نص كلمة السيسي خلال تفقده غرفة عمليات المتابعة لمحافظات الجمهورية 12/4/2022
لواء بالقوات المسلحة: في الـ5 محافظات اللي إحنا عرضناهم على سيادتك في النموذج الاستشاري، معانا دلوقتي، يعني معانا السادة المحافظين في مراكزهم، في جنوب سينا، بورسعيد، السويس، الأقصر.
السيسي: أولًا بهنيكم على الشبكة اللي اتعملت ديت، وده، دي نقلة حقيقية في قدرتنا على إن إحنا، يعني، كدولة يبقى.. يعني.. شايفين كويس الأوضاع على الأرض، وأجهزة كل محافظة، وحتى مع أجهزة الدولة بالكامل، وده أمر، الحقيقة، يعني يدعونا للفخر.
لواء بالقوات المسلحة: عندنا سيادتك الإسماعيلية.. وجنوب سينا.
السيسي: صباح الخير.
محافظ بورسعيد: صباح الخير يا فندم.
السيسي: أهلًا وسهلًا، كل سنة وإنتوا طيبين جميعًا... محافظة بورسعيد، أنا بس عايز أتطمن على موقف توفر السلع والخضروات عندك في الأسواق دلوقتي إيه؟
محافظ بورسعيد: الحمد لله يا فندم يعني عندنا في سيطرة كاملة على الأسواق، مافيش سلع مش موجودة.
السيسي: لأ أنا مش بتكلم هنا بس في الوفرة يا عادل، أنا بتكلم هنا في الأسعار يا عادل. مهم جدًا جدًا إن إحنا نسيطر على، إحنا بنقول للناس من حقها إنها تكسب، بس أنا عايز أقول في ظل الظروف اللي إحنا موجودين فيها دي إحنا بنتكلم في مكسب معقول، عشان ميبقاش ده عبء على المواطنين في ظل الظروف الصعبة اللي إحنا موجودين فيها.
ده أمر مهم، وأمر مهم إن إنا كمحافظة أو كمحافظات، أو كحكومة إن إحنا نبقى موجودين دلوقتي بكثافة عالية جدًا في الشوارع وفي الأسواق، حتى نطمئن إن الأمور ماشية بشكل، مش هقول مناسب في ظل الظروف اللي إحنا فيها. إحنا مش عارفين الموضوع ده والأزمة اللي موجودة برة ديت هاتستمر قد إيه؟
وبقول الكلام ده للسادة المحافظين في الإسماعيلية وفي السويس وفي الأقصر وفي كل حتة. لكن أنا بقول إنها بظروفها دلوقتي مع الاقتصاد اللي إحنا عملناه بتجربة إن إحنا بنشوف إن إحنا نقدر كدولة نستطيع إن إحنا نتواصل مع بعضنا البعض في المراكز اللي إحنا أنشأناها للدولة بالكامل في المحافظات بالكامل عشان التواصل المستمر. مش كدا؟
لكن أنا اللي يهمني في المرحلة اللي إحنا موجودين فيها دي دلوقتي إن إحنا نبذل جهد أكبر من كدا للسيطرة على الأسعار في الأسواق. إحنا موجودين عشان خاطر الناس. ماشي يا عادل؟
محافظ بورسعيد: حاضر.. حاضر يا فندم.
السيسي: طيب.. الإسماعيلية.
محافظ الإسماعيلية: صباح الخير يا فندم.
السيسي: صباح الخير.
محافظ الإسماعيلية: الإسماعيلية يا فندم أنشأنا المركز الإدارة الأزمات في المحافظة وكذلك المركز الإقليمي لإقليم القناة وسيناء، وجهزنا الأطقم العاملة والأطقم حاليًا شغالة على مدار الساعة. نفذنا 5 تجارب. 3 تجارب داخلية داخل المحافظة وتجربتين على المستوى الإقليمي.
السيسي: طب أنا هاقولكوا بردو، اللي قلته لمحافظ بروسعيد. إحنا محتاجين دلوقتي نبقى متواجدين على الأرض بنسب كبيرة قوي. يعني إحنا كمسؤولين ومبقاش في مشكلة إن إحنا المواطنين توجهلنا، يعني، هانسمع لمين غير منهم؟ أو هم هايقولوا لمين غير لينا؟ وبالتالي نبقى إحنا نبضهم، نبضهم في الشارع، وشايفين الدنيا عاملة إزاي، وإذا كان في جهد أكتر من كدا في التواجد أنا بتكلم التواجد في الشارع والتواجد عشان ضبط الأسعار، لأن أنا شايف إن دي القضية اللي إحنا محتاجين نضغط فيها دلوقتي.
أنا بقول الكلام ده لكل السادة المحافظين اللي بيسمعوني، وده ميتمش إلا أنا أبقى أنا متواجد بالفعل، موجود في الميادين وفي الأسواق الرئيسية وأشوف الأسعار بكام؟ والأسعار دي مناسبة ولا مش مناسبة؟ عشان إحنا كدولة نتحرك إذا كنا محتاجين نعمل تعزيز للـ.. للـ.. يعني للمنتجات اللي موجودة ديت، لأن هو طول مافي وفرة، طول مافي وفرة طول مافي فرصة إن الأسعار تبقى مظبوطة، والعكس.
أنا متطمن على إن في تواجد للسلع، مافيش كلام. سواء كانت سلع أساسية أو غير أساسية. لكن أنا مش بتكلم في السلع الأساسية أو في توفرها من عدمه، أنا بتكلم في تكلفة السلع دلوقتي.
عايز أقولكوا على حاجة، ليكوا كلكوا دلوقتي، زي ما قلت كدا لمحافظ بورسعيد، يا جماعة الأزمة اللي موجودة ديت قد تطول شوية، ومعنى كدا إن آثارها هاتبقى موجودة معانا، فإحنا لازم نكون من دلوقتي شايفين ده وبنتعامل معاه، مش على قد اللي هو إنك توفر دلوقتي، أو حتى تظبط الأسعار دلوقتي، لأ، إحنا عايزين يبقى النهارده عندنا تصور إن إحنا تتوفر دلوقتي والشهور القادمة، وضبط الأسعار دلوقتي والشهور القادمة، عشان ده عبء دلوقتي على.. على الناس. ده عبء على الناس كتير خلي بالكوا.
لكن لما المواطن بيلاقيني النهارده جنب منه في الشارع، بيقولك ماهو شايفني، ماهو حاسس بيا. أنا بقول الكلام ده لكل الناس.
أنا مرة تانية بقول كل سنة وإنتوا طيبين جميعا، وسعيد إن أنا بكلمكوا، وبقول تاني نبذل مزيد من الجهد مع المواطنين يعني.
حد عايز يقولي أي حاجة؟ متشكرين وكل سنة وإنتوا طيبين جميعًا. شكرًا جزيلًا.محافظ الإسماعيلية: وإنت بالصحة والسلامة يا فندم.
ألقيت الكلمة في القاهرة بغرفة عمليات المتابعة لمحافظات الجمهورية، بحضور عدد من المحافظين.