نص حوار السيسي مع العمال أثناء تفقده أعمال تطوير وتوسعة الطريق الدائري 24/9/2021
السيسي: بشكركوا صحيح.. لأن حد كان يصدق إن إحنا، يعني، نشق الجبل كده عشان نعمل محور زي ده؟
المهندس : يا فندم إحنا هنا يا فندم في الأسمرات، اللي بيربط من الطريق الداعم، وحتى محور الشهيد، عندنا هنا يا فندم عبارة عن 3 طرق، في طريق يا فندم هايطلع لحد الأسمرات فوق، فرق الارتفاع هايصل حوالي 80 متر من الدايري لحد أعلى الأسمرات. والطريق التاني يا فندم اللي هو جاي من الأسمرات ويربط على محور الشهيد.
واجهنا تحدي كبير هنا يا فندم في شق الصخور، جبل المقطم بعد ما خلصنا الطريق لقينا هنا يا فندم بعض العوائق زي نزح في الميه، ويمكن باين ورا سيادتك إن في نزح في الميه، فاضطرينا قطعنا الجبل بمسافة أزيد، علشان نقدر نبعد الميه دي عن مشكلة الطريق، لأن ظهر عروق طفلية بعد الصخر، بعد ما قطعنا الارتفاع ده كله ظهر العروق الطفلية اللي قدام سيادتك دي يا فندم، فعملت نزح، فاضطرينا نفتح العروض، وده يمكن اللي طول معانا مدة المشروع شوية يا فندم.
السيسي: طيب.. أنا كنت قلنا إن إحنا هانعدي الطريق المحور، مش كده؟ إمتى؟
المهندس : إن شاء الله يا فندم بدأت أعمال الجسات والإنشاءات، وابتدت أطقم تنفيذ نزلت الناحية التانية يا فندم من الدايري، وجاري العمل فيه دلوقتي يا فندم.
السيسي: اللي هاينقل المنطقة دي نقلة كبيرة جدًا المحور اللي إحنا بنتكلم عليه ده، مش كده؟ طيب، إحنا فاضلنا قد إيه؟
المهندس : بإذن الله يا فندم خلال شهر 10 نكون مخلصين بإذن الله.
السيسي: حتى النفقين دول..
المهندس : بإذن الله يا فندم.
السيسي: طب أنا بس وأنا طالع حسيت إن في يعني جرف تحت، مباني تحت، فإنتوا لازم تأمنوا الطريق، وتحط له نيوجيرسي ولا حاجة قوي، لا قدر الله حد وهو بيسوق ولا حاجة.. طيب.. حاجة تاني هنا؟ عايز تقول حاجة.. ده أنا اللي بشكركوا، وبشكر الناس الشغالة، كتر خيركوا، متشكرين.
السيسي: شوف أنا عايز أقولك على حاجة.. ليكم كلكوا.. لا، أنا مش بتكلم في التحديات، أنا بتكلم في حجم الأعمال الصناعية اللي بنعملها في القاهرة، عشان نعمل حركة حقيقي في ال، بعد كل النمو اللي حصل فيها.
إحنا بنتكلم في مئات الأعمال الصناعية: الكباري والمحاور اللي تم عملها. وده أمر، بصراحة، أنا بوجهلكوا إنتوا، الهيئة الهندسية وكل العاملين في قطاع الطرق والكباري، كل التقدير والاحترام على اللي إنتوا عملتوه. وإحنا كل الكلام ده بنقول عليه أكتوبر، مش كده؟ طيب. متشكرين.
ألقيت الكلمة في القاهرة، بحضور العمال والمهندسين المشرفين على أعمال تطوير وتوسيعة الطريق الدائري.