نص كلمة وتعليقات السيسي أثناء قيامه بجولة تفقدية لمقر الكلية الحربية 23/2/2022
السيسي: السلام عليكم.
الطلاب: وعليكم السلام يا فندم.
السيسي: إن شاء الله النهارده يوم جميل، إن أنا ألتقي بيكم. والحقيقة أنا عرفت إن إنتم خلصتوا تقريبا نص الفترة يعني. وطبعا الأخبار كلها، والتقارير كلها، الحقيقة، تفرح زي ما بيقولوا يعني، أو مشجعة جدا لغاية دلوقتي.
فأنا عارف إن طبعا كدا نهاية ال.. نص المدة، وبالتالي هايبقى في تحرك لكليات أخرى يعني. فقلت قبل ما تغادروا، آجي أسلم عليكوا الأول، وأهنيكوا على دخولكم القوات المسلحة. وأتمنى لكم كل التوفيق.
واسمحولي أقولكم إن.. أنا قدام رجال، مش عايز أقول شباب، لأن إنتوا شباب بالفعل، لكن شباب رجال، بقيتوا.. بتتحملوا مسؤولية أكبر، وبقيتوا.. بتعرفوا أكتر.. وحصل تطور، حتى لو كان في سبع تمن أسابيع، أعتقد إن إنتو لمستوه بأنفسكم يعني. فبهنيكم، وبأتمنى لكم التوفيق.
وخلوني أقول لكل الطلبة، أو لكل الشباب اللي قدامي، إنتوا الأمل، وإنتوا المستقبل، وإنتم اللي هاتتحلوا مسؤولية الحفاظ على الدولة المصرية. والحقيقة، كل شاب بقى موجود معانا هنا في القوات المسلحة، بقى في رقبته مصر، ومستعد يقدم لغاية حياته، عشان يحافظ عليها. ده حاجة عظيمة جدا ونبيلة جدا.
بس اسمحولي أقولكم إن ده بيتطلب مننا كلنا عمل دؤوب جدا، وجهد كبير، على طول، مابينتهيش، جهد من 5 الصبح ولا من 5 ونص، لغاية 9، 10 بالليل. طب أنا بقول كدا.. لأن ده حياة مختلفة يمكن عن اللي إنتوا عيشتوها قبل كدا، بس ده لإعداد رجال حقيقيين يتحملوا مسؤولية الحفاظ على أمن مصر، واستقرارها، وده أمر بالمناسبة أمر عظيم جدا جدا، وإحنا دايما في كلامنا مع بعضنا، وللناس كلها، بنقول الحفاظ على حياة 100 مليون ده قيمة لا بعدها قيمة الحقيقة.
فأنا بهنيكم وبتمنى لكم التوفيق، وإذا كنت أوصيكم بشيء يعني، أوصيكم على المثابرة، والتحمل، والإصرار.. شوفوا، اليوم بيبدأ زي ما بيبدأ عندكم، وهاينتهي آخر النهار، أو بالليل يعني.. إوعى.. إوعى يفوت عليك دقيقة من غير ماتستفيد بيها، لجسمك ولعقلك، وخلي بالكوا من نفسكم واحترموا جدا بعضكم البعض، وخلوا القيم، القيم النبيلة والشريفة، الصدق والإخلاص والأمانة والشرف، والالتزام والعمل، والعمل المتقن، واحترام بعضنا البعض.
بالمناسبة، عمر ما كان، أبدا، العسكرية غير ما كانت احترام من الكبير للصغير، أو من الرتبة الأعلى للرتبة الأقل والعكس، مش فقط من الرتبة الأقل للرتبة الأكبر، لا، الاحترام متبادل، والالتزام متبادل، والخلق الحسن متبادل.
فأرجو إن إنتم، يعني، كمان يعني.. المعرفة، والمعرفة العسكرية، وهنا، في الكليات العسكرية بتبقى أول، يعني، سلمة للمعرفة ديت، إنتوا خدتوا قدر، قدر مناسب، لكن بالنسبة للمعرفة اللي المطلوب إحنا، يعني، نتحصل عليها، لا، دي خطوة من خطوات كتيرة جدا جدا.
أرجو إن يعني، إن إحنا نبقى حريصين دايما على ده، على إن إحنا تزداد معارفنا، مش بس العسكرية.. معارفنا العسكرية والمدنية وكل مناحي الحياة، اتعلم واقرا وشوف وفكر. و... خلي بالك من نفسك ومن مرؤوسيك بعد كدا، إنت هنا يمكن بتتحمل مسؤولية نفسك فقط، لكن إنت في يوم من الأيام، مش بعيدة قوي، هاتتحمل مسؤولية تبدأ بعشرات وتنتهي إنك إنت بتتحمل مسؤولية القوات المسلحة بالكامل.
فده أمر مش بسيط. ده أمر كبير قوي، وحمل وأمانة عظيمة جدا جدا. فعايز أقولك، وأقولكوا، خلي بالك من لياقتك البدنية، مش دلوقتي، ومش بعد ما تتخرج، لا، طول عمرك، إنت ومن تتولى مسؤوليتهم. إوعى وزنك يزيد، إوعى! راقب نفسك، وراقب مسؤوليك، ده موضوع مهم جدا جدا، لأن ده، مش بس حتى للعسكريين بالمناسبة، لا، لكل الناس، وتبقوا حريصين على ده.
عايز أطمنكوا على مصر، إحنا بخير الحمد لله رب العالمين، وربنا تفضل علينا كثيرا جدا في ظل ظروف صعبة مرت على بلدنا خلال السنين اللي فاتت. وكل يوم بنحقق الأفضل. صحيح إحنا بنعاني، والظروف صعبة، إوعوا تفتكروا إن أنا، أو إحنا يعني، بعاد عن أحوال الناس، وعن الصعوبات اللي بتقابلها ال.. أنا بتكلم على المواطن العادي والبسيط اللي موجود في الشارع، لا طبعا.
بس.. إحنا بسم الله ما شاء الله لا قوة إلا بالله 100 مليون دلوقتي.. عشان يبقى كل المطالب بتاعتهم واحتياجاتهم في ظل الظروف اللي بتمر بالعالم، الحقيقة، صعبة، لأن حصل خلال فترة الكورونا توقف كبير قوي، إحنا صحيح في مصر الحمد لله رب العالمين حرصنا على إن إحنا نبقى متوازنين مابين الإجرءات الاحترازية و الحفاظ على صحة الناس، وعملية التطعيم اللي بنعملها، كل ده كان كويس، لكن إحنا أيضًا لم تتوقف التنمية عندنا.
لكن الدنيا كلها ماعملتش كدا، الدنيا كلها، تقريبا توقفت، ولما توقفت والأحداث التانية طبعا إنتوا متابعين أكيد اللي بيحصل في الدنيا كلها، ليها تأثير كبير قوي، ليها تأثير كبير على.. لأن إحنا مش.. مش في معزل أبدا عما يحدث حولنا. أنا مش بتكلم عن منطقة بس، أنا بتكلم عن منطقة وعلى العالم. فيمكن تكون في زيادة في تكلفة السلع في العالم كله، وده أمر إحنا بيبقى ليه تأثير علينا، بنحاول ما أمكن إن إحنا نقلل أو نحافظ على، يعني، حجم معين من التكلفة، لكن أنا مقدر إن هي بردو مازالت عبء وحمل على الناس، عبء وحمل على الناس.
بالمناسبة، وأنا بقولكم الكلام ده لأن إنتم مهم قوي تبقوا عارفينه وأكيد الكلام ده كمان هايوصل للناس، إحنا ماشيين في برامج زراعية ضخمة جدا، وإحنا، صدقوني يعني، بنبذل جهد كبير قوي، مش أنا يعني، كلنا، جهد كبير قوي إن إحنا نزود الرقعة الزراعية بتاعتنا ما أمكن، مش بس زيادة أرض، لأ، حتى النظم الحديثة في الري، حتى النظم الحديثة في الزراعة.
حد يقولي طب ده كلام يعني، هل ليه مردود علينا؟ طبعا ليه مردود علينا، لأن إحنا لو قدرنا نزود المساحة اللي بنزرعها مليون فدان بنظم ري حديثة وبنظم زراعة حديثة، ممكن المليون فدان دول يبقوا بالنسبة للأراضي وال، والوسائل التقليدية الأخرى، المليون يساوي مليون و200 ألف، مليون ونص، حسب.. حسب قدرتنا على استيعاب النظم ديت والتكنولوجيا ديت.
لكن أنا عايز اقول، إن إحنا مش ساكتين في النقطة دي بالذات تحديدا، اللي هو في توفير ع الأقل أساسيات الحياة للناس بأسعار مناسبة. البرنامج اللي إحنا شغالين فيه، يمكن، مش عايز أطول عليكوا علشان ما آخدش الطابور، لكن حبيت أطمنكم إن إحنا بفضل الله سبحانه وتعالى، بفضل الله سبحانه وتعالى، خلال سنتين، خلال سنتين، يمكن طبعا يعني السنة دي زودنا، زودنا عن ما كنا بنزرعه ما يقرب من 200، 250 ألف فدان، ودول كلهم بيتزرعوا قمح دلوقتي.
بالإضافة ل.. أنا مش بتكلم على الدولة بس كـ.. القطاع اللي هو الزراعي، أنا بتكلم على الإجراءات اللي الدولة عملتها خلال السنة دي، يعني السنة دي زاد، زودنا على الأراضي الزراعية ما يقرب 250 ألف فدان للقمح. السنة الجاية بفضل الله سبحانه وتعالى، الرقم ده يبقى مليون، بفضل الله سبحانه وتعالى السنة اللي بعديها الرقم ده يمكن يوصل لمليون ونص أو 2 مليون.
الهدف من ده كله إن إحنا نقلل، نقلل الاعتماد على، في السلع الأساسية زي ما بقول، على الخارج. لكن عايز أقولكم إن الدولة بتحاول بقدر الإمكان إنها، في ظل الميّه المتاحة اللي موجودة عندنا، بإن إحنا بإعادة، بمعالجتها معالجة متطورة جدا، يعني عشان مافيش نقطة ميه ماتستخدمش في مكانها الصحيح.
الخلاصة اللي أنا عايز أقولهالكم، أقولكوا إن إحنا، يعني عارفين كويس إن الحياة صعبة، بس ده، يعني مش بس عشان الإنتاج بتاعنا، لكن إحنا حريصين على إن ده نحافظ على حد أدنى من التكلفة، ماتبقاش كبيرة على الناس، الدولة بتحاول تتدخل في النقطة ديت.
المهم أنا مش عايز أطول عليكوا أكتر من كدا لكن عايز أقولكم إن الحمد لله رب العالمين، إحنا في وضع أفضل، أفضل كتير، وكل يوم بالعمل والجهد والصبر والتحمل، وال.. والأمانة، والإخلاص، وقبل ده كله كرم ربنا الكبير علينا، ودايما أقول الكلمة ديت عشان أبقى عارف كويس قوي، ونعرف كويس كلنا إن إحنا في كرم كبير لربنا على مصر، وعطاء كبير جدا لينا، والله أنا صادق معاكوا، ربنا سبحانه وتعالى أفاض علينا بخير وستر وسلام وأمان واستقرار، وده من فيض كرمه علينا، وبقول يا رب دايما ماتحرمناش من فضلك، ماتحرمناش من عطاءك ومن نصرك ومن سترك ومن رزقك.
أنا سعيد إن أنا التقيت بيكوا النهارده، بأتمنى لكم كل كل التوفيق. مرة تانية ألف مبروك على الدفعة اللي موجودة، وألف مبروك إنها أنهت نصف ال.. يعني نصف المدة، وإن شاء الله تستكملوا بخير وبتوفيق وبسلام إنتوا وزمايلكم اللي موجودين في الكلية. شكرا جزيلا.
الطلاب: العفو يا فندم.
...
16:00
طالب1: جهاز المشاية المائية المائية يا فندم هو جهاز للمشي باستخدام مقاومة المياه، وهو أحد أساليب العلاج المائي، والعلاج المائي هو طريقة من طرق العلاج الطبيعي، والتي تعتمد في الأساس على استخدام المياه كوسيلة لإعادة التأهيل، سواء كان في حمامات السباحة، أو الأحواض المائية، أو أجهزة المشي والجري تحت مستوى المياه، مثل جهاز المشاية المائية.
السيسي: صناعة إيه؟
طالب1: صناعة مصرية كاملة يا فندم، لأن الفرد المصاب بيمشي على المفصل من غير ما يحس بأي نوع من أنواع الإجهاد، وده يا فندم بيبقى ليه عامل نفسي كبير جدا، لأن أكبر مشكلة نفسية بتقابل الفرد اللي بيتعمل برنامج التأهيل يا فندم هو الألم اللي بييجي في المفاصل، دهب يجعله يتكاسل يا فندم إن هو يكمل البرانمج التأهيل يبتاعه.
...
17:04
السيسي: مبسوط؟
طالب2: الحمد لله يا فندم
السيسي: الحمد لله.. مش عايز تقولي حاجة؟
طالب2: كان هدفي أصل إن أنا أخش يا فندم إن أنا مش عايز أبقى فرد مجرد إن أنا أطلع في المجتمع وأسافر برة وأعمل فلوس وخلاص. نفسي في يوم من الأيام يا فندم أوصل لحاجة أشرف بيها بلدي يا فندم.
السيسي: إن شاء الله.
طالب2: زي ما حضرتك يعني الحمد لله ولله الحمد يعني رفعت البلد من تحت لفوق.
السيسي: اللي عايز يحقق نتيجة كويسة، إوعى تفتكر إن هو هايرتاح.. اللي إيه؟
الطلاب: مش هايرتاح يا فندم.
السيسي: لا مش هايرتاح..
الطلاب: آه.
السيسي: طب، إذن إحنا لو في بلدنا، عايزين نغير الواقع بتاعها، مش ممكن يكون اللي هايشتغلوا فيها 2%، 3%، 5%.. 10%.. لأ.. عمرها ماهاتتغير. كلنا لو اجتمعنا على قلب رجل واحد من أجلها، أجل بلدنا، إحنا مشينا إيه؟
الطلاب: خطوة..
السيسي: فاضل كام؟ ألف.
الطلاب: ألف خطوة.
السيسي: بيكوا إن شاء الله.
الطلاب: إن شاء الله يا فندم.
السيسي: مش عايزين حاجة؟
الطلاب: شكرا يا فندم.
...
طالب3: طالب مقاتل أحمد محمد محمد عز، رقم 17109
السيسي: إنت بقالك قد إيه في الكلية؟
طالب3: بقالي يا فندم 34 يوم يا فندم.
السيسي: طيب أساسي يعني.. طالب مستجد يعني. إنت منين؟
طالب3: من طنطا يا فندم.
السيسي: من طنطا، الغربية بردو.
طالب3: آيوة يا فندم.
السيسي: كويس.. أخبار طنطا إيه؟
طالب3: الحمد لله كويسة يا فندم.
السيسي: صحيح.
طالب3: كويسة يا فندم والله.
السيسي: وإنت مش عايز تقترح حاجة في الكلية؟
طالب3: الكلية كلها (كلمات غير واضحة) والله يا فندم.
السيسي: الحمد لله.. الحمد لله..
طالب3: الحمد لله.
السيسي: بيكوا، وبالشباب والمستقبل اللي أنا بقول كدا، على اكتافكم، في رقبتكم البلد ديت.
طالب3: طبعا
...
18:41
السيسي: حافظوا على لياقتكم.. حافظوا على جسمكم.. دلوقتي، وإيه؟
الطلاب: وبعد مانخلص يا فندم.
السيسي: وبعد ماتخلصوا.. أنا كنت بعمل في العقلة دي 65
الطلاب: 65 يا فندم.
السيسي: آه أمال إيه؟ كام عدّة؟
الطلاب: 65 يا فندم.
السيسي: بس كان لا بد، ده برنامج رياضي كامل، يعني عشان أعمل ده، استأذنت من رقيب أول السرية، قلتله يا فندم من فضلك إديني تصديق إن أنا أقوم ساعة بدري، أقوم إيه؟ ساعة بدري. كام؟
الطلاب: ساعة بدري.
السيسي: ساعة بدري. كنت آجي الساعة البدري دي على الميدان بتاع ال.. كان ساعتها الميدان ده جنب حمام السباحة.. كل يوم.. قبل طابور اللياقة أعمل البرنامج ده ليا، شخصي.. جيت في بطولة الكلية، بعد 6 شهور، بطولة الكلية بعد إيه؟
الطلاب: 6 شهور.
السيسي: بقيت بطل الكلية.. أنا بقولكوا كدا مش عشان بس إنت تبقى بطل الكلية ولا.. لا.. عشان إنت كمان تحط ده، اللي رقيب أول سرية يحط ده في سريته، ولما يلاقي طالب كويس يشجعه، يقوله كويس وتعالى. فاهمين؟
الطلاب: تمام يا فندم.
السيسي: خدوا بإيد بعضكم واحترموا بعض وحبوا بعض، وإيه؟
الطلاب: وحبوا بعض.
السيسي: حبوا بعض.. وخليك كبير.. خليك إيه؟
الطلاب: كبير.
السيسي: كبير هنا مش سن يعني، كبير هنا سلوك، كبير إيه؟
الطلاب: سلوك.
السيسي: سلوك.. ماتغلطش أبدا، انتبه إنك إنت تحترم زميلك، زميلك ده على كل المستويات، مش كبير، كبير إنت طبعا اتعلمنا إن إحنا نحترم الكبير، لكن الصغير اللي أقل مني اللي أنا مسؤول عنه، أعمل معاه إيه؟ أتكلم معاه إزاي؟ أخلي بالي منه إزاي؟ العسكرية في ناس كتير فاهماها إنها عملية إيه، يعني، خشونة.. لا العسكرية رجولة.. العسكرية إيه؟
الطلاب: رجولة يا فندم.
السيسي: رجولة في السلوك وكدا.. يعني عايز النوط يعني ولا إيه؟ خلاص إدوه لده وده بعديه.. عشان الصعيد، أنا بحب الصعايدة جدا، لا صحيح، أصل يابني إحنا في الجيش شوفنا كل ال.. كل الناس.. كل الناس في مصر يعني.. شوفنا من ده ومن ده، فكان دايما النسبة الغالبة من الرجولة والأصالة والجدعنة، وبردو العزة، كانوا الصعايدة.. الناس بتوع أسوان والأقصر ناس طيبين قوي.
...
21:46
السيسي: طب الحياة صعبة برة يا إبراهيم ولا لأ؟ بصراحة.. اتكلم بصراحة.
طالب4: في ناس مستواها كويس، وفي ناس مستواها أقل. بس بعد اللي سيادتك عملته في حياة كريمة الناس مستواها (كلمات غير واضحة) اتصرفلهم معاش، وفي ناس عندنا اتصرفلها (كلمات غير واضحة).
السيسي: إنت من الريف؟
طالب4: أيوة يا فندم.
السيسي: منين؟
طالب4: من الغربية يا فندم.
السيسي: من الغربية. طب إنت في ال، يعني، في المركز عندكم في قرية من القرى بيترفع.. بيتعملها موضوع حياة كريمة ولا لأ؟
طالب4: أيوة يا فندم.
السيسي: شوفت اللي بيتعمل؟
طالب4: شوفت يا فندم.
السيسي: رأيك إيه؟
طالب4: لما، حضرتك آخر أجازة نزلتها، لقيت الموضوع اتغير تماما، الناس دي كانت عايشة في مستوى تاني بقت في مستوى تاني.
السيسي: فعلا؟
طالب4: فعلا سيادتك.
السيسي: طب إيه اللي ممكن مانكونش خدنا بالنا منه وإنت بتقترح إن إحنا نعمله؟
طالب4: سيادتك معظم القرى.. في قرى كتير اتعملت، بس لسه في بعض القرى...
السيسي: لا، بص.. البرنامج، يا إبراهيم، 3 مراحل. يعني إحنا بنتمنى إن المرحلة الأولى تاخد سنة، تخلص 6 السنة دي إن شاء الله.
طالب4: إن شاء الله يا فندم.
السيسي: المرحلة اللي بعدها 6 اللي بعده، السنة اللي جاية يعني. ثم المرحلة الأخيرة إن شاء الله تخلص 6 / 24 . كدا 3 سنين. لو وفقنا ربنا سبحانه وتعالى، وخلصنا ده، يبقى كل بين فيه صرف صحي، كل بيت فيه ميه، كل بيت فيه كهربا. ثم طبعا موضوع تبطين الترع.. رأيك فيه إيه؟
طالب4: نظم الري عندنا المرحلة الجاية تكون الترع كلها اتبطنت، عشان استهلاك الميه اللي بيتسرب للأرض، ودلوقت في طفرة كبيرة في الأرض عندنا وفرت علينا..
السيسي: يعني عايز تقولي يا إبراهيم إن آخر زمام الترعة على الوضع ده اتحسن كتير عن.. عن الأول، مش كدا؟ والطرق اللي هاتتعمل.. والتليفونات.. وشبكة الاتصالات.. والمدارس.. والمستشفيات.. فإحنا، يعني، عينينا عالناس. إنما يبقى إن، إن، إن هاتبقى عندنا مشكلة، وأنا بقولهالك وبقولها ومن خلال الكلام معاك للناس.. إن إحنا محتاجين نخلي بالنا من شوية الأرض اللي موجودين معانا. لسه كنت بتكلم على موضوع الأرض الزراعية، إحنا حريصين على إن إحنا فعلا خلال سنتين، فعلا، هانكون عملنا نقلة كبيرة في النقطة دي، يعني نقلل حجم الاستيراد يعني.. حاجة تاني؟
الطلاب: العفو يا فندم.
...
طالب5: 21003 طالب مقاتل أحمد علي عبد السميع رضوان، (جملة غير واضحة) رقم 2.
السيسي: خريج إيه؟
طالب5: كلية هندسة قسم اتصالات وإلكترونيات يا فندم. يعني بالنيابة عني وعن دفعتي يا فندم، الدفعة 21، بنشكر سيادتك يا فندم على إن سيادتك سمحتلنا بالإنضمام يا فندم للكلية الحربية، مصنع الرجال، وعرين الأبطال يا فندم.
السيسي: طب وإنت كنت بتلعب رياضة برة إيه؟
طالب5: بطل جمهورية كونغ فو وكيك بوكس يا فندم.
السيسي: الفكرة، شايف إنها ضافت ليك؟
طالب5: طبعا يا فندم. نمّت عندنا.. نمت عندنا يا فندم بعض القدرات والمهارات، ومن أهمها يا فندم القدرة على القيادة، والقدرة على العمل الجماعي، والانضباط وضبط النفس يا فندم.
السيسي: هل التأهيل العلمي كويس؟
طالب5: (كلمات غير واضحة) يا فندم.
السيسي: جزء كبير من ال.. من الحوكمة، جزء كبير من محاربة الفساد، قواعد البيانات، وحوكمة الإجراءات والذكاء الاصطناعي، ممكن يساهم كتير في محاربة الفساد.
طالب5: وأنا مع حضرتك يا فندم.
السيسي: ليه؟
طالب5: كل حاجة هتبقى digitalization هاتبقى كل حاجة يا فندم computerized، بالتالي مش هايبقى في أي حاجة ورقية، فبالتالي يا فندم مافيش أي موظف هايتم التعامل مابينه ومابين العميل عن طريق أي حاجة ورقية.
السيسي: يعني عايز تقولي، عايز تقولي إن تقييد العامل البشري مناسب. مش كدا بردو؟
طالب5: تمام سيادتك يا فندم.. تمام سيادتك يا فندم.
السيسي: كعنوان يعني.. ده صحيح.. ده صحيح.. ولو إنتوا بتشوفوا الإجراءات اللي بتتعمل دلوقتي في استعمال كتير من ال.. المستندات.. إحنا ماشين في الطريق، لسه ماخلصناش كل حاجة .. ده هايقلل كتير من الاحتكاك المباشر، وبالتالي، خلاص، إنت بتتعامل مع مكنة. الهدف من كدا إيه؟ إن أنا بردو أقلل تاني العامل البشري، وأقلل اختراقه.
طالب5: إن شاء الله يا فندم نكون عند حسن ظن سيادتك يا فندم وعند حسن ظن مصر يا فندم. إن شاء الله بإضن الله.
السيسي: ربنا يوقفكوا.
...
26:44
طالبة1: أنا أنا آسفة
السيسي: لا أبدا.. خدي نَفَسك طيب.. خدي نَفَسك.. يلا بسم الله.
طالبة1:(كلمات غير واضحة) تمام يا فندم. (تقفز قفزة الثقة)
طالبة2: هي كتجربة جديدة المفروض تكون الواحد خايف منها شوية في الأول، بس إحنا لما شوفنا زمايلنا الصراحة اتشجعنا جدا، وخلانا نخوض تجربة زي دي، كانت تجربة مشرفة الصراحة.
السيسي: ها، إيه كمان؟ اتفضلي.
طالبة3: أنا من بيت مصري بسيط جدا، إني أكون هنا، ده كان خيال.. إني موجودة هنا يا فندم، ده.. حلم أو حاجات كان كله بيقولي إنها خرافة، وحصلت، إن حد بسيط يدخل ويبقى ظابط في القوات المسلحة ده.. شكرا.. شكرا إن حضرتك إديتنا الفرصة.. الفرص متاحة للجميع.. شكرا.
السيسي: أنا اللي بشكركم، إنتم تقدمتم واجتزتم الاختبارات كلها وربنا يوقفكم، وإنتوا موجودين هنا، ودي حاجة تشرفنا، وتشرف كل، كل الشعب المصري، كل ست وكل بنت.
...
ألقيت الكلمة في القاهرة، بالكلية الحربية، أمام الدفعة الجديدة من طلبة الكلية.
...