الرئيس السيسي والبابا تواضروس. الصورة: المتحدث باسم الرئاسة- فيسبوك

نص كلمة السيسي خلال حضوره قداس عيد الميلاد 6/1/2022

منشور الأحد 9 يناير 2022

(زغاريد وتحيات للرئيس)

اتفضلوا استريحوا.. اتفضلوا استريحوا.. اتفضلوا استريحوا... كل سنة وغنتوا طيبين.. كل سنة وإنتوا طيبين.. اتفضلوا، اتفضلوا، اتفضلوا...

(زغاريد وتحيات للرئيس)

 متشكر جدا، متشكر جدا، متشكر جدا... (يضحك الرئيس) زغروتة جميلة جدا (يضحك الرئيس) مش عايز آخد وقتكم.. مش عايز آخد وقتكم عشان قداسة البابا وعشان تكملوا الصلوات بتاعتكم. لكن أبدأ كلامي بإن أنا أقولكم كل سنة وإنتوا طيبين، وإن شاء الله دايما تبقى سنة، سنة جميلة علينا كلنا، وسنة طيبة علينا كلنا، وخير وسلام وأمان، ورحمة ونعمة من الله سبحانه وتعالى.

مش هاطول عليكوا يعني.. لكن عايز أقولكم إن إحنا، أنا بتكلم ومن خلال الفرصة دي، بكلم كل المصريين. وبقول إن إحنا في مصر، يعني بدأنا طريق، طريق عاهدنا فيه ربنا، وعاهدناكم. طريق عاهدنا فيه ربنا وعاهدناكم. بدأناه مع بعض، وإن شاء الله هانكمله مع بعض، مع بعض كلنا. (تصفيق وزغاريد)

الطريق ده، زي ما بنقول كدا وسمعتم يمكن، طريق الجمهورية الجديدة اللي تتسع للجميع. تتسع لينا كلنا، بدون أي فرق أو تمييز، للجميع. نعيش فيها بسلام وأمان مع بعض.

وخلي بالكوا، أنا بقول الكلام ده لكل الناس، لكل المصريين، مش لحد بعينه.. إوعوا حد يدخل بينا، إوعوا حد يفتنّا، لأن ده مش هاينتهي، وكل ما هانكمل وهاننجح... (تصفيق)

أنا طولت كدا؟ (يضحك الرئيس) طيب.. طيب، يعني.. أنا بقول الكلام دوت لأن إحنا في الأيام الجميلة اللي زي دي... (أحد الحضور: بنحبك يا ريس) وإحنا ولله بنحبكوا.. صحيح.. (يضحك الرئيس) فـ.. متشكر، متشكر...

ربنا يعيني إني أكون خادم أمين شريف للبلد ديت، وليكم، يا رب يعيني على كدا (تصفيق) لكن خليني أقولكم إن، زي ما قلت كدا، إن البلد بلدنا، بلدنا كلنا، تسعنا كلنا، وإحنا... (أحد الحضور: ربنا يحميك يا ريس) لا ده ربنا سبحانه وتعالى هو اللي بيحمي وبيستر خلي بالكم، إوعوا تنسوا، إحنا موجودين في بيت من بيوت ربنا، إحنا في بيت من بيوت ربنا (تصفيق) ولازم تعرفوا إن اللي حامي البلد دي ربنا سبحانه وتعالى، دايما، دايما ندعوه، ونتوسل إليه، ونرجوه إن هو يحمينا، ويهدينا، ويكمل لنا، هو ربنا، وبيسبب الأسباب.. آه بيسبب الأسباب. (تصفيق)

مش عايز أطول أكتر من كدا، لكن عايز أقولكم، إن الجمهورية الجديدة دي جمهورية.. الجمهورية الجديدة دي جمهورية الحلم والأمل، جمهورية العلم والعمل، الجمهورية القادرة، وليست الغاشمة، المسالمة وليست المستسلمة (تصفيق) الجمهورية دي... (تصفيق وتحيات من الحضور) هانبنيها مع بعض.. هانبنيها مع بعض. أي تحدي، أي صعاب، تهون، لو إحنا كلنا دايما على قلب رجل واحد. كلنا مع بعض.

فـ.. كل عام وإنتم بخير، ومصر بخير والدنيا كلها بخير. و.. كنت أتمنى إن أنا يعني أسلم عليكم كلكم، وأحييكوا كلكم، وأهنيكوا كلكوا.. لكن، يعني ربنا سبحانه وتعالى يزيح عنا ال، يعني، الجائحة، ويحمينا ويحميكوا من كل.. ويحميكوا، ويحميكوا..

قداسة البابا كل سنة وإنت طيب. كل سنة وإنت طيب.. أنا عايز أقولكوا على حاجة إنتوا بقى.. إنتوا ماتعرفوش حجم التقدير والاحترام والمحبة اللي أنا بأكنه لقداسة البابا. (تصفيق) صحيح، آه والله.

خلي بالكم، خلي بالكم.. الرجال بتوزن في المواقف والظروف الصعبة جدا. (يبتسم الرئيس) وإحنا مش عايزين نقلب يعني كلام مالوش لازمة يعني. لكن قداسة البابا يعني.. إنتوا كمان تخلوا بالكوا منه يعني (يضحك الرئيس) كل سنة وإنتوا طيبين، كل سنة وإنتوا طيبين، كل سنة وإنتوا طيبين. (تصفيق وتحيات من الحضور)

...

ألقيت الكلمة في القاهرة، بكاتدرائية ميلاد السيد المسيح بالعاصمة الإدارية الجديدة، بحضور المصلين الأقباط وقداسة البابا تواضروس الثاني.

...

خدمة الخطابات الكاملة للسيسي تجدونها في هذا الرابط