نص حوار السيسي مع طلبة الأكاديمية العسكرية حول الوضع في غزة ومحور فيلادلفيا 26/9/2025
السيسي: وإنتي هنا موجودة هنا عشان ده تشوفيه، وعشان وإنتي أثناء مهمتك ووظيفتك بعد كده، تبقي إنتي متبنية هذا الأمر، سواء على مستوى ال.. ال.. يعني.. ال.. التعليم في الفصل، إن كنت أنا فاهم، أو حتى لو إنتي هتديري مدرسة بعد كده أو أكبر من كده، بقى الموضوع واضح بالنسبة لك إنه مهم، وإن.. من الرحمة قد يكون العقاب، من الرحمة، عشان آآ النتايج ما تسوؤش أكتر.
فالفكرة كلها، التجربة اللي موجودة هنا، بداية هنا المفروض موجودة في كل حتة، فيه ثواب وعقاب، ممكن الموضوع حسب كفاءة الأداء، والقدرة، و.. مستوى التأهيل، ومستوى القناعة للقائمين على الأمر ده.
يعني إنتو، لو كنتو اشتغلتوا قبل كده، بتشوفوا تجارب وأمثلة. قد تجدي وقد لا تجدي. فاللي إحنا بنحاوله هنا بنرسخ الإيجابيات، وبنبعد عن السلبيات، عشان حضرتك لما تروحي إنتي وزميلاتك وزملائك لمدرسة... وهنا عايز أقول لك على حاجة.
متدربة: اتفضل يا فندم.
السيسي: قلت مهم قوي، إن إحنا المجموعة اللي اتعلمت هنا، بمدير المدارس، يروحوا مدرسة واحدة مع بعض، يعني هند واللي معاها، بالمدير، في مدرسة واحدة، عشان نتكلم إيه؟ لغة واحدة، ما يبقاش أنا بقول لغة مش.. الآخرين قد لا يكونوا مقتنعين بيها، وقد يسخروا منها أحيانا.. فـ.. ومدرسة ورا مدرسة ورا مدرسة، يبقى صلحنا، وحسننا، وطورنا مدرسة، ثم اتنين، ثم تلاتة، ثم عشرة، ثم مية، ثم ألف.
ردًا على سؤال بشأن الادعاءات الإعلامية حول الفساد المؤسسي:
السيسي: مطلوب مننا إحنا، كناس بتحب بلدها إنها تبقى بخير وسلام، مصر. الأشرار، مش مطلوب إن مصر تبقى بخير وسلام، طب نعمل إيه؟ نعمل إيه؟ نشكك في كل شيء.. نشكك في إيه؟
متدربة: كل شيء.
السيسي: في كل شيء! طب عايزيـ.. نعمل فيها إيه.. أقول لك الهدف إيه.. إن الناس تقوم تولع في بلدها، ويضيعوا حاضر ومستقبل الدولة لسنين طويلة. وشاءت إرادة الله، شاءت إرادة الله إن إحنا نرى أمثلة حوالين مننا، حتى يقيم علينا ربنا الحجة، يقول لنا ده أنا إنتو شوفتوا الدولة دي، والدولة دي، والدولة دي، إيه اللي حصل فيها، وما اتعلمتوش.
حوار مفتوح مع الطلبة
ردًا على سؤال حول الوضع في غزة والادعاءات التي تقلل من الدور المصري،
السيسي: هل إحنا بنشارك في آآ.. آآ.. الحصار؟ لأ، طب ليه يعني؟ بالراحة خالص، وبهدوء شديد.
القطاع، قطاع غزة، شريحة من الأرض، مساحتها أكتر من 350 كيلو بحاجة بسيطة يعني، لكن احفظوها 350 كيلو.. بتطل عالبحر، وليها حدود معانا مواجهتها 14 كيلو.. ليها منافذ، منافذ يعني معابر، مع إسرائيل، ومع مصر.. مع مصر فيه معبر اسمه معبر رفح، وده معبر أفراد، معبر أفراد، ومعبر آخر اسمه كرم أبو سالم، ده مع إسرائيل لصالح القطاع.
طيب.. لو إحنا فهمنا وفكرنا هنقول فيه معابر أخرى موجودة، بينها، بين المعبر، بين القطاع، وبين إسرائيل، آدي واحد.. اتنين، لو تفتكروا من سنة، أو أكتر شوية، اتكلمنا عن احتلال معبر فيلاديلفيا، وقلنا إن ده خرق للمعاهدة إن المفروض إن المعبر ده لا يتم وصول قوات عسكرية ليه، لما وصل المعبر فيلادلفيا ده، أو ممر فيلادلفيا تحديدًا، هو بيقفل تمامًا لو فيه قوات من الناحية التانية، بيقفل تماما الحركة لمعبر رفح.. باختصار شديد.. إذن لو أنا عايز أدخل مساعدات، المساعدات دي هتخش من الأراضي المصرية للقطاع غزة عن طريق 5 معابر، مش معبر واحد.
ولكن، خلينا أتكلم عالمعبر اللي يخص مصر، اللي هو معبر رفح، أو مينا رفح البري زي ما بنطلق عليه.. عشان تخش المساعدات، لازم يسمح من الأراضي الفلسطينية إن المساعدات دي تخش.. طيب.. المعبر ده، على الجانب الآخر اللي هو الفلسطيني، فيه القوات الإسرائيلية، وبالمناسبة، خلال فترة الحرب، تم تدمير المعبر ده 4 مرات، وإحنا صلحناه، إذن عشان أدخل مساعدات، لازم يُسمح ليا إني أدخل المساعدات بالتنسيق مع الإسرائيليين، طب الإسرائيليين لو مش عايزين؟ ما اقدرش.
فحد يقول لك إيه، لأ اقـ.. اقتحم وخش.. طيب.. أقتحم واخش؟ يعني إنت بتطلب مني إن أنا أعمل عمل عنيف، مش كده؟ عمل عسكري يعني.. طب أنا النهارده، هو مطلوب من مصر إن هي تدخل في حرب نتيجة آآ يعني التطورات اللي حصلت في القطاع؟
أنا مسؤول عن المصريين، وعن أمنهم وسلامتهم، وإن أنا آآ معملش مواقف وإجراءات تؤدي إن أنا آآ يعني أئذي الدولة، إلا إن فرض عليا فرض.. إلا إن فرض.. إحنا ناس بتدافع عن نفسنا بس.. ما بنهاجمش حد.. هل مطلوب من مصر إنها تهاجم؟ لأ.. إحنا بندافع عن نفسنا بس.
طيب.. إذن، عشان تدخل المساعدات، لازم الجانب الإسرائيلي، في الحالة دي، يوافق. طب قبل كده كان فيه إيه؟ قبل الحرب دي، قبل 7 أكتوبر، كان القطاع طبقا لاتفاقية اتعملت في 2005، بيسيطر عليه المعبر السلطة الفلسطينية، والاتحاد الأوروبي، ومصر، بيديروه، لما حصلت ال.. التطورات بتاعة 2005 وحماس بقت مسيطرة على القطاع، بقى اللي موجود على الناحية التانية حماس، ومصر، وكانت الأمور بالتنسيق ماشية.
دلوقتي بقى موجود قوات إسرائيلية، لازم توافقني على إن أنا أدخل المساعدات، هي الإجراءت كده، الحكاية كلها كانت الهدف منها إن هم يدوكوا رسالة خاطئة تجاه القضية الفلسطينية، بس، دي الحقيقة اللي هم كانوا عايزين يعملوها.
يبقى هنا الرهان على مين؟ هم بيستهدفوا مصر، مش كده؟ يبقى المصريين، يبقوا منتبهين، ولما نشرح الشرح ده، يحفظوه، ويرددوه، ويكلموا بعضهم البعض، اللي مش عارف يقول للي عارف.. اللي عارف يقول للي مش عارف.. عشان كلنا نبقى عارفين إيه الحكاية.
ولما النهارده بيتقال من ضمن المطالب بتاعتنا اللي ما انتهتش، من أول ما بدأت الحرب لغاية دلوقتي، هو إدخال المساعدات، كان الهدف منها إن إحنا نخلّي أ.. يعني إن المواطنين اللي موجودين والأسر اللي موجودة في القطاع لا تعاني من المجاعة أو من المطالب اليومية الحياتية.
بس إنت عايزني أعمل ده، بإجراءات، أنا أخش فيها بحرب مع الآخرين؟ يعني، متعاطفين طبعا، بنزعل على أشقائنا في فلسطين، مافيش كلام، عايزين نسعادهم، أيوة.. بس.. ده صراع، ولازم ننتبه إن ماحدش يورطنا في حاجة.. هي دي الإجابة.
ردًا على سؤال حول ما تعرضت له السفارات المصرية في الخارج خلال الفترة الماضية،
السيسي: الإجراء بتاع السفارات معمول لإعطاء رسالة سلبية للرأي العام في مصر، إن هو عايز يقول للرأي العام في مصر، بما إنكم إنتم آآ بتشاركم في حرمان أهل غزة من المساعدات، فاحنا بنعبر عن رفضنا للإجراء بتاعكو يا مصريين بإن إحنا بنقفل السفارات أو بنحاصرها، هي دي الرسالة.
طب الدول اللي بيحصل فيها الكلام ده، هي مسؤولة عن تأمين سفاراتنا، الدول إيه، زي.. ده، ده.. أوضاع بتكفلها أعراف وقوانين دولية في ما يخص البعثات الدبلوماسية المتواجدة على أراضي الدول بعضها البعض. أنا مسؤول في مصر عن سلامة وأمن وأمان كل البعثات الدبلوماسية اللي موجودة هنا.
طب هو المشكلة في دي ولا في وقف الحرب؟ إنتو بتحوّلوا الموضوع ليه؟ الموضوع وقف الحرب، مش الموضوع مصر.. بتحوّلوا الاتجاه وبتعملوا آآ يعني شوشرة، ومسخ لل.. للحالة، عشان تخلطوا الأوراق.. لأ طبعا.. ده باختصار شديد، محاولة للإجابة على السؤال.
ردًا على سؤال حول أنواع الأنشطة التدريبية التي تقوم بها القوات المسلحة المصرية مع العديد من دول العالم،
السيسي: المناورات ده شكل من أشكال التدريب المشترك بين الدول وبعضها البعض، إحنا بنعمل الكلام ده مع دول كتير جدًا، شقيقة وصديقة، يعني مع دول عربية كتير إحنا بنعمل تدريبات، ولو إنتو متابعين كويس هتجدوا إن إحنا بنعمل أكتر من 20، 30 تدريب في السنة مع دول صديقة ودول شقيقة.
فمش معناه إنك لما بتعمل كده.. معناه التحالف شيء، والاتفاقيات شيء، والتدريب المشترك شيء تاني. اللي إنت بتتكلم عليه يا شهاب، هو تدريب مشترك بينا وبين الأتراك، بينا وما بين السعودية، بينا وما بين الإمارات، بينا وما بين اليونان، بينا وبين قبرص.. كده يعني.. بينا وبين روسيا.. بينا وبين الصين.. كده.. ده تدريب مشترك، ودي أنشطة تدريبية لتبادل الخبرات بين الدول وبعضها في المجال العسكري.
ألقيت الكلمة في القاهرة، بالعاصمة الإدارية الجديدة، في مقر الأكاديمية العسكرية المصرية، حيث تناول الإفطار مع الطلبة والمتدربات، وتحدث إليهم عن قضايا التدريب والانضباط والتطورات الإقليمية، وعلى رأسها ما وصفه باحتلال محور فيلادلفيا، واعتبار ذلك خرقًا للمعاهدة، وذلك أمام قيادات القوات المسلحة وأعضاء هيئة التدريس، وبحضور عدد من المسؤولين العسكريين.