نص كلمة السيسي خلال حفل إفطار الأسرة المصرية 14/3/2026
السيدات والسادة،
الحضور الكرام،
أود في بداية حديثي أن أعبر عن سعادتي البالغة وعميق امتناني بوجودي معكم في هذا اللقاء الذي يجمع الأسرة المصرية من كافة مكونات الشعب المصري العظيم، وأوجه حديثي اليوم إلى الأسرة المصرية التي أعتز بها وبالانتماء إليها، كي أضع أمامكم صورة دقيقة لتطورات الأوضاع الإقليمية لما لها من انعكاسات مباشرة على واقعنا الداخلي.
إن منطقتنا اليوم تقف على مفترق طرق تاريخي، تواجه تحديات جسيمة ومتغيرات متسارعة في ظرف استثنائي بالغ الدقة. ففي الشرق نبذل قصارى الجهد لإخماد نيران الحرب في منطقة الخليج العربي، تلك الحرب التي تحمل تداعيات اقتصادية وإنسانية وأمنية عاصفة، لا يملك أحد القدرة على درئها، وستطال الجميع بلا استثناء.
وفي الوقت ذاته، نعمل على خفض التصعيد في باقي الدول العربية، التي تشهد صراعات ونزاعات مسلحة، سواء في الشرق أو الغرب أو في الجنوب من مصر.
وفي هذا السياق، تجدد مصر تأكيدها القاطع لإدانة الاعتداءات التي تتعرض لها الدول العربية الشقيقة، وما يمس أمنها واستقرارها في ظل الحرب الدائرة بالمنطقة. كما تؤكد دعمها الكامل والراسخ لأشقائها العرب، وتعيد الدعوة إلى خفض التصعيد وتغليب لغة الحوار والعقل، وضرورة الالتزام بأحكام القانون الدولي العام، والقانوني الإنساني الدولي.
ولقد ألقت هذه النزاعات وتلك الأجواء الملتهبة بظلالها الثقيلة على الاقتصاد العالمي، فأصابت سلاسل الإمداد بالاضطراب، وأشعلت أسعار الطاقة والغذاء في العالم أجمع، ولم تكن مصر بمنأى عن هذه التداعيات.
إن هذه الظروف إلى جانب ما تشهده المنطقة من حروب في غزة وإيران، قد فرضت على الحكومة اتخاذ إجراءات اقتصادية ضرورية لضمان استمرار توفير السلع الاستراتيجية، وصون الاستقرار الاقتصادي الوطني، وحماية مقدرات الشعب المصري.
وأؤكد بكل وضوح أن الدولة تدرك تمام الإدراك حجم الضغوط التي يتحملها المواطن المصري في ظل هذه الظروف، وأعلم أن هناك مشاعر سلبية إزاء رفع أسعار المنتجات البترولية مؤخرًا، وهو أمر لم تكن الدولة لترغب في تحميل الشعب تبعاته ومعاناته، غير أن مقتضيات الواقع تفرض أحيانًا اتخاذ إجراءات صعبة، لا بديل عنها لتفادي خيارات أشد قسوة وأخطر عاقبة.
واسمحوا لي إن أنا أخرج هنا عن الكلمة وأتكلم في النقطة دي تحديدًا، لأن مهم قوي إن إحنا نبقى، يعني.. متأكدين من حاجة كدولة إحنا حريصين عليها.. أنا متأكد إن انتوا عارفين كويس قوي إن إحنا لا يمكن نكون بنعمل إجراء... أولًا ال.. إنه يكون مدروس كويس، وإنه الخيارات المتاحة بيبقى أقلها، حتى لو اخترناه وكان انتوا شايفين إن هو مش ده أفضل حاجة، لكن ده هو أقل خيار تكلفة على المواطنين.
إحنا.. اتكلمنا قبل كده إن خلال الـ5 سنين اللي فاتوا دول كانت الظروف صعبة، واتكلمنا قلنا، ويعني انتوا سمعتوا الكلام ده مني قبل كده، قلنا إن كورونا خدتلها سنة ونص سنتين، ثم الحرب الروسية، ثم حرب غزة، وعايز أقولكوا إن يمكن ال.. الحرب اللي دائرة الآن قد تكون أكثر تداعيات من ال.. من اللي فات.
وأنا بقولكوا كده بمنتهى الصراحة، ولازم تعرفوا كويس قوي.. يعني دايمًا بشوف كتابات آآ زمايلنا في الصحافة و.. والتعليقات اللي في الإعلام موجودة.. وأيضًا الكلام اللي حتى على مواقع التواصل أحيانًا يعني، مش كل حاجة طبعًا، لكن معظم الحاجات. فـ.. لفت نظري مقال لزميل آآ بيقول يعني إن الحكومة مبتقولش ال.. الصراحة.. ويمكن الحكومة، يعني، بتوعد بوعود ومبتنفذهاش. وطبعًا، ده ممكن يكون جزء من ال.. يعني، من الطرح، جزء من الطرح له وجاهته، يعني، إن هم الناس بتتمنى إن إحنا كدولة نقدر نلبي كل آمال وطموحات الناس.. لكن إحنا مش كل حاجة ممكن بنتمناها نقدر نعملها.. لأسباب آآ خارجة عن إرادتنا يعني اللي إحنا بنتكلم فيه ده، ال 5 سنين اللي فاتو دول، كل اللي حصل فيهم، إحنا ماكناش، يعني، ماكناش سبب فيه، أبدا، بالعكس إحنا كنا بنتلقى تبعاته، وإحنا مش دولة غنية قوي عشان تقدر تتحمل صدمات متلاحقة كدا، إحنا بنتكلم على 120 مليون، وعايزين، يعني، نعمل كل حاجة، بما فيه توفير ال.. متطلبات الناس، وبشكل يبقى يتناسب مع آآ إمكانياتهم يعني.
فـ.. الصدمات دي، إحنا، حتى في برنامجنا اللي إحنا عملناه، يعني إحنا في 2016 كنا دخلنا في برنامج للإصلاح الاقتصادي، وربنا سبحانه وتعالى وفقنا وقدرنا نحقق فيه المأمول يعني، الأهداف بتاعته إحنا حققناها، لكن، اللي بعد كدا ده، في 2020 و.. والـ5 سنين اللي فاتو دول، ده جزء كبير جدًا إحنا ماكناش قادرين آآ يعني هنغيره إزاي؟ إذا كنت فقط، فقط، خلال السنتين اللي فاتو دول أو أكتر شوية، فيه دخل مباشر، 10 مليار دولار، يعني، فقدتهم مصر، ده حوالي 500 مليار جنيه تقريبًا، ما تفتكروش إن الرقم ده يعني، يعني، مش هيبقى ليه تداعيات وليه تأثير على آآ علينا يعني.. يعني أي حد مننا بيبقى عنده موازنة لبيته وحاله، لو اتشال أو استقطع أي جزء منه لأي سبب من الأسباب، بيبقى له تأثير على مسيرة الإنفاق، أنا بقول على مستوى الأسر عايشة ده وعارفاه كويس.
إحنا تقريبًا عشان تبقى الأمور واضحة، آآمم.. يعني لو قلت حجم الإنفاق على المنتجات البترولية، حد يعتقد إن المنتجات البترولية دي، فقط هي ال.. بتُستهلك لصالح حركة العربيات وال.. والمعدات المستخدمة، بس، لأ.. بالمناسبة ده الجزء اليسير، إنما الحجم الأكبر هو اللي بيستخدم في محطات الطاقة.. محطات الطاقة، يعني وزارة البترول بتوفر غاز، وتوفر بوتاجاز وبنزين ومازوت وسولار، فال.. المواطنين ممكن يشعروا إن هو يعني كان زيادة، هو ال.. إن فيه زيادة في أسعار المنتجات دي.
لكن أنا عايز أقول لكم بصراحة، وأنا هقول رقم يمكن يبقى.. يوضح ده.. إحنا تقريبًا.. تقريبًا كدا.. والدكتور مصطفى يصلح لي.. إحنا تقريبا بنستهلك بـ20 مليار دولار منتجات بترولية، مش كدا يا دكتور؟ طيب. الـ20 مليار دولار دول، يساووا ترليون جنيه.. يساووا ترليون جنيه.. طيب. الموضوع مش بس زي ما قلت كدا، ويمكن محدش اتكلم بالطريقة دي في الموضوع ده آآ وشرح للزملا وشرحه آآ للناس عشان تبقى عارفة حجم التحدي اللي الدولة بتاخد بيه القرار.. وإحنا مش، يعني، مبنقدرش نقول كل حاجة لكم بردو، لأسباب، يعني، مختلفة، ومنها أسباب أمنية يعني، يعني مش كل ما يمكن يعني من بيانات أو معلومات إحنا ممكن نتيحها آآمم.. كدا يعني.. وده مش آآ مش عشان آآ.. كل دولة ليها بتبقى لها بيانات و.. موضوعات مبيتمش طرحها يعني. لكن أنا بقول كلام ممكن يبقى.. يمشي يعني.. بس كلام صادق، وكلام دقيق.
بقول تاني، إحنا تقريبًا بنبقى محتاجين في السنة للمنتجات دي عشان محطات الطاقة عشان يبقى فيه ال.. الطاقة الكهربائية اللي بيتم توليدها، يا بالغاز يا بالمازوت يا بالسولار، وطبعًا الأفضل بالسولار، أو لو ربنا وفقنا وقدرنا إن إحنا نخلي حجم الطاقة المنتَجَة من الطاقة الشمسية كبير، كل ده ما هيبقى له عوائد إيجابية علينا، بس هياخد وقت يعني.
فنرجع تاني بنقول إن.. تقريبًا إن قلت إن الطاقة دي اللي بتُستخدم في محطات الكهربا، تساوي 60% من الرقم اللي أنا قلته ده، 60%، يعني كام 60%؟ يعني 600 مليار جنيه، الدكتور محمود اتفضل.. اتفضل.. يعني 600 مليار جنيه.. أرجو وأنا بشرح الحاجات دي، طالما إن إحنا، ده أنا بقول لكل الناس، الكلام ده يهمك، لأن الكلام ده يعني كلامنا، ده حالنا، دي ظروفنا. الـ600 مليار جنيه دول المفروض إن إحنا بنستهلك بيهم عشان ننتج الكهربا دي.
أنا هكون صادق معاكم، وبردو وزير الكهربا يصلح لي، ووزير البترول يصلح لي، وزير البترول بياخد من وزير الكهربا ال.. أنا بقول محدش اتكلم في الموضوع ده قبل كدا، بس عشان ترتاحوا يعني، بياخد منه من 8 ونص لـ9 مليار جنيه في الشهر، صح كدا يا دكتور؟ طيب، يعني 8 في 12 بـ96، يعني 100 مليار جنيه.. طب وبقية الكهربا؟ الـ600 مليار؟ يبقى فيه 500 مليار جنيه.. يبقى فيه 500 مليار جنيه.. لو أنا طالبتك إنك إنت تدفعهم، هتدفع الفاتورة اللي معاك دي قدها تلت أربع مرات.
زميلي اللي كتب المقالة وقال الحكومة، يعني، بتوعد وعود ومتعملهاش.. لو الأرقام الحقيقية، الأرقام الحقيقية، ال.. يعني قلنا إن إحنا ناخدها عشان المفروض إن أنا، يعني ما.. مفيش مكاسب ولا حاجة، يعني مش مثلا ببيع آآ.. بنزين وسولار وبوتاجاز فأنا ببيع، بجيب بجنيه ببيع بجنيه وربع، مثلًا، لا مبيحصلش ده، ولو كان الحال كدا كانت شركات الكهربا وشركات البترول في مصر من أغلى وأغنى الشركات.
الشركات دي مبتجيبش التكلفة الحقيقية بتاعتها، يمكن دكتور مصطفى والزملا في الحكومة يتألموا من كلامي، بس دي الحقيقة، بس دي الحقيقة. وأنا لما جيت شرحتها قوي كدا، أنا مش عشان حاجة، عشان إنتم آآ إحنا شركاء، دي مش بتاعة حد، لا بتاعة الحكومة.. الدولة دي بتاعتنا كلنا.. مش بتاعتي.. دي بتاعتنا كلنا، وإحنا كلنا لينا فيها زي بعض، وعلينا فيها زي بعض. أنا ممتلكش فيها أكتر من مرتبي، والله يعلم، ونفس الكلام زمايلي اللي موجودين في الحكومة، محدش يقدر، ولو أي حاجة غير كدا يبقى تجاوز و.. بنعمل ال.. إجراءات آآ...
نرجع تاني بس للنقطة دي، إذن أنا النهاردا ببقى محتاج عشان أوفر ال.. أنا مبتكلمش خالص هنا، ومحافظ البنك المركزي موجود، التحدي فيه تحدي تاني، التحدي إن أنا إن وفرت الترليون جنيه، أبقى عايز الـ20 مليار دولار، أبقى عايز الـ20 مليار دولار، أدي له بالجنيه، وهو يحولهم لدولار، ويجيب المنتجات، مش كلها آآ يعني.. بنشتريها من.. من الخارج.
فـ.. إذن آآ ده كان أقصى حاجة ممكن آآ نعملها. فحد يقول طب.. طب البنزين أرخص من كدا.. ممكن حد يقول لي كدا، حتى على الأسعار القديمة، 60 دولار أو كدا.. بالمناسبة إحنا بنعمل موازنتنا برقم بيتم تحديده في ضوء دراسة للأسعار المحتملة للمنتجات البترولية آآ خلال ال.. التخطيط للموازنة دي، بنقول يعني إن الأسعار السايدة هتبقى في حدود 60، 70، 80، يعني.. وبنعمل موازنة على كدا، والرقم بيبقى مقدر إن إحنا نقدر نتعامل ويبقى فيه.. إحنا بنسبة أمان جيدة جدًا. طيب.
لكن لو حصل أي زيادة في الأسعار.. هل النهاردا يعني.. ده طبعًا بس عشان محدش يحصل له يفزع ولا حاجة إحنا الحمد لله أمورنا مستقرة بفضل من الله سبحانه وتعالى، لكن أنا بقول، هل.. وجينا قلنا إن إحنا مثلا هندي رقم نسبة قليلة من الوقود للناس؟ معملناش كدا.. طب هنـ.. هنعمل إجراءات لضبط الموقف شوية آآ في استهلاك الوقود، لا معملناش كدا.. طب إحنا هنـ.. هنخلي ال.. محطات الطاقة الكهربية تشتغل مثلًا 20 ساعة و4 ساعات؟ بردو معملناش كدا.. إحنا ماشيين عادي خالص.. لكن حبيت أقول لكم بس، إن.. لو كان الرقم الحقيقي للأسعار، بدون أي أرباح، والله أنا بـ.. يعني.. بحط قدامكم، قدام منكم الحقائق بمنتهى الأمانة، وفي كلمة كمان جنب منها كدا.. ومنتهى الفهم، بمنتهى الفهم، عشان فيه ناس كتير الحقائق مبتوصلهاش، ومبتشرحلهاش الصورة، ويمكن متهتمش قوي.. أنا بهتم بحالي، كإنسان عندي أسرة، بهتم إن أنا أوفر لها حاجتها، كإنسان عندي أسرة عايز أجيب لها طلباتها لأولادي.. فمش هبقى مهتم قوي بالموضوع ده اللي أنا بحكي فيه دلوقتي، بس أنا بحكيه عشان تبقى عارف، وكل أسرة تبقى عارفة إن إحنا حريصين على إن إحنا بقدر ال.. بقدر ما يمكننا وبقدر ظروفنا وبقدر إمكانياتنا إن إحنا نحاول نخلي حياة الناس آآ.. آآ.. أسهل من كدا، متبقاش صعبة يعني.
بس كمان.. اللي بيحصل في منطقتنا ده، لازم تقعدوا تفكروا فيه كتير قوي.. قوي.. قوي.. ده.. يعني إحنا بنتكلم آآ ده مفترق طرق حقيقي.. و.. بنتكلم على ظروف آآ مش بس اقتصادية صعبة، مش عايز أزود عن كدا عشان تبقى الأمور.. بنفطر مع بعض والأمور جميلة ولطيفة يعني.
فالمهم.. فأنا بس حبيت أشرح النقطة دي وأقول إن لأ، أصل مفيش سبب يدعونا يعني كدولة، ومؤسسات، مش هعمل لك حاجة حلوة ليه؟ يعني عايز بس كل آآ مصري ومصرية يفكروا، تفتكر أنا مش هعملك، مش عايز أعملك حاجة كويسة ليه؟ مش عايز أخليك فرحان في البيت ليه؟ يعني.. معقول؟ ممكن يبقى فيه حد آآ مسؤول عن ناس، إنت كرب أسرة في البيت، مش عايز تسعد ولادك؟ عايز تجيب لهم كل حاجة حلوة؟ لو كنت الإجابة آه، طب ما إحنا كدا بردو.. الإجابة كدا بردو، إحنا بردو حريصين على ده، بس.. يعني.. متنساش.. متنسوش إن إحنا دخلنا في أزمة في 2010 و11 ولا في 2011 وكان ليها تداعيات كبيرة جدًا جدًا، مين يدفع تمنها؟ ما إحنا اللي بندفع تمنها، إحنا مين؟ إحنا الناس، إحنا الدولة.. إنت بتتكلم على خساير كبيرة قوي.. أنا بتكلم في الفلوس بس.. لكن في خساير تانية.
فـ.. في ناس متبقاش عارفة حاجة، وتتكلم، وبعدين كلمتك مسموعة، فتبقى إنت بتقول ربع حقيقة، أو نص حقيقة وإنت مش عارف حاجة، وده أمر خطير جدًا جدًا.. إنت ممكن تكون الكلام ده بتعتقده أو بتفكر فيه مع نفسك، ولا بأس، ليه؟ ما.. مدام مش هتئذي بيه غير فهمك، خلاص، سهلة.. لكن لو كان الكلام ده هتقوله ولقيت صوتك مسموع، لأ، خلي بالك، خلي بالك كويس عشان ماتـ.. متديش للناس آآ طاقة مش حقيقية في فهم موضوعات صعبة، وأنا بشرحها بمنتهى منتهى البساطة، بمنتهى البساطة.
أنا قلت رقم كلنا نقدر آآ.. وبقول النهاردا أي مسؤول وأنا بقول له ردني في الكلام عشان لو هو عنده حاجة أصح يقولها لي وأقولها لكم، أو تسمعوها منه، يعني أنا لو عايز أزود النهاردا فاتورة الكهربا، أضرب في 4.. لو حضرتك بتدفع 1000 جنيه تدفع 4000، لو بتدفع 10000 تدفع 40000.. الدكتور مصطفى مش هيقول الكلام ده في المؤتمر الصحفي ولا حتى وزير الكهربا ولا وزير البترول، بس حقكم علي إن إنتوا تعرفوا.
حد يقول لي مثلًا طب متعمل طاقة جديدة ومتجددة.. صحيح، إحنا المفروض إن إحنا تخطيطنا 2030 يبقى 42% يا دكتور؟ كويس، أنا بقول لهم إن 42% آآ رقم آآ المفروض إن إحنا نحلم بأكتر من كدا، بس مدام مهتمين، عشان نعمل ده، إنت بتغير آآ.. آآ.. منظومة ال.. النقل والتحكم والتنظيم في الكهربا للشبكة المصرية بالكامل، عشان أقدر أقول إن أنا حتى أصل لـ42% في 2030، مع الوضع في الاعتبار إن أنا لما أجيب مستثمر يعمل طاقة آآ متجددة، سواء كان طاقة، طاقة شمسية أو طاقة رياح، فـ.. هياخد تقريبًا.. تقريبًا لو أنا بجيب في محطات الطاقة الحرارية ال.. اللي موجودة، وبردو وزير الكهربا يردني، لو أنا بقول الكمية اللي بنتجها بتساوي بمحطات الغاز مثلًا 1000 دولار، يبقى بالطاقة الشمية هتبقى بـ500 دولار، يعني هنزل الفاتورة 50% للكمية بتاعة الـ42%، مش لكامل الطاقة، لأن أنا مأقدرش أعمل غير مزيج.. مزيج للطاقة.. مفيش بلد في العالم عاملة كل إنتاجها من الكهربا على طاقة الشمس والرياح، لازم يبقى فيه لأسباب فنية مش.. مش أسباب أخرى، ولا إيه يا دكتور محمود؟ هه؟ طيب.
لكن في جميع الأحوال، و.. في النقطة دي أنا بقولها عشان ده، ده تحدي دايمًا هيبقى بيـ.. هاجس عندنا كدولة، وعندكوا، لأنها بلدنا كلنا زي مقلت.. فـ.. حتى ده إنت هتبقى عايز مستثمرين، وده موجود، بس كمان لما تيجي تقول لل.. لل.. الدكتور محمود، أنا عايز تظبط الشبكة بتاعتك عشان تقدر تستوعب ال.. الـ42% دول، هيقول لي أنا محتاج أضيف على اللي أنا عملته شبكة جديدة بـ50 مليار، صح كدا يا محمود؟ كويس. وعايز لها محطات تحكم وأنظمة أخرى ممكن تخش لها في آآ، مليار دولار؟ كله على بعضه؟ اللي هي محطات التحكم اللي إنتوا عايزين تعملوها، عملنا جزء منها ولسه بنكمل بقيتها.
إذن حتى لو إنت عايز تعمل ده، فإنت محتاج تعمله بـ.. باستثمارات أو بأموال يعني تُضَخ فيها، ومعظمها هيبقى بالعملة الحرة عشان نهيأ أو نـ.. نأهل الشبكة زي ما بيقولوا هم، عشان تقدر تستوعب الـ42% دول.
طب كلامي أنا مع الحكومة إيه؟ بقول لهم لأ الـ42 % ده رقم لو قدرنا نتجاوزه، ومش بس نتجاوزه 2030، لأ نتجاوزه قبل كدا أحسن، ليه؟ لأن أنا هخفَّض من فاتورة الوقود يعني اللي هو الغاز وال.. والسولار والمازوت كدا للمحطات دي على حسب ما أنا هقدر وبسرعة، لما اعمل كمان سنتين غير لما أستنى لغاية 2030، 3 سنين غير لما أستنى 2030، عشان أوفر حجم من ده.
لكن يتبقى إن أنا بقول مرة تانية إن، أنا شايف كريم قدام مني، إنتوا ليه مبتتكلموش مع الناس؟ ليه مبتتكلموش مع الناس؟ أنا بتكلم بصراحة، إنتوا، لازم تقولوا للناس كل حاجة تقريبًا يعني، ونراجع نفسنا قبل ما نتكلم يا دكتور مصطفى، بس لازم نتكلم ونقول للناس الحكاية، عشان إحنا مع بعض، إحنا مع بعض.
فـ.. أنا جبت بند واحد.. أنا جبت بند واحد.. اللي هو بند الطاقة اللي.. ممكن يكون فيه ناس زعلت قوي عشان الفلوس اللي تم أو ال.. زادت آآ أسعار الوقود. أنا بقول آآ فيه خناقة بيبقى بين المهندس كريم والمهندس محمود ووزير المالية، ده مش بتبقى في الموازنة، دي خناقة على طول، بس هم بيتخانقوا مع بعضهم مبيقولوش للناس، وأنا مبحبش الحكاية دي، أنا أحب أقول دايمًا بشفافية، وهي دي الحكاية، واللي عنده حل، ييجي وإحنا هنبقى سعداء جدًا إن إحنا نسمع منه، وأنا هقول تعبير صعب: وميتغالبش كتير. ميتغالبش كتير، خليك على قد اللي إنت فيه.. خليك على قد اللي إنت فيه. الدولة حاجة تانية خالص، ومصر حاجة تانية خالص. (تصفيق)
خلي بالكم إحنا محتاجين نبقى كلنا مصريين، نبقى مع بعض في الظرف اللي إحنا فيه ده. المنطقة بتتغير. المنطقة بتتغير. فـ.. ومش عايز أتكلم أكتر من كدا عشان.. لا لا لا، أنا.. عايز أقول لكم على حاجة.. يعني.. إحنا مش عايزين نبقى ورا بعض، أنا مش عايزكوا تبقوا ورا مني.. أنا عايزكوا تبقوا جنبي.. وقدامي حتى، وتبقوا قدامي حتى.
فـ.. هو ده بس اللي أنا عايز أقولهكم عشان كل واحد فينا، وخاصة اللي بيتكلم أو بيكتب، أو فاهم إنه عارف، إحنا محتاجين نعرفه أكتر عشان لما يتكلم يبقى فيه مصداقية لكلامه يعني، يبقى فيه مصداقية لكلامه، وإلا كانت مشكلة مصر اتحلت من 50، 60 سنة.. مبتتحلش ليه؟ مبتتحلش ليه؟ ليه المشكلة مبتتحلش؟ حاجة من الاتنين: يا إحنا مش.. مش قادرين كمسؤولين، يا إما عِظم المشكلة.. يا إما عِظم المشكلة.
بس أنا عايز أقولكم على حاجة، في خلال المدة اللي فاتت دي كلها، وده مش مَن، ده فضل الله عليا وعليكم، ده مش مَن، مخدتكمش غلط ودخلت بيكوا في حاجة آآ بفضل الله سبحانه وتعالى، خالص! والمواضيع دي فيها حسابات كتير جدًا بتقى يعني ممكن أي حد يغلط يعني وتبصوا تلاقوا فيه بلاد بتضيع من حسابات خاطئة، محصلش بفضل الله سبحانه وتعالى وربنا سبحانه وتعالى ميجعلناش أبدًا نعمل حاجة تئذي أهلنا وناسنا، ويعينا على ذلك يعني.
فمش عايز أطول أكتر من كدا. اتفضل يا كريم اتفضل يا محمود. بس من فضلكم، اتكلموا في إطار ال.. طب آآ حد يقول لي اللي إنت قلته ده قلته كتير.. آه، وهقوله على طول، طب بقوله ليه على طول؟ لأن الموضوع محتاج كدا، إنت عندك مشكلة، تتكلم فيها مرة، ولا تتكلم فيها مرات؟ لأ تفضل تتكلم فيها على طول، لغاية لما تحلها، ولغاية لما الثقافة لدى الآخرين في التحديات اللي البلد دي بتجابهها، لكن أقولهالك مرة وأفتكر إن أنا خلصت دوري بأنك عرفت؟ لأ.. كل مرة تيجي الحكومة تقعد معايا، أتكلم في البلد وفي تحدياتها، ويستغربوا، يعني إنت مبتتعبش يا سيدي؟! إنت كل مرة تقول لنا كدا؟ أيوة بقولكم كدا عشان أفكركم وأفكر نفسي، إن أحنا محتاجين نشتغل عشان نحل المسائل.
طب فيه حد عنده أفكار، أهلًا وسهلًا، طالما هيعرف التفاصيل، ممكن الطرح اللي هيطرحه يبقى قابل للتنفيذ، لكن لو معندوش التفاصيل هيقول طرح منقوص، ما أنا، يعني، بشوف كتير جدًا جدًا من المقالات والكلام، الكلام فكرة، أفكار كتير حلوة، الأفكار كتير حلوة، لكن إن إحنا ننجح بفضل الله سبحانه وتعالى في تطبيقها، هو ده ال.. المستهدف يعني. اتفضلوا استريحوا.
فـ.. طولت عليكم معلش.
وليس من المنطقي ولا من العدل أن نستمر في الاقتراض بالعملة الصعبة لتغطية هذه الاحتياجات، وهو ما ينطبق كذلك على الغاز وغيره من السلع، مع ضرورة توفير المنتجات البترولية لتشغيل محطات الكهربا والمصانع.
إن الاستمرار في هذا النهج يقود إلى دائرة مفرغة من تراكم الديون ما لم نتخذ إجراءات استثنائية حاسمة، ومع ذلك تظل الدولة حريصة على تجنب رفع أسعار السلع الأساسية، وتواصل مراقبة الأسواق لمنع أي استغلال، مؤكدة أنه على الحكومة ضرورة التـ.. التدقيق الصارم في هذا الأمر، والتعامل الجاد مع كل من يثبت تورطه في الاستغلال وتقديمه للمحاكمة.
وأنا كنت قلت ادرسوا مع ال.. الموضوع ده خال هذه المرحلة الصعبة إنه يتم إحالة الموضوع ده للقضاء العسكري ويبقى رئيس الوزارة يطلع القرار المعني بذلك.
وبالتوازي تواصل الدولة تقديم السلع المدعومة للأسر الأكثر احتياجًا في حدود ما هو متاح من موارد، إيمانًا منها بواجبها الوطني ومسؤوليتها الاجتماعية تجاه أبناء الشعب.
وفي ذات الإطار وجهت الحكومة بالإسراع في إطلاق حزمة اجتماعية جديدة تستهدف الفئات الأولى بالرعاية ومحدودي ومتوسطي الدخل بما يضمن تحقيق قدر أكبر من الحماية الاجتماعية في هذه المرحلة الدقيقة. إننا نؤمن بأن الإصلاح ليس خيارًا بل ضرورة، وأن بناء اقتصاد قوي هو الضمانة الحقيقية لمستقبل الوطن وأبناؤه.
وفيما يتعلق بما أثير سابقًا حول مستوى الأعمال الفنية والبرامج الدرامية وتأثيرها على الأسرة المصرية، فقد لمسنا خلال هذا العام بعض التقدم الإيجابي على هذا الصعيد، وإنني أطالب بالمزيد من هذا التوجه البناء في الأعمال التي تقدم لشعبنا الأصيل لتكون مرآة لقيمه الراسخة وتجسيدًا لوعيه الحضاري، وإسهامًا فاعلًا في بناء وجدان وطني يليق بمصر. بمصر ومكانتها، ويعكس رسالتها الثقافية الممتدة عبر العصور.
الحضور الكريم،
أجدد ترحيبي وسعادتي بكم، فأنتم نواة الأسرة المصرية الكبيرة، التي تولي الدولة المصرية كامل الرعاية لها، مجددًا العهد أمام الله وأمامكم على مواصلة العمل بكل إخلاص وتفان لحماية هذا الوطن وصون استقراره وصناعة مستقبل أكثر إشراقًا لأبنائه.
وأطمنكم بكل ثقة ويقين في الله تعالى إنه مهما تعاظمت التحديات وتفاقمت الصراعات والأزمات في محيطنا الإقليمي، فإن مصر بعون الله سبحانه وتعالى، وبفضل تماسككم ووعيكم وتفهمكم، ستظل شامخة أبية عصية على كل من تسول له نفسه المساس بها أو النيل من مصالحها ومكانتها.
حفظ الله مصر وشعبها، ووفقنا جميعًا لما فيه خير الوطن واستقراره. وكل عام وأنتم بخير، ونحن على مشارف عيد الفطر المبارك. ودائمًا وأبدًا وبالله العظيم تحيا مصر، تحيا مصر، تحيا مصر، والسلام عليكم ورحمة الله وبركاته. (تصفيق)
ألقيت الكلمة في دار القوات الجوية بالقاهرة، حيث شارك الرئيس في حفل إفطار الأسرة المصرية، وذلك بحضور الدكتور مصطفى مدبولي رئيس مجلس الوزراء، والمستشار هشام بدوي رئيس مجلس النواب، والمستشار عصام الدين فريد رئيس مجلس الشيوخ، وقداسة البابا تواضروس الثاني، وفضيلة الدكتور أحمد الطيب شيخ الأزهر الشريف، وعدد من الوزراء وكبار رجال الدولة والشخصيات العامة.