نص كلمة السيسي في استقبال لاعبي منتخب مصر 11/7/2026

الحمد لله رب العالمين.. حمدلله عالسلامة، واسمحوا لي إن أنا باسمي وباسم كل المصريين بوجهلكم التحية والتقدير والاحترام والاعتزاز، والحقيقة أدائكو كان أداء أكتر من مشرف، ويمكن الكلمات اللي إحنا عايزين نقولها يمكن متوفيكمش آآ.. وده بجد مش كلام مجاملة عشان استقبالكم.. لأ، اللي إحنا شفناه.. مش بشهادتي أنا بس، بشهادة كل اللي اتفرج في العالم كله.. في مصر، وفي أشقائنا في المنطقة العربية، وفي العالم كله.. قيم جميلة بتعكس قد إيه أصالة المصريين واحترامهم. كان جهد أكتر من رائع، وإخلاص كبير قوي لمصر ولاسمها.. اللي اتحقق بالنسبة لنا عظيم جدًا جدًا، ورائع جدًا جدًا جدًا، ومشكور جدًا جدًا جدًا.

فـ.. بوجهلكم التحية وبشكركم وبقولكم يعني.. إنتو كنتم فخر لينا، فخر صحيح يعني، ومعتزين جدًا بيكم وبكل اللي إنتو عملتوه.

يعني طبعًا إنتو عارفين إن الكورة يعني.. يعني، كورة يعني، ناس تكسب وناس متكسبش، لكن إنتم كسبتم.. كسبتم كتير أوي مش بس الـ.. النجاح اللي تحقق والـ.. الفوز اللي تحقق.. لأ، احترام الناس، وده أكتر كتير أتصور.. أكتر كتير أحيانًا من المكسب اللي إنتو عملتوه، أتصور ده أكتر كتير أحيانًا من المكسب يعني.

شباب مصر، وإنتو مثلتوه بـ.. كل اللي موجودين قدامي تقريبًا.. آآ، شباب صغير يعني سن.. ما عدا يمكن حسام ولا إبراهيم يمكن كبار شوية يعني (يضحك الرئيس). لكن أقصد أقول يعني الباقي كله شباب مصري.

فـ.. كل يوم كنتو بتلعبو أو حتى بننتظر المباراة على مدى الكام أسبوع اللي فاتو دول.. إنتو متعرفوش الحالة اللي اتعملت في مصر وفي العالم كله بالنسبة لكم. والله مش بجاملكم، إنتو دخلتم البهجة والفرحة على كل الناس، لأن الأداء كان.. فيه ندية، وفيه كفاءة، وفيه جدارة، وقبل ده وده فيه قيم، في وقت القيم مش مطلوبة قوي في الدنيا يعني اللي إحنا موجودين فيها.

لكن على كل حال آآ.. إحنا سعدنا بيكم، لآخر يوم ولآخر مباراة، يعني، وبقول تاني، مش مجاملة لكم، لأن النتيجة كانت إن إحنا شايفين فريق بيبذل جهد كبير جدًا وده كفاية، إن إحنا نبقى مخلصين لبلدنا ومخلصين للعبة، وحريصين على إن إحنا نجيب آآ.. في الـ.. في المباراة دي أو المباريات دي.. بينت كتير من المستوى اللي.. اللي إحنا حققناه، وأرجع تاني للكلام اللي قلته قبل كده إن إحنا كمصريين قادرين على إن إحنا ننتج لشعبنا، شعب كبير وشعب محب للرياضة، وشعب محب لكرة القدم تحديدًا أكتر.

مش ممكن يكون 120 مليون مفيش فيهم.. اوعى يا محمد يا صلاح تزعل مني يعني.. ميكونش فيه كتير محمد صلاح، وشوبير، وكل اللي موجودين قدامي عشان ما لو.. آآ.. مكونش نسيت حد يعني.. لا فيه كتير. إذن كل المطلوب مننا إحنا كـ.. كمعنيين باللعبة دي.. إن إحنا نبقى كشافين، متجردين، نشوف ال.. الشاب اللي عنده فرصة ونديله الدعم، وإحنا كدولة مستعدين ندي أي دعم للكفاءات وللقدرات وللـ.. وللـ.. ونحقق لهم كل ما يمكن من أجل إعطائهم الفرصة اللي يستحقوها.

فـ.. في المباريات بينت قد إيه المستوى آآ رائع، وقد إيه إن ممكن كل المصريين بما فيهم الـ.. حسام وإبراهيم.. وإحنا بصراحة مش ناويين نغير الكلام ده، إحنا مش هنغير إن شاء الله، وأرجو إن إحنا نحط ده في الاعتبار، مش هنغير أبدًا إن يكون المسؤولين عننا هم مننا. ربنا وفقهم يبقى خير عظيم جدًا، ونستمر على كده.

كل الدعم لكم، وإنتو هتشوفو وشفتو امبارح أتصور قد إيه الناس كانت ممنونة، مقدرة، محبة، عبرت ولسه فيه تعبير تاني وتالت لـ.. لكم.. كـ.. كشباب مصر وأبناء مصر.

تاني بقول شرفتونا. وأنا كنت حريص على إن أنا أقول لهم إحنا عايزين آآ  نقدملكم إحنا بقى كاس آآ.. التقدير.. وكاس الاحترام.. وكاس الافتخار، وده اللي إحنا.. اسمحولي إن أنا يعني.. أقدمه لكم جميعًا ليكم.. إن إحنا حبينا نعبر عن امتناننا و.. واعتزازنا و.. وقد إيه إحنا كنا سعداء وما زلنا سعداء بيكم.

ألف حمدلله عالسلامة، وألف مبروك.. ألف حمدلله عالسلامة وألف مبروك. (تصفيق)

ألقيت الكلمة في مدينة العلمين الجديدة حيث استقبل الرئيس عبد الفتاح السيسي لاعبي المنتخب الوطني لكرة القدم والجهازين الفني والإداري بعد عودتهم من المشاركة في بطولة كأس العالم 2026، وذلك بحضور رئيس مجلس الوزراء الدكتور مصطفى مدبولي، ووزير الشباب والرياضة جوهر نبيل، ورئيس الاتحاد المصري لكرة القدم هاني أبو ريدة.