نص تعليق السيسي على كلمة وزير الري خلال افتتاح محطة بحر البقر 27/9/2021
بسم الله الرحمن الرحيم،
أنا بس يمكن هعلق على ال، اتفضل يا دكتور محمد، الكلام اللي قاله الدكتور محمد فيما يخص التعدي على الـ.. الـ.. يعني، الجسور والمجاري المائية والمنشآت المائية.
وزي ما إحنا شايفين، إحنا كدولة بنحاول إن إحنا نسابق الزمن لتطوير وتحديث واستعادة كفاءة منشآتنا المائية بالكامل. يعني كان النهارده بيتكَـ.. الصور اللي إنتو شفتوها ديت اللي خاصة بشكل الترع وحالها، ده كان بيأثر على حال الناس. يعني بيخلي الناس مش قادرة تستفيد بالمية، ويمكن الزراعات بتاعتها بتتأثر وكلام من هذا القبيل.
إذن الدولة بتقوم بدور، وكمان المواطنين عليهم دور والتزام. الدولة بتقوم بدور إيه، إن هي، إحنا فعلًا، يعني، أنا عايز أقولكو على حاجة.. لو إنتو من النهارده كحكومة راجعتم الإجراءات اللي اتعملت خلال السبع سنين يا دكتور مصطفى في كافة القطاعات والمجالات، وقلتوا إن ده كان تطوير محتمل لغاية 2052، أنا أتصور إن إحنا قطعنا طبقًا للمعدلات اللي تم تنفيذها خلال المدة ديت.
المفروض إن الكلام ده يتعمل في الـ20 30 سنة الجايين، حاجات كتير منها. لكن إحنا قلنا إن إحنا كنا متأخرين كتير، وبالتالي لابد إن إحنا نتحرك بمعدلات أسرع وأعمق بكتير مما كنا حتى لو كان التخطيط، يعني ممكن يتلبَّى على لغاية 52 أو كدة.
وبالتالي، إنتو كمان كمصريين محتاجين تساعدونا. أنا بتكلم مش بقولك على منشآت.. إنت اتعديت على منشآت خاصة حكومية.. منشآت خاصة بالناس.. لما تيجي تقول النهارده حاجة زي رشيد، كنا بنتكلم في 80 مليون مية بتعدي تبقى 30 مليون. طب ما ده هايبقى ليه تأثير على حجم المية الواصل للناس اللي بتزرع من الرافد ده، أو من الفرع ده. ونفس لكلام لدمياط.
إذن فكرة إن إحنا كمواطنين نتعدى على ده، وكحكومة تسكت على ده. ده أمر مش ممكن إن إحنا نقبله. وبالتالي، النهارده كل التعدي اللي ع المنشآت بتاعة الجسور بتاعة الترع، أو منشآت الري.. لا لا لا.. ده وزارة الداخلية مع المحافظة، ولو القوات المسلحة محتاجين.. كل الكلام ده لازم خلال 6 شهور آخد تمام إنه اتشال.. إحنا مش هانتحايل على حد. هو حد يغتصب أرض الدولة ونقول عشان خاطر أصل مصلحتهم؟ أصل هم حياتهم مهددة بالخطر؟ هو إنت تاخد أرض الدولة وأتحايل عليك؟
وزارة الداخلية، ولو الأمر تطلب القوات المسلحة، كل التعديات اللي اتعملت خلال الـ 20 30 سنة اللي فاتوا، يتشالوا، وآخر التمام خلال 6 شهور. زي ما أنا بعمل تبطين للترع، وبعمل إجراءات فوق الخيال، فوق الخيال، وأنا عارف أنا بقول إيه.. اللي بيتعمل في مصر ده فوق الخيال.. يبقى أنا كمان مش هاقبل إن حد يتعدى على قدراتنا وعلى اللي إحنا بنعمله عشان نحسن أحوال الناس.
المحافظ اللي موجود، سواء كان تعدي على أراضي زراعية، أو تعدي على منشآت، جسور، وكلام من هذا القبيل.. لا ده كلام.. مش مقبول دلوقتي. كان ممكن يبقى مقبول قبل كدة، لكن دلوقتي يا جماعة مش مقبول.
حد يقولي إنت زعلان؟ أقولك لأ، أنا خايف عليكو. بقولك النهارده كان هنا بيعدي 80 مليون متر ميه، بيكفوا الناس تروي بشكل كويس. لما يبقى 30 مليون، يبقى معاناه إيه؟ ليه عشان إيه بنعمل كده في نفسينا؟ عشان مافيش حد، سواء.. وبردو ماتزعلش يا دكتور محمد بقى.. ما إنتو كنتوا قاعدين بتعملوا إيه السنين للي فاتت؟ مش كدة ولا إيه يا دكتور مصطفى؟ مش اللي بيتابع الكلام دوت هو وزارة الري ولا إيه؟ بالإضافة للمحافظة، بالإضافة لمدير الأمن اللي موجود.. لا لا.. 6 شهور، وألاقي الجسور دي متظبطة زي الكتاب ما بيقول، إن تطلب الأمر نزول الجيش، ينزل الجيش يا محمد، ينزل يشيل الكلام ده، وتحاط المعدات، ألف معدة، 3000 معدة، 10000 معدة. كل الجسور دي ترجع تاني زي ما كانت، وكل التعديات دي تتعمل، وكل بيانات الناس دي تبقى موجودة معانا.. تبقى موجودة معانا.. سواء كان تعدي على أراضي زاعية، أو تعدي على جسور.
وبالمناسبة بقى، أنا بقولكو.. أنا هايبقى من ضمن الإجراءات اللي بعملها حتى استعادة أو إنهاء التعدي: وقف كل الدعم اللي بتقدمه الحكومة من خبز وتموين وأي حاجة تانية لأي حد يخالف.. أنا بقولهالكم، لكل المصريين، اللي هايتعدى ويعمل إجراء مش مظبوط على أراضي زراعية أو على ترع ومصارف، يقف الدعم اللي بيقدمله من جانب الحكومة لغاية ما التعدي ده ينتهي تماما. زي ما إحنا حاطين 700 مليار جنيه، عشان نخلي حياة كريمة للناس، والدولة بتجري بمنتهى القوة عشان تسعد الناس كلها.. هايبقى مش مقبول إن يطلع حد من عندنا يتعدى ويتجاوز.
6 شهور يا دكتور مصطفى، وآخد شهر بشهر الإجراءات اللي اتعملت. شكرًا.
ألقيت الكلمة في مدينة بورسعيد أثناء افتتاح محطة معالجة مياه مصرف بحر البقر، بحضور رئيس الوزراء مصطفى مدبولي وعدد من الوزراء بينهم وزير الري محمد عبد العاطي.