نص تعليق ورد السيسي على مقال نيوتن عن تعيين حاكم لسيناء 22/4/2020


اللي موجودة وطبعا من خلال كمان العرض ده، الناس في مصر هاتشوفه، الناس في مصر هاتشوف الكلام ده كويس.

فبتتكلم عن الطرق العرضية والطولية اللي إنتم، اللي هي الشبكة الجديدة اللي إحنا حاطينها على سينا.. إنت بتتكلم على شرم الشيخ وخلصتوه.. بتتكلم على اللي هو نفق شرم الشيخ.. بتتكلم على نفق طابا وخلصتوه تقريبا..

فإنت وضح، يعني إيه، مش مسألة إن إحنا، يعني، بنعمل طرق ب35 مليار أو كده.. لكن ده، الطرق ديت، هاتعمل إيه في سينا؟ وبالمناسبة يا إيهاب عشان بس الرقم اللي إنت قلته مايتحسبش على ال.. إنت كهيئة هندسية، شغال، ورقم مايتنسيش، ب300 مليار، بلاش ال298 دي. ال300 مليار جنيه، ودايما وإحنا بنقول أرقام، نقول أرقام تقدر الناس تحفظها..

لكن لما نيجي نتكلم، إحنا اتكلمت في الموضوع ده قبل كدة يا دولة الرئيس، وقلنا إن إجمالي التكلفة اللي إحنا شغالين بيها، إحنا بنتكلم في 600 مليار، مش كدة؟ لسينا ككل، إنت اللي يخصك اللي إنت بتعمله.. وإحنا اتكلمنا وقلنا يا جماعة لو حد هايتكلم على مشروعات، يشير إن فيه (صوت غير واضح) للدولة، أنا يخصني منها كهيئة هندسية بنفذ المشروعات ديت بالتنسيق مع الشركات المدنية، بما قيمته ال300 مليار جنيه اللي إنت بتتكلم فيهم.

يبقى أنا بس الفكرة عايزين نقول للناس اللي موجودة بتسمعنا دلوقتي، وبتشوف.. سينا 60 ألف كيلو متر مربع، وأنا آسف إن أنا اتدخلت كدة، بس عشان أوضحلكم، لأن كان حصل، يعني كان حصل نقاش الأيام اللي فاتت، وأنا مش عايز أتدخل فيه قوي...

في مقالة من المقالات اللي اتكلمت عن.. معلش يا إيهاب هاوقفك شوية.. اتكلمت عن سينا وإمكانية إن إحنا، يعني، يعني في ناس طرحت أفكار ليها يعني، وكل الكلام اللي يتقال مقدر، وماحدش أبدا لما ييجي، يعني، حد يتكلم، يعني يقولك ده مثلا، يعني، ليه أهداف كده ولا مش...

لكن أنا كنت أتمنى إن اللي عايز يرد على أي حاجة، يكون على علم بما نفعله نحن خلال الفترة اللي إحنا موجودين فيها ال6 سنين دول، ماذا فعلنا بسيناء؟ إحنا صرفنا أرقام هائلة، والأرقام ديت لما نتكلم على سينا كأرض زي ما قلت مساحتها 60 ألف كيلو، يعني تقريبا 5% من مساحة مصر؟ تقريبا كده؟ 5% من مساحة مصر.. 6% عشان الدكتور مصطفى ال60 ألف يعني...

على كل حال.. أقصد أقول بكده إيه؟ يعني، هل في حد مع كل احترامي وتقديري لرجال الأعمال والمستثمرين، مستعدين ينفقوا، يعملوا طريق زي طريق شرم الشيخ، اللي أنا بتكلم عليه دلوقتي، أو طريق طابا النفق، أو حتى الأنفاق إلى إحنا بنتكلم عليها دلوقتي، والنفق يتكلفله مليارات كتير يعني، يعني جدول الاقتصاد بتاعته يعني لو النهاردة اتعملت محطة رسوم على الطريق بتاع أي طريق من دول، لا يمكن تجيب حتى تكلفة صيانته.. لكن الكلام ده بيتعمل في إطار إن إحنا مهتمين بإن إحنا نعمر سينا وزي ما اتقال كده في بداية الكلام، إن هي تبقى، يعني، تاخد تجذب جزء من حجم السكان اللي موجود في الدلتا والصعيد، إلى المناطق اللي موجودة في سينا بعد تعميرها.

أنا مش بقولك تعالى اعمل مشروع واجري على تنفيذه، لأ، أنا بقولك تعالى المشروع خلص.

فاللي أنا عايز أقوله بس هنا، هايتم من خلال اللوا إيهاب عرض أو طرح الحاجات اللي اتعملت، واللي أتصور اللي كنت أتمنى يعني، إن زمايلنا لو في الإعلام كانوا عايزين يردوا على أي حد بيتكلم في موضوع زي كدة، يقولوله تعالى، مين ده؟ مين نده اللي يدفع 600 مليار جنيه عشان يعمل بنية أساسية؟ والعوايد بتاعتها تكاد تكون إيه؟ عوايدها أمن قومي، عوايدها إيه؟ والأمن القومي لا يقدر بمال.. مش كده يا محمد؟ مش كده؟ آه.

ف600 مليار جنيه حتى الآن.. ده رقم الدولة عملت، مش، مش خططته على 20 سنة.. لأ، ده الدولة تقريبا على 30/ 6، آسف، آخر السنة دي، مش كدة يا إيهاب؟ هانكون خلصنا كل المخطط اللي إحنا بنتكلم فيه. يعني يكون الرقم ده اتسدد واتعمل.

بقول بردو الكلام ده للمصريين عشان يسمعوه مني.. لاااا.. إحنا بفضل الله سبحانه وتعالى منتبهين قوي للمسؤوليات اللي ربنا سبحانه وتعالى خطها في رقبتنا لبلدنا، اللي بيتعمل إن شاء الله في سينا، وده مش معناه إن، يعني، بقول إن ماحدش يبقى موجود معانا، أنا أتمنى إن رجال الأعمال يبقوا موجودين، وهاتشوفوا في الكلام اللي هايتطرح دلوقتي مناطق للزراعة ومناطق للاستزراع السمكي، ومناطق للمحاجر والرخام، مش كدة يا إيهاب؟

حاجات كتير هاتشوفوها النهارده، ده مش بقول إن إنتم تعالوا اعملوها، لا، ده تعالوا شاركوا معانا فيها، هي اتعملت يا محمد، وبالتالي، لو إنتم عايزين تقولوا إن إنتم مهتمين بسينا وعايزين تبقى في استثمار منها أو استثمار فيها من خلالكم، أنا مش بقولك تعالى اعمل مشروع واجري على تنفيذه، لأ، أنا بقولك تعالى المشروع خلص، تعالى شارك في إدارته، والعوايد اللي جاية منه.. إنا خلصته.. أنا إيه؟ خلصته.. ومستعد أخلص قد كده بفضل الله سبحانه وتعالى كام مرة يا إيهاب؟ 100 مرة.. يلا.

...

ألقيت الكلمة تعليقا على مقالات ل"نيوتن" نشرت بموقع جريدة "المصري اليوم" تحمل مطالبات اختیار حاكم خاص لها. جاء ذلك على هامش افتتاح محطة معالجة مياة صرف المحسمة بسرابيوم، شرق قناة السويس، بحضور الدكتور مصطفى مدبولي رئيس مجلس الوزراء، وعدد من الوزراء وكبار رجال الدولة والقوات المسلحة.

...

خدمة الخطابات الكاملة للسيسي تجدونها في هذا الرابط