نص كلمة السيسي في افتتاح منتدى مصر 19/10/2026

كلمة السيسي في افتتاح منتدى مصر، 19 أكتوبر 2026

شكرًا جزيلًا، بسم الله الرحمن الرحيم، الحمد لله رب العالمين، إحنا لما اتكلمنا على إن إحنا الحكومة تقوم وتجهز نفسها من خلال الـ.. تقدم وتسمع وتناقش، وتقبل حتى أي نقد أو.. لأن محدش يقدر يقول إن.. إن أي حد ممكن يعمل حاجة كاملة 100%.

واللي أنا بس عايز أقوله هنا إن إحنا البيانات اللي هتتقال لكم والنقاش اللي هيتم من الحكومة آآ.. وهيتعرض عليكم مفيش فيه بيان مش دقيق ومش كامل ومش موثوق فيه، طب ده أنا بقول كدا ليه، لأن هم خلال.. يعني إحنا سمعنا كلام مهم قوي قوي دلوقتي من الناس اللي متخصصين في الـ.. في يعني في موضوع السوشيال ميديا و.. والتأثير في الوعي.. وتحطيم الذاكرة.. سمعنا كلام كويس، ولكن الكلام ده وهو بيتعمل في الحكومة على مدى، مش في الحكومة، في الدولة المصرية على مدى مش بس الـ.. مش من 2014، لأ، هو معمول لدولة فيها عدد سكان يعتبر قيمة كبيرة، ومكان لدولة ليها تأثير كبير، وبالتالي التأثير في الدولة دي ومحاولة تهميش دورها أو تحطيم دورها مش هينتهي.

ودي الـ.. وده الـ.. يعني.. الصراع بين الدولة، والدولة هنا مبقصدش بيها الحكومة، الدولة يعني إيه، الدولة بشعبها، كل ما هي تعني كلمة دولة، الإقليم الأرض بالناس، إن هي تبقى دايمًا حرصها، يعني كان اتكلموا هنا على إن أنا اتكلمت كتير في موضوع، أو بتكلم كتير في موضوع الوعي، وبتكلم كتير في الذاكرة، ولما بتكلم على 2011 أنا بستدعي الذاكرة، مش عشان الناس تزهق آآ.. أو أنا أحس الناس تزهق فمتكلمش، لأ، أنا دوري كإنسان من مصر ومع المصريين إن أنا أقول لهم خلي بالكم إن إنتم تحافظوا على الدولة دي وعلى التطورات اللي بيحصل لشعبها.

الشاب اللي كان موجود النهاردا في 2011 عنده آآ.. 10 سنين، بقى عنده 26 سنة، والطفل اللي كان عنده 3، 4 سنين بقى عنده 18، واللي شافه غير اللي إحنا شفناه، وبالتالي إحنا محتاجين دايمًا أنا أتكلم وإنتو تتكلموا، وتقولوا الخط اللي لا يمكن إن إحنا نتجاوزه مهما اختلفنا، ومهما مرضينـ.. يعني ما كنا زعلانين من الحكومة، أو من الرئيس، أو حتى من نفسنا، الحاجة الوحيدة اللي متسمحوش بيها حاجة واحدة بس، إن إنتو تحافظوا على بلدكو، لأن أي حاجة ممكن تتغير وتتحسن، أي حاجة ممكن تتغير وتتحسن طالما إن إحنا عايشين على أرضنا.

واتقال للـ.. يعني الأستاذ محمد كمال بيتكلم على الاستقرار، وأنا بقول له مع الاستمرار، الاستقرار مع الاستمرار... (تصفيق) مش استقرار بس، يفضل الاستقرار مستمر، لأن إحنا لو النهاردا بعد المدة اللي إحنا عملناها دي، اللي هم ربنا سبحانه وتعالى أراد إن إحنا نحقق فيها جزء كبير من الاستقرار خلال الـ.. الـ12 سنة، بس خلي بالكو، وده اتنسى، ده متحققش بـ.. بيعني بدون تكلفة، تكلفة دم، تكلفة دم في كل هجوم اتعمل على مصر من الصعيد لغاية إسكندرية، ده تكلفة مصر دفعتها، الناس اللي استشهدت أو أصيبت، سواء كانوا مدنيين ماشيين في الشوارع بتفجير أو كلام من هذا القبيل، أو في الحرب على الإرهاب اللي اتعملت في سينا، راح فيها من كل أطياف المجتمع، من القضاة راح، من الجيش راح، من الشرطة راحت، من حتى المصلين في الجامع والكنيسة راح.

اللي أنا عايز أقوله إن.. يعني إوعوا تفتكروا إن الاستقرار اللي حصل يعني إحنا تحصلنا عليه بدون مقابل، لا ده فيه مقابل كبير، ومش معقول نكرره كل شوية، مش معقول إن إحنا الاستقرار ده نبقى مستعدين آآ.. نقدم فيه تضحيات بالطريقة دي، التضحيات مش مادية، التضحيات إنسانية كبيرة جدًا إن الناس تبقى قاعدة ومش مطمنة، إن ما.. أجيب لكم الـ.. أجيب التسجيلات، يعني تقول لي إنت بتتكلم على المنتدى ولا بتتكلم على ده؟ المنتدى معمول عشان يعني نتكلم على ده، المنتدى معمول الأسبوع دوت عشان وإحنا بنتكلم تيجي فرصة إن الناس كلها منتبهة معانا ونشاور على حاجات كتير، بالإضافة للبيانات والـ.. والنقاش اللي هيتم.

لكن أنا لو النهاردا جبت لكم التسجيلات اللي كانت بتيجي على الراديو والتلفزيون والاستغاثات اللي كانت بتتم في الفترة بتاعة 2011 و12 و13، والتعدي على الناس في الشوارع وعلى العربيات وسرقتها، طب.. طب حد يقول الإحصائية بتاعة عدد العربيات اللي تم سرقتها.. سرقتها في الـ.. في الفترة دي، إحنا بنتكلم في آلافات.

إذن الهدف من المنتدى هو هدف فرعي بسيط جدًا جدًا من فكرة دعم الاستقرار في وجدان الناس والعمل عليه، ودي قضية هفضل أتكلم فيها لغاية لما أمشي من مكاني، إوعوا تسكتوا وتبطلوا دعم لفكرة الأمن والاستقرار للدولة المصرية، لأن ده آآ.. ده.. ده عمل كل الخصوم، أنا مش كل الكلام بقدر أقوله يعني، يعني مش كل الكلام بقدر أقوله، لأن إحنا المسؤول محسوب عليه كلامه، فمش كل حاجة يقدر يقولها يعني، لكن ممكن الناس الـ.. يعني تقدر تتكلم وتقول من غير ما تـ... مش، مش واضحة... أنا مقدرش أقول كل حاجة.. مقدرش أقول كل حاجة. (تصفيق)

آآ.. يعني كانوا بيتكلموا هنا دلوقتي على موضوع آآ.. مواقع التواصل وإن هي تاخد مدة زمنية بسيطة، طب أنا بس عايز أقول التوازن في كل شيء مطلوب، الوسطية في كل شيء مطلوب، عدم الإسراف في كل شيء مطلوب، ولما الحق سبحانه وتعالى يقول إن الله لا يحب المسرفين، الإسراف ده معناه هو التجاوز في كل شيء، مش بس في الأكل والشرب و.. والسلوكيات الـ.. لا، حتى أنا النهاردا لما حد يقعد على التليفون مثلًا 5، 6 ساعات كل يوم، أنا مش.. يعني في شرح أكتر من كدا بيتقال لي على إزاي هم بيقدروا يفهموا ويعزلوا كل شخصية، كل شخصية من اللي بتخش، لأن فيه تقدم هائل في الشغلانة دي، فيعزلوا الشخصية ويعرفوها، وبالتالي يقدروا يعرفوا حجم آآ.. التأثير اللي ممكن يتعمل على الرأي العام رغم إن هو بيتعامل معاه لوحده، لكن يفضل يعزله لوحده، ويتعامل معاه لوحده، ويجمع بياناته لوحده، وير.. يرسم له صورة لوحده، ثم بعد كدا تتوجه الحركة لتحويل الكتلة دي إلى كتلة تدمر بلدها، إزاي أحركه بعد ما قدرت إن أنا أعزله لوحده وأدي له تصور معين، فييجي وقت معين أطلقه بقى بعد ما شحنته خلال آآ...

الكلام ده فيه كلام كتير، الكلام اللي اتقال النهاردا فيه كلام كتير، وإحنا الأسر.. أنا مش ضد أبدًا التقدم العلمي والتكنولوجي خالص، بس أنا بقول لكم إن ده أمر محتاج مننا كلنا إن إحنا نسيطر عليه مع أبناءنا وبناتنا اللي هم الولاد الصغيرين، وحتى إحنا الكبار، ما أنا بقعد مع أحفادي وبشوفهم ألاقيهم قاعدين وماسكين التليفون، يعني خلاص يعني، بس أنا بتكلم الاستخدام المتوازن لكل شيء أمر مهم.

أرجع بقى تاني للمنتدى هنا، أنا كل اللي بقوله للمصريين، إحنا حبينا نحشد في كل قطاع من قطاعات الدولة ما تم التنفيذ فيه، بنقول كان فين، وبقى فين، وبنقول حتة أخرى، طب لو مكانش، يعني مثلًا لو جينا على قطاع زي الكهرباء يعني، كان ليه حجم معين، و.. وذاكرتنا إحنا كمواطنين افتكروا إن الـ.. إن فيه تعليق للرئيس مبارك مرة كان بيسأل على وزير الكهربا الـ.. قال الله يمسيه بالخير أو آآ.. كان وزير الكهرباء آآ.. في عصر ماهر أباظة مش كدا؟ فهو كان اللي كان ماسك ساعتها الدكتور حسن، فهو قال آآ.. الله يمسيه بالخير ماهر أباظة، لأ، والكلام ده قعد 4، 5 سنين، ثم قامت الأحداث اللي حصلت في 2011، وبقى فيه أزمة كبيرة جدًا، وبعدين طب تتعمل.. الـ.. إحنا كـ.. بني آدمين.. ناس يعني.. بنهتم باللي يخصنا بس، وده أمر آآ.. طبيعي يعني، لكن مهم قوي إنك إنت ما دام عايز.. عايز يعني.. تعرف بلدك، وتطمن عليها، لا مش تطمن على بلدك، تطمن على القائمين عليها، مش على بلدك، القائمين عليها، يا ترى هم فعلًا قدروا في إطار الإمكانيات والظروف المتاحة إن هم يحاولوا يحلوا مسائل كانت عصية عن الحل ولا لأ.

من كام يوم... خلوا.. أنا بتكلم دايمًا في سياق، يعني مبقولش كلام مش مرتبط بكلام سابق أبدًا، عشان ببقى هدف منه إن أنا أبني فكرة آآ.. متكاملة مستمرة مع اللي بيسمعني، أنا كنت بتكلم من كام يوم بقول، من كام يوم بقول جابوا البلد على الأرض، يعني إيه جابوا البلد على الأرض، يعني إيه كلمة جابوا البلد على الأرض؟ وأي حالة عدم استقرار كل اللي اتعمل ده ممكن يضيع برده، بتخوفنا؟ يقول لك ما.. ميخافـ.. ميخوفكمش.. مثلًا يعني، لا اتحركوا بس و.. ولخبطوا الدنيا وما تخافوش، طيب.. بردو بترجع تاني للموضوع هو هو؟ معنديش غيره، هي وبس، هي وبس، والكل يمشي بس هي تقعد، الكل يمشي بس هي تقعد (تصفيق) لأن آآ.. دول 110 مليون، 110 مليون، مين يشيل ذنبهم قدام ربنا لو ضيعهم؟

نرجع تاني لكلمة "جات على الأرض"، طب يعني قطاع الكهربا كان كويس؟ طب قطاع الزراعة كان كويس؟ قطاع الصناعة كان كويس؟ قطاع الاستثمار كان كويس؟ قطاع التعليم كان كويس؟ كل القطاعات، يعني كان أنا في تقديري إن كان 2011 ده آآ.. خلاص يعني ده قمة السقوط يعني، فإحنا اللي بدأنا بيكم، بالمصريين، مش بيا، يعني بيكم، مرحلة بناء حقيقي لدولة مش مرتبطة الفكرة فيها بـ.. خالص، خالص، بإن الرئيس ده... وأنا هنا مش بمن أو بقدم نفسي، لا والله، مكانش فيه خالص في الفكرة إن أنا أخلي بالي على نفسي، أو حتى على أهلي، خالص والله، ولا كان يهمني أبدًا غير إن الصح بقدر الإمكان، لأن مش كل الصح ممكن نعمله بالمطلق، لأن لازم تحط، فيه اعتبارات في أي تخطيط تعمله، إن فيه ناس يعني فيه رأي عام برده ولازم تعمل حساب، لكن بقول إن المخاطر في اتخاذ كل القرارات اللي اتاخدت دي كانت عالية جدًا، ولكن كان.. كان، كان مطلوب إن إحنا ناخدها عشان تسمعوا اللي هتسمعوه دلوقتي.

إنتوا متنسوش إن وإحنا بنتكلم على ده اللي إحنا بنتكلم فيه النهاردا، وكلمة الزيادة مقصدش بيها حاجة، لكن يعني حط في دماغك إن أكتر من.. 30 مليون؟ عدد السكان زاد.. مش كدا ولا إيه؟ يعني 30 مليون إنسان جم في الفترة بتاعة من 2011 للنهاردا، كنا 80، 85 والنهار ده 108 ولا.. مش كدا؟ يعني تقريبا 30 مليون، يعني كان.. طب دول لما جم، يعني.. طب اتخرج كام؟ إذا كنا بنقول إن سوق العمل بينزل فيه كل سنة مثلًا تقريبًا مليون، طيب.. المليون دول على مدى آآ.. 12 سنة، يعني 12 مليون، طب هم لو مش عايشين، ممكن يبقى فيه كلام، مستوى المعيشة، ممكن، أقبل كدا، إن فيه فرق إن أنا آخد آآ.. 10، أو آخد 25 أو 30، ممكن نتكلم في النقطة دي، وده اللي إحنا بنحاول نعمله يعني.

لكن عايز أقول في النهاية لما نيجي نقول إن معدل الـ.. البطالة 5 و7؟ مش كدا يا دكتور؟ 5 و8 الدكتور مصطفى بيقول لي، طب يعني مع اللي إنت نزل في سوق العمل ما يقرب من 12 مليون إنسان، نختلف أو نتفق على إن مستوى الـ.. الدخل زي ما قلت كدا مش.. قد يكون مش يعني.. مش زي ما بنتمنى يعني، إحنا نتمنى إن كل مواطن ياخد آآ.. يعني اللي يكفيه ويكفي أسرته وكلام من هذا القبيل يعني.

فأرجع تاني أقول إن المنتدى الهدف منه إن إحنا نسمع ونسمع كويس، وما دام إحنا جينا حضرنا مفكرين أو مثقفين أو إعلاميين أو حتى المواطن العادي، خد، خلي الأسبوع ده.. خلي الأسبوع ده، ركز معانا فيه، لأن إحنا هنقول فيه تفاصيل كتير لكل الموضوعات اللي اتعملت، سواء كانت تهمك أو متهمكش، بس أكيد هي بتأثر في حياتك، يعني ممكن تكون ما تهمكش، وممكن يكون اللي بيهمك إنك إنت دخلك زاد كام أو بتصرف كام، وده بردو مشروع، لكن أنا اللي هقول لك إن اللي اتعمل ده مفيش شك كان ليه تأثير عليك، وهيبقى ليه تأثير على أبنائك وأحفادك فيما بعد.

طولت عليكم لكن عايز أقول إن إحنا، يعني.. الحكومة جاية تقول ده اللي إحنا عملناه، وده اللي إحنا بدأنا منه، وده اللي لو ما كناش عملناه كان يحصل كدا، شكرًا جزيلًا.

ألقيت الكلمة في مركز مؤتمرات فندق سانت ريجيس بالعاصمة الإدارية الجديدة حيث شهد الرئيس عبد الفتاح السيسي انطلاق أعمال "منتدى مصر 2026" تحت شعار "نظرة لليوم.. رؤية للغد"، وذلك بحضور الدكتور مصطفى مدبولي رئيس مجلس الوزراء، والمستشار هشام بدوي رئيس مجلس النواب، والمستشار عصام الدين فريد رئيس مجلس الشيوخ، والدكتور أحمد الطيب شيخ الأزهر الشريف، والبابا تواضروس الثاني،  إلى جانب لفيف من السادة الوزراء وكبار رجال الدولة.