إن شاء الله هايتم العرض على سيادتك الطريق الموازي لشارع 9.

السيسي: طيب. أنا جيت لك شارع 9.

المهندس: أيوة يا فندم.

السيسي: طيب، إحنا دلوقتي قلت لكم راجعوا شبكة الصرف الصحي، مش كدا؟

المهندس: تمام.

السيسي: بتاعة المقطم، لأن هو اتعملت في توقيت ما كانتش النشاط العمراني اللي موجود بالمستوى اللي موجود دلوقتي، وبالتالي بقى ضاغط على شبكة الصرف.

المهندس: بالظبط يا فندم، بالظبط يا فندم.

السيسي: الكلام ده عندك، مش كدا؟

المهندس: أيوة يا فندم.

السيسي: ها تخلصوه إمتى؟

المهندس: إن شاء الله يا فندم يعني لسه التوقيت بس نأكده وها نعرضه على سيادتك إن شاء الله.

السيسي: وإحنا الحتة الكوبري اللي هو بتاع محور الحضارات، شهر 3 ولا شهر 6؟

المهندس: شهر 6 يا فندم وها ينتهي.

السيسي: مش ممكن 3؟

المهندس: يعني إن شاء الله يا فندم أصل هو بس الكوبري ده مثلا كان اتعرض على سيادتك قبل كدا بس ليه سيستم معين في التنفيذ فـ...

السيسي: (يبتسم الرئيس ويضحك) طيب.. طيب، ربنا يوفقكو.

المهندس: تمام يا فندم.

السيسي: متشكر، متشكر.

المهندس: أوامر سيادتك. تحت أمرك.


تبادل الرئيس هذا الحوار مع أحد المهندسين على محور جمال عبد الناصر، وذلك خلال تفقده أعمال الإنشاء والتطوير لعدد من الطرق والمحاور بالقاهرة الكبرى.