نص كلمة السيسي خلال الاحتفال بذكرى المولد النبوي الشريف 26/8/2026
بسم الله الرحمن الرحيم،
الحمد لله رب العالمين،
فضيلة الإمام الأكبر شيخ الأزهر الشريف،
العلماء والأئمة الأجلاء،
الحضور الكرام،
السلام عليكم ورحمة الله وبركاته.
اسمحوا لي بداية أن أتوجه بأصدق التهاني إلى حضراتكم جميعًا، وإلى الشعب المصري العظيم، وإلى الأمتين العربية والإسلامية، والعالم أجمع، بمناسبة ذكرى المولد النبوي الشريف، داعيًا الله العلي القدير أن يعيد هذه الذكرى على مصرنا الغالية، والعالم أجمع بالخير واليمن والسلام.
السيدات والسادة،
إن احتفالنا بذكرى مولد سيدنا محمد صلى الله عليه وسلم، ليس احتفاء بذكرى ميلاد خير الأنام فحسب، وإنما هو استحضار لأنوار وآثار النبي الأكرم، الذي بعثه الله للعالم أجمع برسالة ملهمة، غيرت وجه التاريخ، وأخرجت الإنسان من الظلمات والجهل والجاهلية إلى أنوار الهداية والاستنارة، وجاء الثناء الإلهي على صاحب الخلق الرفيع، في أكرم شهادة لنفس بشرية على وجه الأرض، وإنك لعلى خلق عظيم.
لقد جسد سيدنا محمد صلى الله عليه وسلم من مكارم الأخلاق ما أدهش العقول وألهم القلوب، فكان رحيمًا في موضع الرحمة، كريمًا في موضع الكرم، حازمًا في موضع الحزم، رفيقًا بالصغير، بارًا بالكبير، رحيمًا بالضعيف، حانيًا على الفقير، يعلم الخلق جميعًا إكرام الإنسان وجبر خاطره أيًا كان دينه أو جنسه أو لونه.
الحضور الأفاضل،
اسمحوا لي بمناسبة جمعنًا الكريم اليوم أن أطمئنكم مجددًا بشأن يقظة الدولة المصرية بكافة أجهزتها إزاء كل ما يتعلق بأمننا القومي، كما أؤكد على أننا نبذل قصارى الجهد للنهوض بالدولة وتطويرها في كافة المجالات، ونسعى بشكل حثيث وبإخلاص لتحسين ظروف معيشة المواطنين.
وهنا أؤكد أن القوات المسلحة المصرية على أتم الجاهزية والاستعداد للدفاع باقتدار عن مصر ومقدراتها ضد أي تهديد خارجي... (تصفيق) وإنني أتابع عن كثب وبشكل مباشر ومستمر، مستويات الجاهزية القتالية والكفاءة الميدانية، ولم يكن اهتمامي حكرًا على مؤسستنا العسكرية، بل يمتد إلى باقي شؤون الدولة، لتحسين الأوضاع ووضع حلول جذرية للمشكلات المتراكمة والموروثة عبر العقود، وكذلك العمل باستمرار على علاج ما يظهر من صعوبات أو قصور عند أداء الخدمات للمواطنين.
وفي هذا السياق، أوجه الحكومة بالآتي، أولًا، إعداد تقرير كامل عن الإنجازات الفعلية في كل قطاعات العمل بالدولة في السنوات الماضية، وعرضها على المواطنين خلال شهر أكتوبر القادم، للوقوف بصورة شاملة على حجم الجهود المبذولة، والأموال المنفقة، والنتائج المحققة.
واسمحوا لي هنا إن أنا أخرج عن الكلمة، وأقول إن إحنا، اللي أنا بطلبه من الحكومة، ومش بس من الحكومة، من المفكرين والمثقفين، ومن كل من آآ.. يعني مهتم بمصر وبشؤونها وبظروفها، خلال المؤتمر ده، أرجو إن يتم تناول كل ما تم تنفيذه، حتى لو كان المؤتمر ياخد عدة أيام، وأنا بدعو المواطنين المهتمين إن هم يتابعوا المؤتمر ده، ده من جانب، ومن جانب آخر أنا بطلب من الحكومة إن هي تستفيض، تستفيض في طرح الموضوعات المختلفة، وبدي الفرصة لكل آآ.. زي ما قلت، المفكرين والمثقفين والمتابعين من ال.. من أساتذة الجامعات، ومن كل المختصين في شؤون الدولة إن هما يشاركوا معانا في ال.. في المؤتمر ده، ويشاركوا برأيهم، و.. ويبقى دي فرصة لينا كلنا إن إحنا آآ.. ناخد أسبوع يمكن، أو أكتر شوية، نشوف الموضوعات اللي تم تناولها، وال.. والمشاريع اللي تم تنفيذها، والتحديات اللي بتواجهنا.
إحنا دايما لما بنتكلم في الموضوع ده، مش عايز أطيل عليكم فيه، بنقول دايما إن إحنا بنتكلم معاكم بشفافية كبيرة قوي، وبمصداقية، لأن إحنا بنحاول نكون.. أنا بتكلم و.. عن نفسي يعني، إن إحنا نكون صادقين في كل ما نطرحه، عشان أولًا ده حق الناس علينا، ثانيا... (تصفيق) طبعا، عشان زي ما قلت قبل كده، ومش أنا اللي قلت، النبي عليه الصلاة والسلام، لما قال، إن المرء ليصدق ويتحرى الصدق حتى يكتب عند الله صديقًا، وإحنا بنحاول يعني إن إحنا نكون صادقين في طرحنا لموضوعاتنا بلا مبالغة، وبلا مجاملة، وبلا مزايدة، وأيضًا بلا إساءة لحد، بلا إساءة لحد، وأرجو إن إحنا ل.. يعني فيه كلام كتير جدًا خلال الأيام والشهور الماضية إحنا متكلمناش فيها، هيبقى عندنا فرصة كحكومة، كدولة، إنها تتكلم مع مواطنيها، مع شعبها، وتطرح كل الموضوعات دي، واسمحوا لي أقول لكم على كلمة بكررها دايمًا، أنا عمري ما قلقت على مصر من التحديات الخارجية، وإن كانت دي تحديات كبيرة وخطيرة، لأنها دايمًا لو كان يعني.. لو كان شعبنا، لو كان أهلنا، لو كان الرأي العام واعي وفاهم كويس الأمور اللي.. يعني بتحاك ضد الدولة، يمكن، يمكن مش.. فضيلة الإمام تكلم عن أخلاق المسلمين، حتى في الحروب، وقد إيه إن.. إن القيم نبيلة وراقية، وبيتكلم عن قيم تقريبا من 15 قرن يعني.
لكن أنا عايز أقول للناس، أو حتى للي بيتابعوا بيناقشوا أحيانًا يعني.. أنا مش بخرج عن الموضوع أنا هرجع له، بس عايز أشير للنقطة دي، تصرفات المسلمين وأخلاقهم ليست.. آآ.. مش شرط تكون هي الإسلام اللي النبي صلى الله عليه وسلم نادى بيه، لما يتكلم عن الصدق، يا ترى الناس اللي بتتناول موضوعاتنا في الإعلام المناوئ، هم صادقين؟ يعني، فعايز أقول إن النبل والقيم الرفيعة اللي الإسلام نادى بيها، مش شرط أصحابها نفذوها، وعشان كده مش سلوكياتنا اللي بتعكس الدين، لأ، الفهم الحقيقي للدين هو التعبير الحقيقي عن الدين وليس سلوكيات الناس، لأن أحيانًا الناس بتسيء إلى نفسها وإلى دينها بشكل أو بآخر. وأنا لما بتكلم في النقطة دي بقول يا ترى كل من يتحدث، كل من يدعي، كل من يكذب، كل من يشيع، يا ترى هو صادق في طرحه؟ طب في حساب لده؟ طبعًا، إذا كنا إحنا مصدقين إن فيه يوم هنقف فيه كلنا قدام ربنا، كلنا هنتحاسب، وكل من كدب كدبة وأشاع إشاعة، وحب يعني يكون سبب في خراب أمة أكتر من 100 مليون، هيحاسب، من مين بقى؟ من ربنا، يمكن يكون هو متصور إنه مش، محدش هيـ.. مش عارف، مفيش دين هيقام لا بالفساد، ولا بالخراب، ولا بالدمار، ولا بالقتل، مفيش دين هيقوم بكده أبدًا، لو كانوا عايزين يقوموا بدين يعني.
فإحنا هنحاول في الأسبوع ده أو ال 10 أيام دول يا دكتور مصطفى، إن إحنا من فضلك يعني، إن إحنا نتكلم بكل ما أوتينا من معرفة، ومن خطط تم تنفيذها ونديها للناس، ولكل من.. يعني آآ عنده استفهام، عنده تخوف.. يعني، حتسمع، حتسمع إن رغم كل التحديات اللي موجودة دي، اتفضل يا دكتور مصطفى.. اتفضل، اتفضل.. رغم كل التحديات اللي موجودة دي مش عايز أكرر للناس تتصور إن إحنا بنسوق حجج، من كام شهر كده قلت للحكومة، هاتوا حجم المديونية اللي للدولة المصرية سواء كانت ال.. الدين الداخلي أو الخارجي، وقولوا لي حجم الدين ده قياسًا بحجم الدعم اللي قدم خلال الـ50 سنة اللي فاتوا، يساوي قد إيه، هو ولا أكتر؟ لأن فيه كلام كتير بيتقال والناس طبعًا يعني خايفة على بلدها وده أمر مقدر، وبتسأل وبتتساءل، يا ترى إحنا ماشيين يعني بخطى مناسبة؟ يا ترى اللي بيتعمل هو ده أفضل المتاح؟ ولا فيه أفضل من كده؟
أنا هقول يمكن يكون فيه أفضل من كده، لكن إحنا ده اللي اتعمل خلال المدة اللي فاتت دي كلها بالكامل، ده جهد، وده جهدنا واجتهادنا إن وفقنا فيه فده من فضل ربنا، وإن كان غير كده يبقى إحنا قصرنا، وأرجو إن ربنا سبحانه وتعالى يجبر تقصيرنا يعني.
فأرجع مرة تانية وأقول، أنا بقول الكلام ده دلوقتي وكدا، لأن يعني أنا بجد إن فيه كلام كتير جدًا دلوقتي بيتردد في مواقع التواصل الاجتماعي، ويمكن على بعض وسائل الإعلام، فحسيت إن.. إن فيه فوضى في المعرفة، فوضى في الطرح.. فوضى في المعرفة، فوضى في الطرح، فوضى في عدم معرفة التحديات اللي قابلت الدولة دي خلال الـ50 سنة دول، مفيش دولة مبتقابلش تحديات، لكن أهم حاجة عشان التحديات دي يتم تجاوزها، إن شعبها يبقى مستعد يتحمل تبعات الإصلاح والبناء والتغيير، يبقى مستعد لكده، ويحافظ على بلده ويحميها.
طب أختم كلامي في النقطة دي، الناس اللي هي بتقول كلام وقعدت تلخبط في.. في.. في وعي آآ الناس، في وعي يعني.. في وعي بعضنا، الناس دي.. هي كده، ده أمر بيصب في مصلحة مصر؟ والله، أنا بحلف بالله، أبدًا، أبدًا، أبدًا، ده بيصب في مصلحة غير مصلحة مصر، إحنا محتاجين نشتغل ونفهم ونشتغل ونفهم، عشان فهمنا هيخلينا نشتغل أكتر ويخلينا نصبر أكتر، إنتوا بتتكلموا على دولة فيها تقريبا 110 مليون.. 110 مليون، في عالم أراد ربنا إن إحنا نعيش الفترة دي، فترة فيها يعني تحديات كتيرة حوالين مننا في.. في العالم كله، فيه تحول كبير بيتم، فإحنا جزء منه، وآثاره إحنا بنتحمل، بنتحمل بعضها يعني، فإن شاء الله يبقى فيه فرصة إن إحنا يبقى خلال الأسبوع ده أو الـ10 أيام دول، يا دكتور مصطفى، نناقش كل الموضوعات المختلفة.
ولولا توفيق الله سبحانه وتعالى، وإرادة الشعب المصري، في مواصلة مسيرة الإصلاح، لما وصلنا إلى حالة التوازن القائمة، وسط عالم مضطرب سياسيًا، واقتصاديًا، وأمنيًا.
ثانيًا، ضرورة المتابعة المستمرة والوثيقة، لمسألة احترام العقود المبرمة مع المواطنين، ارتباطًا بالمشروعات العقارية، وعدم التأخير في تسليم الوحدات، وإنشاء البنية الأساسية والمرافق ذات الصلة.
برضو هنا هتكلم في نقطة مهمة قوي، يعني إمبارح كنت، فيه تقرير جالي على إن مواطنين إدوا لحد فلوس عشان.. يعني.. يستثمرهالهم، وبعدين نصب عليهم في 300 مليون جنيه، وبعدين بيطالبنا إن إحنا نتدخل، إحنا هنتدخل، بس إحنا مشوفناكش وإنت.. وإنت بتعمل كده، وما أقرناش إنك إنت تعمل كده، ما إحنا عندنا بنوك، لو فيه بنك من البنوك اللي موجودة في الدولة المصرية تقاعست عن أداء عوايد الأموال المحطوطة فيها، أو .. أوحتى الأموال دي لو حبت الناس تستردها، إحنا نسأل عن ده، لكن مواطن آآ قال للمواطنين أنا عندي آآ.. هشغل لكم الفلوس بتاعتكم وإديتوله الفلوس، إنتوا، هو إحنا لسه متعلمناش؟ كل اللي بيحصل ده خلال بقالنا 40 سنة بيحصل النصب ده، بردو بنعمل كده تاني؟ ولكن إحنا برضو هنتدخل في هذا الأمر.
فيما يخص العقود وأنا قلت للحكومة في هذا الأمر، وبيتم دلوقتي مراجعة، مراجعة شاملة بين أجهزة الدولة المختلفة على كل المطورين العقاريين بالتزاماتهم تجاه المواطنين، وأنا في الموضوع ده هكون.. هكون حاد بصراحة، كل من أخذ فلوس الناس... (تصفيق) كل من أخذ فلوس الناس بالتزام بعقود بين الطرفين، بين مواطن وبين مطور عقاري، هو.. هو ملتزم بتنفيذ هذا التعاقد في التوقيت المحدد داخل العقد، غير كدا هنتخذ معاهم الإجراءات القانونية حفاظًا على حقوق الناس، وعلى مصداقية الدولة.
أنا بس حبيت أقول النقطة ده لأن إحنا مش هنسيبها، زي ما اتكلمنا على موضوع احترام الشواطئ واحترام حاجات كتير قوي مش عايز مع الوقت، إحنا كدولة، بأجهزتها تغفل على حقوق المواطـ.. مواطنيها، حقوق مواطنيها في كل شيء.
أوجه السيد وزير الكهرباء والطاقة المتجددة، بالإشراف المباشر والمدقق على مسألة فواتير الكهرباء، وتجنب التقدير الجزافي، وتسهيل عملية تسديد المواطنين للمبالغ المتأخرة المستحقة عليهم، بما في ذلك النظر في إمكانية سداد المتأخرات، وإفادتي تباعًا بما يتم اتخاذه من إجراءات في هذا الصدد.
رابعًا، أكرر التوجيه للحكومة، وإلى السيد وزير التموين والتجارة الداخلية، بضرورة ضبط الأسواق باستمرار، والمتابعة الميدانية المستمرة، والتوسع في المبادرات وفي منافذ البيع الحكومية، وضرورة إنشاء منفذ حكومي واحد على الأقل، في كل مركز من مراكز الجمهورية، لتوفير السلع الأساسية بأسعار تتناسب مع القدرات الشرائية، لمختلف فئات الشعب، وإفادتي بما يتحقق على أرض الواقع بصفة منتظمة.
خامسًا، أؤكد على التوجيهات الصادرة للسيد وزير النقل بضرورة الانتهاء من كافة مشاريع النقل الجماعي في الأطر الزمنية الموضوعة لها، ووضع الإرشادات، وتحسين حالة الطرق باستمرار، وارتباطًا بذلك وعلى ضوء تكرار حوادث السير المؤلمة، أوجه السيد وزير الداخلية بقيام وزارة الداخلية بحملات مرورية متواصلة لضمان تحقيق الانضباط المروري الصارم في الشارع، وذلك في كافة أنحاء الجمهورية، وضبط المخالفات وسرعة اتخاذ الإجراءات القانونية نحوها.
سادسًا، أؤكد على توجيهاتي السابقة لوزارة التنمية المحلية والمحافظين، بضرورة المتابعة الميدانية على الأرض، وفتح قنوات للتواصل المباشر مع المواطنين، وتلقي الشكاوى والاستفسارات وشرح الحقائق لهم، وتسهيل الخدمات المقدمة، والوقوف على المشاكل والعمل الجاد على تذليلها، مع ضمان المحاسبة الصارمة للمخالفين.
سابعًا، أشدد على كل مسؤول في موقعه بإنفاذ سيادة القانون بمنتهى الحسم، فلا موضع بيننا لفاسد، ولا مجاملة لمن يتلاعب بحقوق الشعب، أو يعبث بمقدرات هذا الوطن العظيم.
الحضور الكريم،
فلنجعل من يوم مولد النبي صلى الله عليه وسلم نقطة تحول يرى فيها العالم كله أخلاق النبي الأكرم عليه الصلاة والسلام في أخلاق اتباعه، ولندرك أن رفعة الأمة تقام على إتقان العمل وحسن الخلق، وهي ليست كلمات تردد فقط، إنما نمط تفكير ومنهج عمل وطريقة حياة، وأن الأمة المتقدمة يتحتم عليها كما تخلص في عبادتها، أن تتقن وتتفانى في زراعتها وصناعتها وإقامة حضارتها، وتتحصن دائمًا بالعلم والأخلاق.
سلامًا على مولد أشرق به النور، وانجلت به معه الظلمة، وسلامًا على صاحب الذكرى الذي جعل احترام الإنسان عنوانًا، والرحمة غاية، والسلام طريقًا إلى مرضاة رب العالمين، وكل عام وأنتم بخير، ودائمًا وأبدًا وبالله العلي العظيم، تحيا مصر، تحيا مصر، تحيا مصر، والسلام عليكم ورحمة الله وبركاته. (تصفيق)
ألقيت الكلمة في مركز الصفوة للمؤتمرات الدولية بمقر القيادة الاستراتيجية بالعاصمة الإدارية الجديدة، حيث شهد الرئيس عبد الفتاح السيسي الاحتفال بذكرى المولد النبوي الشريف وتكريم عدد من علماء الدين، وذلك بحضور فضيلة الإمام الأكبر الدكتور أحمد الطيب شيخ الأزهر الشريف، والدكتور أسامة الأزهري وزير الأوقاف، والدكتور مصطفى مدبولي رئيس مجلس الوزراء، وعدد من الوزراء.