الرئيس عبد الفتاح السيسي. صورة أرشيفية. المتحدث باسم الرئاسة- فيسبوك

نص تعليق السيسي على كلمة وزير الإسكان خلال افتتاح مشروعات بالإسكندرية 29/8/2020


هنا بردو، معلش الكلام كتير، أنا عايز أقول للدكتور عاصم وللإعلاميين اللي بيتابعونا والمفكرين، لو من فضلكم شوفتوا مصر العشرينات، وإسكندرية العشرينات، وشوفتوا إسكندرية 2020 أو الألفية حتى 2000 بس، هاتجدوا إن الفاصل كبير قوي، بس مش إيجابي، الفاصل مش كبير.. آسف، كبير قوي، بس مش إيجابي، بالعكس، استكمال للكلام اللي قاله الدكتور عاصم، إن إحنا، يا ترى إيه اللي خلانا كده؟ إيه اللي حصل عندنا في ال50-60 سنة اللي فاتوا، اللي خلانا إن مصر في العشرينات والتلاتينات والأربعينات، تبقى يا دكتور عاصم، تبقى إحنا النهارده بعد تطور الدنيا كلها ما اتطورت في كل شيء وكل نظم، نبقى إحنا متراجعين كده.

أنا عايز أقولكوا على حاجة، أنا كنت بتكلم المرة اللي فاتت وإحنا في القاهرة، قلت إن إحنا صرفنا على محافظة القاهرة خلال ال7 سنين اللي فاتوا دول ما يقرب من 350 مليار جنيه، مش كده يا دكتور مصطفى؟ مش كده الرقم؟ خلي حضرتك متريح.

شوفوا، لو أنا صرفت ال350 مليار جنيه ال 6 سنين دول في العاصمة بس، يعني سبت القاهرة خالص، وروحت العاصمة، وصرفت ال350 مليار دول، صدقوني، هاتغطي جزء كبير جدا من المرافق لحجم تقريبا نص الأراضي، مش كده يا فندم؟ وهانبني تقريبا ما يقرب من 500 ألف وحده سكنية يا دكتور مصطفى، بنظم حديثة جدا.

إحنا صرفنا على محافظة القاهرة خلال ال7 سنين اللي فاتوا دول ما يقرب من 350 مليار جنيه، مش كده يا دكتور مصطفى؟

بس أنا، أو إحنا اضطرينا إن إحنا ننفق هنا، لأن إحنا نسينا نعمل أو، يعني، ماعملناش المدن، كان المفروض في إسكندرية، هي بتشيل 2 مليون ولا مليون ونص، تفضل بتشيل المليون ونص، ونيجي في حتة تانية من سيدي كرير وإنت طالع، تاخد مواجهة 20 كيلو عالبحر وبعمق 10 كيلو، ونعمل مدينة جديدة، تبقى اسكندرية الجديدة.

يبقى النهارده الإنفاق اللي إحنا صرفناه على إسكندرية في ال30-40 سنة اللي فاتوا دول، والله، أنا بوريكوا الفرق، لا يساوي إن إحنا كنا نعمل مدينة جديده في سيدي كرير على سبيل المثال بعمق زي ما قلت كده مواجهة عالبحر 20 كيلو زي إسكندرية، وعمق 10 كيلو، هانعمل إسكندرية تاني بنظم حديثة، ونتيح للناس إنها تشتغل وتعمل، لكن لأن إحنا ماعملناش كدة، غابت الدولة، بس ماينفعش الدولة تغير تاني، ماينفعش الدولة ت إيه؟ تغير تاني.. إن غابت تاني تبقى مصر دي...

وبالمناسبة، إنتوا كده بتأجلوا التطوير 100 سنة، لو غابت مصر تاني إحنا بنأجل 100 سنة، وأنا ماقدرش أعيش كده وماقدرش أقبل كده ومش هابقى هنا وأقبل كدة، يعني الناس هاتبقى زعلانة ولا حاجة ولا متضايقة، مايجراش حاجة، لأ، مش مايجراش حاجة، لو أنا إنتوا عايزني أبقى موجود هنا، أنا ماعنديش مشكلة، بس أنا لايمكن والله أبقى موجود في مكان إلا لو الإصلاح يبقى قدام عينيا، وأمسك فيه وأخلصه، بما يرضي الله سبحانه وتعالى، والله غالب على أمره يعني... شكرا جزيلا.

...

ألقيت الكلمة في محافظة الأسكندرية، بحضور الدكتور مصطفى مدبولي رئيس مجلس الوزراء، ووزير الإسكان الدكتور عاصم الجزار، وعدد من الوزراء وكبار رجال الدولة

...

خدمة الخطابات الكاملة للسيسي تجدونها في هذا الرابط