السيسي ووزير الداخلية في حفل التخرج - الصورة: المتحدث باسم الرئاسة

نص كلمة السيسي لخريجي الدفعة الجديدة من كلية الشرطة 15/10/2020

منشور الأربعاء 21 أكتوبر 2020

 

بسم الله الرحمن الرحيم،

مش هايفوتني أبدا، إن أنا باسمي وباسم كل المصريين، أتقدم ليكم بالتهنئة. وصحيح، يعني... هم مش موجودين معاكم دلوقتي؛ لكن أنا بقولكم، وبأكد لكم، إن كل مصري، موجود هنا، وحتى بيسمعني دلوقتي: من فضلكم، اعتبروهم، يعني، الأب أو الأخ لك. لأن هم فعلا ينظروا إليكم بهذه المنزلة، وبهذه المكانة.

فـ... صحيح، يؤلمكم ويؤلمنا غيابهم، واستشهادهم في سبيل مصر. لكن عزاءنا، وأنا مش عايز أخلي اليوم يعني صعب، لكن عزاءنا، إن هم قدموا ده، عشان 100 مليون مصري يعيشوا. 100 مليون. ده تمن كبير قوي (تصفيق).

فـ... ألف مبروك، ألف مبروك، ألف مبروك (تصفيق)

وبعدين، بردو مش هايفوتني إن أنا أرحب بكل الأسر اللي موجودة، أولياء الأمور اللي هم... (تصفيق) قدموا، يعني، أعدوا أبناءهم، ثم قدموهم لمصر، هنا في كلية الشرطة؛ عشان يبقوا رجال، يدافعوا عننا كلنا.

فأنا بوجهلهم التحية والتقدير والاحترام والاعتزاز بما قدموه لنا. ثم بهنيكم جميعا، أبناءنا الخريجين، وأبناءنا الطلبة اللي موجودين في الكلية. ألف مبروك وبتمنالكم كل التوفيق، وربنا يا رب يحفظكم من كل شر وسوء (تصفيق) شكرا جزيلا.


ألقيت الكلمة  في مقر أكاديمية الشرطة بالقاهرة الجديدة، بحضور دفعة 2020 من طلبة كلية الشرطة.


خدمة الخطابات الكاملة للسيسي تجدونها في هذا الرابط