الرئيس عبد الفتاح السيسي أثناء افتتاح مشروع الأسمرات 3. الصورة: المتحدث باسم الرئاسة- فيسبوك

نص الكلمة الختامية للسيسي في افتتاح المرحلة الثالثة من إسكان الأسمرات 12/7/2020


مش هاطول عليكم، أنا بشكركم، وبشكر كل السادة الوزرا ودولة الرئيس على العرض اللي اتقدم النهاردة، وعلى الجهد المبذول من الجميع فيه لإخراج اليوم بالشكل دوت.

وبشكر طبعا إن إحنا الافتتاحات اللي إحنا عملناها فيما يخص الإسكان والمشروعات الأخرى المصاحبة ليها.

أنا بس في موضوعين كدة صغيرين، ده الخاص بمحافظة القاهرة يمكن ومحافظة الإسكندرية، من فضلكم، راجعوا المناطق اللي فيها مواقف، مواقف مساحتها كبيرة، ويتعمل يا إيهاب مع المحافظة تصور إن المواقف دي تتزال، ويبقى تحت منها جراج دور أو دورين تحت الأرض، ومبنى فوق بحيث إن إحنا نستوعب الحركة، وندي فرصة للتشغيل غير الشكل اللي إحنا موجودين فيه دلوقتي.

المواقف اللي موجودة بتاعة النقل العام، اللي موجودة في القاهرة ما أمكن بالتنسيق مع وزارة النقل أو مع محافظة القاهرة طبقا للموقف يعني.

الحاجة اللي هاطلبها من دولة الرئيس ومن الدكتور عاصم، هي مدينة سانت كاترين الجديدة.. مدينة سانت كاترين مدينة تاريخية ومدينة ليها في نفوسنا حاجة عظيمة جدا، والمفروض إن المدينة دي أو المنطقة ديت هي اللي تجلى فيها ربنا سبحانه وتعالى على هذه ال، على مصر وعلى سينا يعني.

أتصور إن إحنا لازم نعملها تصور يليق بهذا الحدث.. فيعني خدوا وقتكم، ونبقى نشوف هذا الموضوع ونبقى نتحرك فيه، وإنتوا طبعا يعني حاولوا يا إيهاب تخشوا في الموضوع ده في إطار بقى المطارات والمحاور المختلفة بحيث يبقى الموضوع كله على بعضه يا دكتور مصطفى... شكرا جزيلا.


ألقيت الكلمة في القاهرة بحضور الدكتور مصطفى مدبولي رئيس مجلس الوزراء، والدكتور محمد معيط وزير المالية، وعلي عبد العال رئيس البرلمان، وعدد من الوزراء.


خدمة الخطابات الكاملة للسيسي تجدونها في هذا الرابط