نص تعليق السيسي على كلمة اللواء كامل الوزير أثناء تفقده مشروعات بشرق بورسعيد 17/3/2018
لما خدنا المبلغ اللي إحنا قلنا للمصريين آآ تبرعوا لصالح آآ قناة السويس، الـ64 مليار جنيه اللي تم تجميعهم، الناس كلها متصورة إن هم تم إنفاقهم فقط على القناة التانية، أو القناة الموازية، أو القناة الجديدة. لأ طبعا.. ده القناة الجديدة والأنفاق، والشغل اللي بيتعمل دوت.
(أنهى اللواء كامل الوزير كلمته) (تصفيق)
السيسي: إنت بتكلمني يا كامل آآ.. إنت بتـ.. إنت بتكلمني على إن إحنا ممكن نتأخر؟
كامل: والله يا فندم إحنا كنا ماشيين كويس جدًا، بس طبعا، القيود الموضوعة دلوقتي، وإحنا طبعا معاها كلنا، عشان، سيادتك السولار اللي بيعدي، يعني، يتسيطر عليه، علشان العمال اللي بتعدي سيادتك لازم كلهم يتفحصوا، عشان المواد المحجرية سيادتك اللي إحنا بنجيبها كنا بنعتمد أساسًا على محاجر المغارة، وطبعًا المغارة دي منطقة دلوقتي تقريبًا الحركة فيها، يعني، مقيدة شوية.
لو سيادتك استبدلت المغارة مثلا بالسويس، ممكن سيادتك يصل، إجـ، يصل تكلفة المتر المكعب من السِن، أو الأحجار الدورمايت إلى ضعف التكلفة، وتزود التكلفة جدًا.
فإحنا يا فندم إحتمال يحصل تأخير في تنفيذ المشروع، ولكن إحنا فعلًا، إحنا والعمال معانا والشركات معانا، وكلهم موجودين، بنعاهد سيادتك إن إحنا بنحاول نبذل قصارى جهدنا، بنسق مع سيادة الفراق، الفريق مهاب، نسق لنا، زودلنا تلت معديات، نسقنا مع سيادة الفريق أول صدقي، والفريق محمد، و، و، قائد الجيش التاني، بسيادتك بردو، يعني، بنفتش وبنأمن وكل حاجة، ولكن بنقدر نعدي يوميًا مابين، يعني، 50،60% من احتياجاتنا يا فندم، وإحنا طبعا مع إجراءات التأمين، ولازم ننفذها، فسيادتك ممكن سيادتك تسمحلنا بتأخير من شهرين إلى تلات شهور، إحنا كنا يا فندم بنفكر نخلص في، يعني في شهر 6 ده، إحتمال يا فندم يصل مدة التنفيذ أو تتأخر شوية لشهر 10 إن شاء الله.
السيسي: طيب.. أنا بس تعليقي الوحيد هنا، على الكلام اللي قاله اللوا كامل اللي هو النقطة الخاصة بتأخير المشروع ده قبل كدة اتأخر ليه.
زي ما سمعتم كدة، إن تكلفة المتر مربع، أو المتر، عشان يتعمل، يبقى جاهز إن هو يتم طرحه للمستثمرين، بيتكلم في حدود الـ1500 جنيه بالمرافق بتاعته.. مش كدة؟
كامل: تمام يا فندم.
السيسي: طيب.. يعني لما بتكلم في 40 مليون متر، إحنا بنتكلم في تقريبا 60 مليار جنيه.
كامل: تمام يا فندم.
السيسي: أنا بس بقول كدة ليه؟ عشان مانظلمش ال.. مانظلمش التجربة بتاعة الآخرين. إنت لو الأموال موجودة، المشروع هايتعمل. لو الأموال مش موجودة، يقعد عشر سنين كمان. ويقعد عشر سنين تالتين، وأربعين.. آه طبعًا.. لازم نقول كدة ليه؟ عشان مايصحش.
النهاردة إنتوا بتتكلموا في رقم، بالأرصفة، بده، بده، أكتر من 80 مليار جنيه..
كامل: تمام.
السيسي: ولا أنا مش واخد بالي؟
كامل: بالظبط يا فندم.
السيسي: مش كدة؟
كامل: أيوة يا فندم.
السيسي: طيب، يعني مين النهاردة اللي يقدر يضخ 80 مليار جنيه خلال سنتين تلاتة يا كامل؟ لكن أنا بقول الكلام دة بس دلوقت عشان أقول إن إحنا كان لينا إرادة إن إحنا قلنا هانصرف، وهانهتم بتعمير سينا، لأن المنطقة اللي إحنا بنتكلم عليها دي شرق القنال.
كامل: تمام.
السيسي: ودي جزء من سينا، عشان الناس تبقى سمعانا لما قلنا إن إحنا بنتكلم في 175 مليار، و100 كمان بعد كدة يعني 275 مليار، إحنا بنتكلم بس لو شوفتوا الأنفاق اللي بتتعمل، وشوفتوا المشروع ده، هايكلف كام، ثم بقية شبكة الطرق والبنية الأساسية الأخرى زي الكهربا، ومحطات المية، هتجد إن دي أرقام كبيرة جدًا جدًا.
لو ماتوفرتش، لو ماتوفرتش، مش هايتعمل الشغل ده، ماتوفرتش، فالنهاردة لما بنعمل مسار عمل حقيقي ونعمل إجراءات إصلاح اقتصادي، تمكنا من ناحية توفير الأموال، وبالمناسبة، جزء كبير من الموال ديت، هي، عشان بس تبقى الأمور واضحة، لما خدنا المبلغ اللي إحنا قلنا للمصريين آآ تبرعوا لصالح آآ قناة السويس، الـ64 مليار جنيه اللي تم تجميعهم، الناس كلها متصورة إن هم تم إنفاقهم فقط على القناة التانية، أو القناة الموازية، أو القناة الجديدة. لأ طبعا.. ده القناة الجديدة والأنفاق، والشغل اللي بيتعمل دوت.
آه صحيح بنكمل عليه، لكن عايز أقول في الآخر إنه لما توفر التمويل من أموال المصريين ابتدينا إن إحنا نشتغل بالشكل الضخم ده في تلت مشاريع مرة واحدة.
إحنا بدأنا في القناة، وبدأنا في الأنفاق، وبدأنا في المنطقة الصناعية شرق بورسعيد.
إحنا بنقول الكلام ده دلوقتي بس عشان خاطر أمانة العرض عليكم يا مصريين، تبقوا عارفين إن إحنا لما نيجي نقول نقدر نعمل أو مانعملش، هايبقى مرتبط بقدرتنا على تمويل المشروع من عدمه، لما اتوفرت القدرة على التمويل، الإرادة بتبقى دايمًا موجودة، إنما لو مافيش فلوس؟ مش هايتعمل المشروع. دي أول نقطة.
النقطة التانية، أنا مش هقول إن التلت شهور أو الأربع شهور كتير يا كامل، لأ، أنا موافق، لأن طبعًا ماعندناش خيار تاني غير إن إحنا، يعني، هانراعي الإجراءات الأمنية اللي بتتعمل، وإحنا هانخلص الموضوع، بـ، يعني..
كامل: إن شاء الله.
السيسي: مش هايطول معانا كدة. بس أرجو إن إنتوا تنظموا نفسكم مش بس على قد كدة، على قد حركة كمان، الحركة من وإلى من شرق القنال وغربها، لأن في مصالح كتير لناس، و، و، ولازم تتنظم بشكل أو بآخر، هه، عشان بس الدنيا تمشي، مش هانوقف حال ال، فإحنا لازم نعمل ده، تعملوا قوافل، تعملوا ده، تعملوا، مش عايز أتكلم عالهوا يعني..
كامل: تمام يا فندم.
السيسي: ماشي؟
كامل: حاضر يا فندم.
السيسي: متشكرين يا كامل
كامل: تحت أمر سيادتك.
السيسي: شكرًا.
(تصفيق)
ألقيت الكلمة في محافظة بورسعيد، أثناء تفقد الرئيس السيسي لعدد من المشروعات التنموية الجارى تنفيذها بمنطقة شرق بورسعيد، بحضور عدد من السادة الوزراء وكبار المسؤولين.
