نص كلمة الرئيس خلال استقباله خبراء التعليم الياباني بحضور رئيس مجلس الوزراء ووزير التربية والتعليم 6/12/2025
أنا حرصت إن أنا ألتقي بيكم علشان أولًا أرحب بيكم في مصر، أهلًا وسهلًا، وعشان كمان أشكركم على مشاركتكم معانا وعلى جهدكم اللي إنتو بتبذلوه في تعليم أبناءنا يعني وبناتنا، وأيضًا عشان أطلب منكم المزيد.
الفكرة كلها بدأت من خلال آآ إن إحنا مقدرين جدًا الشخصية اليابانية وقدراتها وانضباطها و.. والكفاءة اللي بتتمتع بيها هذه الشخصية، اللي هي ملفتة للعالم كله.
وكان مهم قوي إن إحنا يعني نستفيد من، من ده، من خلال آآ التعاون مع اليابان في مجال التعلم، يعني رغم إن عدد المدارس اللي موجود يمكن يكون يعتقد البعض إنه عدد كبير يعني، لكن أنا بقول إن ده عدد ما زال حتى الآن لا يمثل الأمل اللي إحنا عايزينه، إحنا بنتكلم أكتر من 2 مليون وشوية يخشوا التعليم الابتدائي يعني، مش كده؟ وبالتالي لو عندنا ألف مدرسة آآ بالنظام ده، مش كتير، مش مية ولا حاجة، أكتر من ألف مدرسة.
ولكن بجهدكم إنتو كمان معانا وخبرتكم و.. وإخلاصكم اللي إحنا واثقين فيه جدًا جدًا إحنا هنتحرك أكتر وهنوسع ونطور الفكرة أكتر والجهد أكبر، عشان آآ العائد إحنا متوقعين إنه هيبقى عائد كويس جدًا.
ألقيت الكلمة في قصر الاتحادية بالقاهرة، حيث استقبل الرئيس عبد الفتاح السيسي مجموعة خبراء التعليم اليابانيين، وذلك بحضور الدكتور مصطفى مدبولي رئيس مجلس الوزراء، ومحمد عبد اللطيف وزير التربية والتعليم والتعليم الفني.