نص تعليق السيسي على كلمة وزير التعليم العالي خلال افتتاح مشروعات بالإسكندرية 29/8/2020
لأ معلش لو سمحت يا دكتور خالد نرجع للجامعات الأهلية، الصورة اللي إنتوا شايفينها ديت، أنا كنت أتمنى معرفش إذا كان ده هاييجي عندك في العرض ولا لأ، لكن أنا هاقوله لأن أكيد مش هايبان من سياق العرض يعني...
أنا كنت عايز أقول للمصريين أوريكوا حجم الطلبة المصريين اللي بيتم خروجهم لخارج مصر في دول العالم كلها، الإحصائية دي موجوده عندنا وإنت كنت بعتهالي يا دكتور خالد، كنت أتمنى إن إحنا نحطها هنا، ليه؟ لأن أنا عايز أقول للمصريين إن في حجم معتبر من الأسر بتوفد أبناءها للخارج، الحجم ده في جامعات معتبرة جدا ومتقدمة جدا، وإحنا، يعني، نسجلها بتقدير الجهد والدور والشهاده اللي بتعطيها لأبناءها، وفي جامعات أخرى لأ، مش كده ولا؟
طيب.. أنا هاديكوا مثال من غير ما أذكر جامعات محدده يعني، إحنا عندنا طلبة في مصر بيدرسوا في جامعات بتصل تكلفتها السنوية لأكتر من 30-35 ألف دولار، وفي حاجات أقل من كدة، في الآخر هو بيخرج ومش ده المستهدف، يعني الفكرة مش فكرة مالية، هي الفكرة فكرة تعليمية، إن هو يبقى موجود معانا هنا على أرضنا، وياخد هذا الحجم وهذا المستوى من التعليم في بلدنا بدل ما هو يسافر ياخده في دول تانية، مش كده بردو ولا؟
كنت أتمنى إن إحنا الإحصائية دي نحطها، ونقول من غير ما نحط الدول يعني، نقول لا، ده الحجم في أوروبا، ده الحجم في أمريكا، ده الحجم في أسيا، كده، من غير ما نذكر الجامعات ولا الدول، ونقول ده حجم أبناءنا العاملين في الخارج، آسف، اللي بيدرسوا في الخارج.
دي نقطة، النقطة التانية، الدكتور خالد اتكلم على موضوعات خاصة بعلوم إحنا حطيناها في الجامعات الجديدة، مش كده؟ وأنا أتصور إن الموضوع ده محتاج مننا من الإعلام ومنكم ك، يعني، معنيين بالتعليم، إن إنتوا تشروحو للناس إن ال، إحنا كنا دايما نقول إيه؟ ماتدوروا على ربط سوق العمل، التعليم بسوق العمل، مش كده؟ وإنتوا عارفين كويس قوي إن جامعاتنا بتخرج عشرات الآلاف أو مئات الآلاف كل سنة، ويمكن مش كلهم مربوطين بسوق العمل.
إحنا جبنا كل العلوم الجديدة، اللي هي تقدر تخلي ابننا أو بنتنا اللي بيتعلموا هنا في مصر في العلوم ديت، يبقوا جاهزين لسوق العمل في مصر، ومستقبله، مش كده؟ أو حتى لو كان في فرصة إن هو يبقى في الخارج.
أنا بس حبيت النقطة دي أقولها معاك، لأن إنت قلت كلام كتير في العلوم اللي ذكرتها، ويمكن تكون الناس هاتبقى خايفة، يعني تودي أبناءها يدرسوا في الحاجات دي، ايه الكلام دوت، طب ما إحنا بندرس حاجات كتير جدا مالهاش سوق في مصر، واتعودنا عليها، لأ، ناخد الجديد وماتقلقوش منه، بس طبعا تكون امكانيات الطلبة جاهزة إنها تقدر تتعلمه، وإنتوا هاتجدوا إن ده فرصة كبيرة قوي يعني... شكرا يا دكتو خالد.
...
ألقيت الكلمة في محافظة الأسكندرية، بحضور الدكتور مصطفى مدبولي رئيس مجلس الوزراء، والدكتور خالد عاطف عبد الغفار وزير التعليم العالي، ووزير الإسكان الدكتور عاصم الجزار، وعدد من الوزراء وكبار رجال الدولة
...